ನಾಗ್ಪುರ: ಅಪಾರ್ಟ್ಮೆಂಟ್ ಸೊಸೈಟಿಯಲ್ಲಿ ನಡೆಯುತ್ತಿದ್ದ ನೃತ್ಯ ತರಬೇತಿಗೆ (Dance Class) ಹೋಗಲು ಸಜ್ಜಾಗುತ್ತಿದ್ದ ಪತ್ನಿ, ಅಡುಗೆ ಮಾಡಲು ನಿರಾಕರಿಸಿದ್ದಕ್ಕೆ ಕುಡಿದ ಅಮಲಿನಲ್ಲಿ ಆಕೆಯ ಮೇಲೆ ಮನಬಂದಂತೆ ಹಲ್ಲೆ ನಡೆಸಿ ಹತ್ಯೆ ಮಾಡಿರುವ ಆಘಾತಕಾರಿ ಘಟನೆ ಮಹಾರಾಷ್ಟ್ರದ ನಾಗ್ಪುರದಲ್ಲಿ ನಡೆದಿದೆ.
ಯಾಮಿನಿ ಕೃಷ್ಣಲಾಲ್ ಯಾದವ್ (38) ಮೃತ ದುರ್ದೈವಿ. ಘಟನೆಗೆ ಸಂಬಂಧಿಸಿದಂತೆ ಆಕೆಯ ಪತಿ ಕೃಷ್ಣಲಾಲ್ ಯಾದವ್ (41) ಎಂಬಾತನನ್ನು ಪೊಲೀಸರು ಬಂಧಿಸಿ ಕೊಲೆ ಪ್ರಕರಣ ದಾಖಲಿಸಿಕೊಂಡಿದ್ದಾರೆ. ಈ ದಂಪತಿಗೆ ಇಬ್ಬರು ಪುಟ್ಟ ಮಕ್ಕಳಿದ್ದಾರೆ.
ಡ್ಯಾನ್ಸ್ ಕ್ಲಾಸ್ ವಿವಾದ, ಮಕ್ಕಳ ಮುಂದೆಯೇ ಮಾರಣಾಂತಿಕ ಹಲ್ಲೆ:
ಪೊಲೀಸರ ಮಾಹಿತಿ ಪ್ರಕಾರ, ಕೆಲಸ ಮುಗಿಸಿ ಮನೆಗೆ ಬಂದ ಪತಿ ಕೃಷ್ಣಲಾಲ್, ತನಗೆ ಹಾಗೂ ಮಕ್ಕಳಿಗೆ ಅಡುಗೆ ಮಾಡುವಂತೆ ಯಾಮಿನಿಗೆ ತಿಳಿಸಿದ್ದಾನೆ. ಆದರೆ, ಅದೇ ವೇಳೆ ಹೌಸಿಂಗ್ ಸೊಸೈಟಿಯಲ್ಲಿ ನಡೆಯುತ್ತಿದ್ದ ನೃತ್ಯ ತರಗತಿಗೆ ತೆರಳಲು ಸಿದ್ಧವಾಗುತ್ತಿದ್ದ ಯಾಮಿನಿ, ತಕ್ಷಣಕ್ಕೆ ಅಡುಗೆ ಮಾಡಲು ನಿರಾಕರಿಸಿದ್ದಾಳೆ.
ಇದರಿಂದ ಆಕ್ರೋಶಗೊಂಡ ಪತಿ, ಕುಡಿದ ಮತ್ತಿನಲ್ಲಿ ಪತ್ನಿಯೊಂದಿಗೆ ತೀವ್ರ ವಾಗ್ವಾದಕ್ಕಿಳಿದಿದ್ದಾನೆ. ಗಲಾಟೆ ವಿಕೋಪಕ್ಕೆ ಹೋದಾಗ, ಇಬ್ಬರು ಮಕ್ಕಳ ಮುಂದೆಯೇ ಆಕೆಯ ಕುತ್ತಿಗೆ ಹಾಗೂ ಹೊಟ್ಟೆಯ ಭಾಗಕ್ಕೆ ಬಲವಾಗಿ ಹಲ್ಲೆ ನಡೆಸಿದ್ದಾನೆ.
ಆಂತರಿಕ ರಕ್ತಸ್ರಾವ, ಚಿಕಿತ್ಸೆ ಫಲಿಸದೆ ಸಾವು:
ಹಲ್ಲೆಯ ನಂತರ ತೀವ್ರ ಕುತ್ತಿಗೆ ಮತ್ತು ಹೊಟ್ಟೆ ನೋವಿನಿಂದ ಬಳಲುತ್ತಿದ್ದ ಯಾಮಿನಿ, ನೋವು ನಿವಾರಕ ಮಾತ್ರೆ ತರುವಂತೆ ಪತಿಗೆ ಹೇಳಿದ್ದಾಳೆ. ಕೃಷ್ಣಲಾಲ್ ಮೆಡಿಕಲ್ ಶಾಪ್ಗೆ ಹೋದರೂ ಅಂಗಡಿ ಮುಚ್ಚಿದ್ದರಿಂದ ಬರಿಗೈಯಲ್ಲಿ ವಾಪಸಾಗಿದ್ದ.
ರಾತ್ರಿ ಕಳೆಯುತ್ತಿದ್ದಂತೆ ಆಂತರಿಕ ಗಾಯಗಳಿಂದಾಗಿ ಯಾಮಿನಿಯ ಹೊಟ್ಟೆ ಊದಿಕೊಂಡು ಸ್ಥಿತಿ ಚಿಂತಾಜನಕವಾಯಿತು. ಕೂಡಲೇ ಆಕೆಯನ್ನು ಆಸ್ಪತ್ರೆಗೆ ದಾಖಲಿಸಲಾಯಿತಾದರೂ, ಚಿಕಿತ್ಸೆ ಫಲಕಾರಿಯಾಗದೆ ಆಕೆ ಮೃತಪಟ್ಟಿದ್ದಾಳೆ.
ಮರಣೋತ್ತರ ಪರೀಕ್ಷೆಯಲ್ಲಿ ಕೊಲೆ ರಹಸ್ಯ ಬಯಲು:
ಆರಂಭದಲ್ಲಿ ಪೊಲೀಸರು ಇದನ್ನು ಆಕಸ್ಮಿಕ ಸಾವು ಎಂದು ಪ್ರಕರಣ ದಾಖಲಿಸಿಕೊಂಡು ಮೃತದೇಹವನ್ನು ಮರಣೋತ್ತರ ಪರೀಕ್ಷೆಗೆ ಕಳುಹಿಸಿದ್ದರು. ಆದರೆ, ಮರಣೋತ್ತರ ಪರೀಕ್ಷೆಯ ವರದಿಯಲ್ಲಿ ಯಾಮಿನಿಯ ಕುತ್ತಿಗೆ ಮೂಳೆ ಮುರಿದಿರುವುದು (Fracture) ಹಾಗೂ ಹೊಟ್ಟೆಯ ಕರುಳುಗಳಿಗೆ ತೀವ್ರವಾದ ಆಂತರಿಕ ಹಾನಿಯಾಗಿರುವುದು ಬೆಳಕಿಗೆ ಬಂದಿದೆ.
ವರದಿಯ ಆಧಾರದ ಮೇಲೆ ಕೃಷ್ಣಲಾಲ್ನನ್ನು ತೀವ್ರ ವಿಚಾರಣೆಗೆ ಒಳಪಡಿಸಿದ ಪೊಲೀಸರು, ಹಲ್ಲೆ ನಡೆಸಿರುವುದನ್ನು ಖಚಿತಪಡಿಸಿಕೊಂಡು ಆತನನ್ನು ಬಂಧಿಸಿದ್ದಾರೆ. ಆರೋಪಿಯ ವಿರುದ್ಧ ಕೊಲೆ ಪ್ರಕರಣ ದಾಖಲಿಸಿಕೊಂಡು ತನಿಖೆ ಮುಂದುವರಿಸಲಾಗಿದೆ.
.png)