ಕೇರಳದಲ್ಲಿ ಮೊದಲ ಬಾರಿಗೆ ಆನ್ ಲೈನ್ ಮೂಲಕವೇ ನಡೆಯಿತು ರಿಜಿಸ್ಟ್ರಾರ್ ಮದುವೆ !
Sunday, October 24, 2021
ಪುನಲೂರ್: ಕೇರಳದ ಪುನಲೂರ್ನಲ್ಲಿ ಸಬ್ ರಿಜಿಸ್ಟ್ರಾರ್ ಕಚೇರಿಯಲ್ಲಿ ವಧು ಧನ್ಯಾ ಮಾರ್ಟಿನ್ ಹಾಗೂ ಉಕ್ರೇನ್ನಲ್ಲಿರುವ ವರ ಜೀವನ್ ಕುಮಾರ್ ಕಾನೂನುಬದ್ಧವಾಗಿ ಆನ್ಲೈನ್ ಮೂಲಕವೇ ಮದುವೆಯಾಗಿ ಸುದ್ದಿಯಾಗಿದ್ದಾರೆ. ಇಡೀ ಕೇರಳ ರಾಜ್ಯದಲ್ಲಿ ಡಿಜಿಟಲ್ ಸೌಲಭ್ಯದೊಂದಿಗೆ ನೆರವೇರಿದ ಮೊದಲ ವಿವಾಹ ಇದಾಗಿದೆ.
ಸಬ್ ರಿಜಿಸ್ಟ್ರಾರ್ ಟಿ.ಎಂ. ಫಿರೋಜ್ ನೇತೃತ್ವದಲ್ಲಿ ಈ ವಿವಾಹವು ಕಾನೂನುಬದ್ಧವಾಗಿ ನೆರವೇರಿದೆ. ಕಾನೂನು ವ್ಯವಹಾರ ಮುಗಿದ ತಕ್ಷಣ ಮದುವೆ ಪ್ರಮಾಣ ಪತ್ರವನ್ನು ವಧುವಿಗೆ ಹಸ್ತಾಂತರಿಸಲಾಯಿತು.
ವರ ಜೀವನ್ ಕುಮಾರ್ ಪುನಲೂರ್ ನಿವಾಸಿ. ವಧು ಧನ್ಯಾ ಮಾರ್ಟಿನ್ ತಿರುವಂತಪುರಂನ ಕಝಕ್ಕೂಟಂ ಮೂಲದ ನಿವಾಸಿ. ಸದ್ಯ ವೃತ್ತಿ ನಿಮಿತ್ತ ಉಕ್ರೇನ್ ನಲ್ಲಿ ವಾಸಿಸಿರುವ ಜೀವನ್ ಕುಮಾರ್ ಗೆ ಕೋವಿಡ್ ಸೋಂಕಿನ ನಿರ್ಬಂಧದ ಹಿನ್ನೆಲೆಯಲ್ಲಿ ಕೇರಳಕ್ಕೆ ಬರಲು ಸಾಧ್ಯವಾಗಿರಲಿಲ್ಲ. ಆದರೆ ವಿಶೇಷ ಮದುವೆಯ ಕಾಯ್ದೆಯನ್ವಯ ತಮ್ಮ ವಿವಾಹ ನೋಂದಣಿ ಮಾಡಲು ಕಳೆದ ಮಾರ್ಚ್ನಲ್ಲೇ ಧನ್ಯಾ ಮತ್ತು ಜೀವನ್ ಕುಮಾರ್ ಅರ್ಜಿ ಸಲ್ಲಿಸಿದ್ದರು. ಆದರೆ, ನಿಗದಿತ ಸಮಯಕ್ಕೆ ಜೀವನ್ ಕುಮಾರ್ ಕೇರಳಕ್ಕೆ ಬರಲು ಸಾಧ್ಯವಾಗಲಿಲ್ಲ.
ಹೀಗಾಗಿ ಅವರು ಕೇರಳ ಹೈಕೋರ್ಟ್ ಮೆಟ್ಟಿಲೇರಿದ್ದರು. ಅರ್ಜಿಯ ಸಿಂಧುತ್ವವನ್ನು ವಿಸ್ತರಿಸಬೇಕು ಮತ್ತು ಸಬ್-ರಿಜಿಸ್ಟ್ರಾರ್ ಕಚೇರಿಯಲ್ಲಿ ಎರಡೂ ಕುಟುಂಬಗಳ ಉಪಸ್ಥಿತಿಯ ನಿಯಮವನ್ನು ತಪ್ಪಿಸುವ ಮೂಲಕ ವಿಡಿಯೋ ಕಾನ್ಫರೆನ್ಸ್ ಮೂಲಕ ಮದುವೆ ನೆರವೇರಿಸಬೇಕೆಂದು ಅರ್ಜಿಯಲ್ಲಿ ಕೇರಳ ಹೈಕೋರ್ಟ್‌ಗೆ ಮನವಿ ಮಾಡಿದ್ದರು. ವಿದೇಶಾಂಗ ಸಚಿವಾಲಯ, ಮಾಹಿತಿ ತಂತ್ರಜ್ಞಾನ ಇಲಾಖೆಯ ಅಭಿಪ್ರಾಯಗಳನ್ನು ಪರಿಗಣಿಸಿ, ಹೈಕೋರ್ಟ್ ವಧು-ವರರ ಪರ ತೀರ್ಪು ನೀಡಿತ್ತು.
ಈ ಹಿನ್ನೆಲೆಯಲ್ಲಿ ಆನ್ಲೈನ್ ಸೌಲಭ್ಯ ಮೂಲಕ ಇಬ್ಬರು ವಿವಾಹ ನೇರವೇರಿದೆ. ಈ ಮೂಲಕ ರಾಜ್ಯದಲ್ಲೇ ಮೊದಲ ಆನ್ಲೈನ್ ಮದುವೆಗೆ ಧನ್ಯಾ ಮತ್ತು ಜೀವನ್ ಕುಮಾರ್ ಸಾಕ್ಷಿಯಾಗಿದ್ದಾರೆ. ವರನ ತಂದೆ ದೇವರಾಜನ್ ತಂದೆಯ ಪರವಾಗಿ ಸಹಿ ಹಾಕಿದರು. ಜಿಲ್ಲಾ ರಿಜಿಸ್ಟ್ರಾರ್ ಸಿ.ಕೆ.ಜಾನ್ಸನ್ ಈ ವಿಶೇಷ ಸಮಾರಂಭಕ್ಕೆ ಸಾಕ್ಷಿಯಾದರು. ಗೂಗಲ್ ಮೀಟ್ ಎಂಬ ಆನ್ಲೈನ್ ವೇದಿಕೆ ಮೂಲಕ ಈ ವಿನೂತನ ಮದುವೆ ಸಮಾರಂಭ ನೆರವೇರಿತು.
