- ಸೌದಿ ಅರೇಬಿಯಾದಲ್ಲಿ ಪರಿಚಯವಾಗಿದ್ದ ತಮಿಳುನಾಡಿನ ಲಕ್ಷ್ಮಣನ್ನನ್ನು ಹುಡುಕಿ ಹೊರಟ ಇಸ್ಮಾಯಿಲ್
- ವಾಟ್ಸಾಪ್ ವಿಡಿಯೋ ಕಾಲ್ ಮೂಲಕ ಭಾವುಕರಾದ ಹಳೆಯ ಸಹೋದ್ಯೋಗಿಗಳು
ತಿರುವನಂತಪುರಂ: ಸಾಲ ಪಡೆದು ಮರಳಿಸದೆ ನಂಬಿಕೆ ದ್ರೋಹ ಎಸಗುವವರೇ ಹೆಚ್ಚಾಗಿರುವ ಈ ಇಂದಿನ ದಿನಗಳಲ್ಲಿ, ವ್ಯಕ್ತಿಯೊಬ್ಬರು ಬರೋಬ್ಬರಿ 35 ವರ್ಷಗಳ ಹಿಂದೆ ತಾನು ಪಡೆದಿದ್ದ ಸಣ್ಣ ಸಾಲದ ಮೊತ್ತವನ್ನು ನೆನಪಿನಲ್ಲಿಟ್ಟುಕೊಂಡು, ಕೊಟ್ಟವರನ್ನು ಹುಡುಕಿಕೊಂಡು ಹೋಗಿ ಬಡ್ಡಿ ಸಮೇತ ಮರುಪಾವತಿಸಿದ ಅಪರೂಪದ ಹಾಗೂ ಮನಮಿಡಿಯುವ ಘಟನೆಯೊಂದು ಬೆಳಕಿಗೆ ಬಂದಿದೆ.
35 ವರ್ಷಗಳ ಹಿಂದಿನ ಆ ಸೌದಿ ಕಥೆ:
ಈ ಅಪರೂಪದ ಪ್ರಾಮಾಣಿಕತೆ ಮೆರೆದ ವ್ಯಕ್ತಿ ಇಸ್ಮಾಯಿಲ್. ಇವರಿಗೂ ಮತ್ತು ಲಕ್ಷ್ಮಣನ್ ಎಂಬುವವರಿಗೂ 1991 ರಲ್ಲಿ ಸೌದಿ ಅರೇಬಿಯಾದಲ್ಲಿ ಕೆಲಸದ ನಿಮಿತ್ತ ಭೇಟಿಯಾದಾಗ ಪರಿಚಯವಾಗಿತ್ತು. ಇಬ್ಬರೂ ಸಹೋದ್ಯೋಗಿಗಳಾಗಿದ್ದು, ಸುಮಾರು 5 ವರ್ಷಗಳ ಕಾಲ ಒಟ್ಟಿಗೆ ಒಂದೇ ರೂಮ್ನಲ್ಲಿ ವಾಸವಾಗಿದ್ದರು. ಆ ಸಂದರ್ಭದಲ್ಲಿ ಇಸ್ಮಾಯಿಲ್ ಅವರು ಲಕ್ಷ್ಮಣನ್ ಅವರಿಂದ 120 ರಿಯಾಲ್ (ಅಂದಿನ ಭಾರತೀಯ ಮೌಲ್ಯದ ಪ್ರಕಾರ ಸುಮಾರು 1,000 ರೂ.) ಸಾಲವಾಗಿ ಪಡೆದುಕೊಂಡಿದ್ದರು. ಆ ವೇಳೆ ಇಸ್ಮಾಯಿಲ್, "ಸಾಧ್ಯವಾದಾಗ ಈ ಹಣವನ್ನು ಮರಳಿ ನೀಡುವೆ" ಎಂದು ಭರವಸೆ ಕೊಟ್ಟಿದ್ದರು.
ಕೆಲವು ವರ್ಷಗಳ ನಂತರ ಲಕ್ಷ್ಮಣನ್ ಭಾರತಕ್ಕೆ ಮರಳಿದರು. ಇಬ್ಬರ ಬಳಿಯೂ ಪರಸ್ಪರ ಸಂಪರ್ಕಿಸಲು ಯಾವುದೇ ಮೊಬೈಲ್ ಸಂಖ್ಯೆ ಅಥವಾ ವಿಳಾಸ ಇರಲಿಲ್ಲ. ಕಾಲಕ್ರಮೇಣ ಇಬ್ಬರ ನಡುವಿನ ಕೊಂಡಿ ಸಂಪೂರ್ಣವಾಗಿ ಕಡಿತಗೊಂಡಿತು. ಆದರೆ ಇಸ್ಮಾಯಿಲ್ ಮಾತ್ರ ತಾನು ಪಡೆದ ಸಾಲವನ್ನು ಮರೆತಿರಲಿಲ್ಲ.
ಹುಡುಕಾಟ ನಡೆದದ್ದು ಹೇಗೆ?
ತಾನು ಪಡೆದಿದ್ದ ಸಾಲವನ್ನು ಹೇಗಾದರೂ ಮಾಡಿ ಮರಳಿಸಬೇಕೆಂದು ಇಸ್ಮಾಯಿಲ್ ನಿರ್ಧರಿಸಿದರು. ಆದರೆ ಅವರ ಬಳಿ ಲಕ್ಷ್ಮಣನ್ ಅವರ ಫೋನ್ ನಂಬರ್ ಆಗಲಿ, ನಿಖರ ವಿಳಾಸವಾಗಲಿ ಇರಲಿಲ್ಲ. ಅವರಿಗೆ ತಿಳಿದಿದ್ದ ಒಂದೇ ಮಾಹಿತಿ ಎಂದರೆ ಲಕ್ಷ್ಮಣನ್ ಅವರು ತಮಿಳುನಾಡಿನ 'ಧರ್ಮಪುರಿ'ಯವರು ಎಂಬುದು ಮಾತ್ರ. ಈ ಅಲ್ಪ ಮಾಹಿತಿಯನ್ನೇ ಇಟ್ಟುಕೊಂಡು ಇಸ್ಮಾಯಿಲ್ ಆನ್ಲೈನ್ ಮೂಲಕ ತಡಕಾಡಿ, ಲಕ್ಷ್ಮಣನ್ ಸದ್ಯ ವಾಸವಿರುವ ಜಾಗವನ್ನು ಪತ್ತೆ ಹಚ್ಚುವಲ್ಲಿ ಯಶಸ್ವಿಯಾಗಿದ್ದಾರೆ.
ಬಡ್ಡಿ ಸೇರಿಸಿ 25,000 ರೂ. ಮರುಪಾವತಿ:
ವಿಳಾಸ ಪತ್ತೆಯಾಗುತ್ತಿದ್ದಂತೆಯೇ ಇಸ್ಮಾಯಿಲ್ ನೇರವಾಗಿ ಧರ್ಮಪುರಿಗೆ ತೆರಳಿದ್ದಾರೆ. ಆದರೆ ಲಕ್ಷ್ಮಣನ್ ಅವರು ಪ್ರಸ್ತುತ ಕಾರ್ಯನಿಮಿತ್ತ ಗಲ್ಫ್ ದೇಶದಲ್ಲೇ ಇದ್ದ ಕಾರಣ, ಇಸ್ಮಾಯಿಲ್ ಅಲ್ಲಿನ ಅವರ ಕುಟುಂಬಸ್ಥರನ್ನು ಭೇಟಿಯಾಗಿ 25,000 ರೂ. ಹಣವನ್ನು ಹಸ್ತಾಂತರಿಸಿದ್ದಾರೆ.
ಬಳಿಕ ಲಕ್ಷ್ಮಣನ್ ಅವರಿಗೆ ವಾಟ್ಸಾಪ್ ವಿಡಿಯೋ ಕಾಲ್ ಮಾಡುವ ಮೂಲಕ ಇಬ್ಬರು ಹಳೆಯ ಸ್ನೇಹಿತರು ದಶಕಗಳ ನಂತರ ಮುಖಾಮುಖಿಯಾಗಿ ಮಾತನಾಡಿದ್ದಾರೆ. ಗೆಳೆಯನ ಪ್ರಾಮಾಣಿಕತೆಗೆ ಭಾವುಕರಾದ ಲಕ್ಷ್ಮಣನ್, "ಆತ 25,000 ರೂ. ಹಣವನ್ನು ಹೇಗೆ ಲೆಕ್ಕ ಹಾಕಿ ಕೊಟ್ಟನೋ ಗೊತ್ತಿಲ್ಲ, ಬಹುಶಃ ಅಂದಿನ ಹಣಕ್ಕೆ ಬಡ್ಡಿ ಸೇರಿಸಿ ಕೊಟ್ಟಿರಬೇಕು. ಆತ ಅಪ್ರತಿಮ ಪ್ರಾಮಾಣಿಕ ವ್ಯಕ್ತಿ, ತಾನು ಅಂದು ಕೊಟ್ಟಿದ್ದ ಮಾತನ್ನು ಇಂದಿಗೂ ಉಳಿಸಿಕೊಂಡಿದ್ದಾನೆ" ಎಂದು ತನ್ನ ಹಳೆಯ ಸ್ನೇಹಿತನ ಗುಣಗಾನ ಮಾಡಿದ್ದಾರೆ. ಈ ವಿಶಿಷ್ಟ ಸ್ನೇಹ ಮತ್ತು ಪ್ರಾಮಾಣಿಕತೆಯ ಕಥೆ ಸದ್ಯ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಮೆಚ್ಚುಗೆಗೆ ಪಾತ್ರವಾಗಿದೆ.
