ಯುವವೈದ್ಯೆಯನ್ನು ಮದುವೆಯಾದ ಪಂಜಾಬ್​ ಸಿಎಂ ಭಗವಂತ್​ ಮಾನ್ !

ಚಂಡೀಗಢ: ಪಂಜಾಬ್​ ಸಿಎಂ ಭಗವಂತ್​ ಮಾನ್​ ಇಂದು ಯುವವೈದ್ಯೆ ಡಾ.ಗುರುಪ್ರೀತ್​ ಕೌರ್ ರನ್ನು ಇಂದು ಸರಳ ರೀತಿಯಲ್ಲಿ ವಿವಾಹವಾದರು. ಚಂಡೀಗಢ್​ನ ಭಗವಂತ್​ ಮಾನ್ ಅವರ ಮನೆಯಲ್ಲಿಯೇ ವಿವಾಹ ಸಮಾರಂಭ ಸರಳವಾಗಿ ನೆರವೇರಿತು. 

ಆಪ್ ನಾಯಕ ಹಾಗೂ ದೆಹಲಿ ಸಿಎಂ ಅರವಿಂದ್​ ಕೇಜ್ರಿವಾಲ್​ ಸೇರಿದಂತೆ ಪಕ್ಷದ ಪ್ರಮುಖರು ಈ ವಿವಾಹ ಸಮಾರಂಭದಲ್ಲಿ ಪಾಲ್ಗೊಂಡಿದ್ದರು. ಈ ವಿವಾಹ ಕಾರ್ಯಕ್ರಮದಲ್ಲಿ ಕೆಲವೇ ಗಣ್ಯರು ಹಾಗೂ ಎರಡು ಕುಟುಂಬಗಳ ಆಪ್ತರು ಭಾಗವಹಿಸಿದ್ದಾರೆ. 

ವಧು ಡಾ.ಗುರುಪ್ರೀತ್​ ಕೌರ್​ ಕಡುಗೆಂಪು ಬಣ್ಣದ ಲೆಹೆಂಗಾ ಧರಿಸಿದ್ದರೆ, ಪಂಜಾಬ್ ಸಿಎಂ ಭಗವಂತ್​ ಮಾನ್​ ಹೊಂಬಣ್ಣದ ಶೆರ್ವಾನಿಯಲ್ಲಿ ಮಿಂಚಿದರು. ಭಗವಂತ ಮಾನ್​ ಅವರು ಖಡ್ಗ ಹಿಡಿದು ಕ್ಯಾಮೆರಾಗೆ ಪೋಸ್​ ನೀಡಿರುವ ಫೋಟೋವೊಂದು ಜಾಲತಾಣದಲ್ಲಿ ಸಿಕ್ಕಾಪಟ್ಟೆ ಸದ್ದು ಮಾಡುತ್ತಿದೆ. 48 ವರ್ಷದ ಭಗವಂತ್​ ಮಾನ್​ ಅವರು 6 ವರ್ಷಗಳ ಹಿಂದೆ ತಮ್ಮ ಮೊದಲ ಪತ್ನಿಗೆ ಡಿವೋರ್ಸ್​ ನೀಡಿದ್ದರು. ಇದು ಅವರಿಗೆ ಎರಡನೇ ಮದುವೆಯಾಗಿದ್ದು, 32 ವರ್ಷದ ಡಾ.ಗುರುಪ್ರೀತ್​ ಕೌರ್​ ಹಾಗೂ ಭಗವಂತ ಮಾನ್ ಅವರ​ ವಯದ್ಸಿನ ನಡುವೆ 16 ವರ್ಷಗಳ ಅಂತರವಿದೆ. 

ಡಾ.ಗುರುಪ್ರೀತ್​ ಕೌರ್​ಗೆ ಇಬ್ಬರು ಸಹೋದರಿಯರಿದ್ದಾರೆ. ಇಬ್ಬರು ಕೂಡ ವಿದೇಶದಲ್ಲಿದ್ದಾರೆ. ಭಗವಂತ  ಮಾನ್​ ಅವರ ನಿಕಟ ಮೂಲಗಳ ಪ್ರಕಾರ, ಎರಡೂ ಕುಟುಂಬಗಳ ನಡುವೆ ಹಲವು ವರ್ಷಗಳಿಂದ ಸಂಬಂಧ ಇದೆ ಎನ್ನಲಾಗುತ್ತಿದೆ.