ಬೆಂಗಳೂರಿನಲ್ಲಿ ಮಂಗಳೂರಿನ ಟೆಕ್ಕಿ ಯುವತಿಯ ಹತ್ಯೆಯ ಸೀಕ್ರೇಟ್ ಬಹಿರಂಗ: ಪಿಯುಸಿ ವಿದ್ಯಾರ್ಥಿ ಅರೆಸ್ಟ್

ಬೆಂಗಳೂರಿನಲ್ಲಿ ಮಂಗಳೂರಿನ ಯುವತಿಯ ಹತ್ಯೆಯ ಸೀಕ್ರೇಟ್ ಬಹಿರಂಗ: ಪಿಯುಸಿ ವಿದ್ಯಾರ್ಥಿ ಅರೆಸ್ಟ್

ಬೆಂಗಳೂರಿನ ರಾಮಮೂರ್ತಿನಗರದಲ್ಲಿ ನಡೆದಿದ್ದ ಸಾಫ್ಟ್‌ವೇರ್ ಇಂಜಿನಿಯರ್ ಶರ್ಮಿಳಾ ಕುಶಾಲಪ್ಪ ಅವರ ನಿಗೂಢ ಸಾವು ಇದೀಗ ಭೀಕರ ಕೊಲೆ ಎಂಬುದು ಸಾಬೀತಾಗಿದೆ. ಮೊದಲು ಶಾರ್ಟ್ ಸರ್ಕ್ಯೂಟ್‌ನಿಂದ ಸಂಭವಿಸಿದ ಅಗ್ನಿ ಅವಘಡ ಎಂದು ಭಾವಿಸಲಾಗಿದ್ದ ಈ ಪ್ರಕರಣದಲ್ಲಿ, ನೆರೆಯ ಮನೆಯಲ್ಲಿದ್ದ ಪಿಯುಸಿ ವಿದ್ಯಾರ್ಥಿಯೇ ಅಸಲಿ ವಿಲನ್ ಎಂಬ ಆಘಾತಕಾರಿ ಸತ್ಯವನ್ನು ಪೊಲೀಸರು ಹೊರಹಾಕಿದ್ದಾರೆ.

ಘಟನೆಯ ಹಿನ್ನೆಲೆ ಮತ್ತು ಸಂಶಯದ ಸುಳಿ

ಮೂಲತಃ ಮಂಗಳೂರಿನವರಾದ 34 ವರ್ಷದ ಶರ್ಮಿಳಾ ಕುಶಾಲಪ್ಪ, ಬೆಂಗಳೂರಿನ ಅಕ್ಸೆಂಚರ್ ಕಂಪನಿಯಲ್ಲಿ ಉದ್ಯೋಗಿಯಾಗಿದ್ದರು. ಜನವರಿ 3ರ ರಾತ್ರಿ ಅವರು ವಾಸವಿದ್ದ ಅಪಾರ್ಟ್‌ಮೆಂಟ್‌ನಲ್ಲಿ ಬೆಂಕಿ ಕಾಣಿಸಿಕೊಂಡಿತ್ತು. ಅಗ್ನಿಶಾಮಕ ದಳದವರು ಬಾಗಿಲು ಒಡೆದು ನೋಡಿದಾಗ ಶರ್ಮಿಳಾ ಅರೆಪ್ರಜ್ಞಾವಸ್ಥೆಯಲ್ಲಿ ಬಿದ್ದಿದ್ದರು. ಆಸ್ಪತ್ರೆಗೆ ಸಾಗಿಸುವಷ್ಟರಲ್ಲಿ ಅವರು ಮೃತಪಟ್ಟಿದ್ದರು. ಮೇಲ್ನೋಟಕ್ಕೆ ಹೊಗೆ ಸೇವನೆಯಿಂದ ಸಾವು ಸಂಭವಿಸಿದೆ ಎಂದು ನಂಬಲಾಗಿತ್ತು.

ಪೋಸ್ಟ್ ಮಾರ್ಟಮ್ ವರದಿಯಲ್ಲಿ ಬಯಲಾದ ಸತ್ಯ

ಶರ್ಮಿಳಾ ಸಾವಿನ ಬಗ್ಗೆ ಅವರ ಸ್ನೇಹಿತ ಕೆ. ರೋಹಿತ್ ಅನುಮಾನ ವ್ಯಕ್ತಪಡಿಸಿ ದೂರು ನೀಡಿದ್ದರು. ಶವಪರೀಕ್ಷೆ ನಡೆಸಿದ ವೈದ್ಯರು ನೀಡಿದ ವರದಿ ತನಿಖೆಯ ದಿಕ್ಕನ್ನೇ ಬದಲಿಸಿತು. ಶರ್ಮಿಳಾ ಅವರ ದೇಹದ ಮೇಲಿದ್ದ ಗಾಯದ ಗುರುತುಗಳು ಬೆಂಕಿ ತಗುಲುವ ಮೊದಲೇ ಉಂಟಾಗಿದ್ದವು. ಉಸಿರುಗಟ್ಟಿಸಿ ಅವರನ್ನು ಹತ್ಯೆ ಮಾಡಲಾಗಿದೆ ಎಂಬ ವೈದ್ಯಕೀಯ ಅಭಿಪ್ರಾಯವು ಪೊಲೀಸರಿಗೆ ಕೊಲೆಯ ಸುಳಿವು ನೀಡಿತು.

ಕಾಮದ ಕೈಗೆ ಸಿಲುಕಿದ ಟೆಕ್ಕಿಯ ಪ್ರಾಣ

ಕೊಡಗು ಜಿಲ್ಲೆಯ ವಿರಾಜಪೇಟೆ ಮೂಲದ 2ನೇ ವರ್ಷದ ಪಿಯುಸಿ ವಿದ್ಯಾರ್ಥಿ ಕರ್ನಲ್ ಕುರೈ ಈ ಕೃತ್ಯದ ಆರೋಪಿ. ಶರ್ಮಿಳಾ ಅವರ ಮನೆಯ ಪಕ್ಕದ ಮನೆಯಲ್ಲೇ ಈತ ವಾಸವಿದ್ದ. ಘಟನೆಯ ರಾತ್ರಿ ಕಿಟಕಿಯ ಮೂಲಕ ಶರ್ಮಿಳಾ ಮನೆಗೆ ನುಗ್ಗಿದ ಆರೋಪಿ, ತನ್ನ ಕಾಮದ ಇಚ್ಛೆಯನ್ನು ವ್ಯಕ್ತಪಡಿಸಿದ್ದಾನೆ. ಶರ್ಮಿಳಾ ತೀವ್ರವಾಗಿ ಪ್ರತಿರೋಧ ಒಡ್ಡಿದಾಗ, ಗಾಬರಿಗೊಂಡ ಆರೋಪಿ ಅವಳ ಮೂಗು ಮತ್ತು ಬಾಯಿ ಒತ್ತಿ ಹಿಡಿದು ಹತ್ಯೆ ಮಾಡಿದ್ದಾನೆ.

ಪುರಾವೆ ನಾಶಕ್ಕೆ ಅಗ್ನಿ ಅವತಾರ

ಹತ್ಯೆಯ ನಂತರ ಶರ್ಮಿಳಾ ಬಟ್ಟೆಗಳ ಮೇಲೆ ರಕ್ತದ ಕಲೆಗಳಾಗಿದ್ದವು. ತನ್ನ ಕೃತ್ಯದ ಸಾಕ್ಷ್ಯ ನಾಶಪಡಿಸಲು ಆರೋಪಿ ವಿದ್ಯಾರ್ಥಿಯು ಶರ್ಮಿಳಾ ಬಟ್ಟೆಗಳಿಗೆ ಬೆಂಕಿ ಹಚ್ಚಿದ್ದಾನೆ. ಅದು ಇಡೀ ಮನೆಗೆ ಹರಡಿ ಅಗ್ನಿ ಅವಘಡದಂತೆ ಬಿಂಬಿತವಾಗಿತ್ತು. ಬಳಿಕ ತಾನು ನುಗ್ಗಿದ್ದ ಕಿಟಕಿಯ ಮೂಲಕವೇ ವಾಪಸ್ ಪರಾರಿಯಾಗಿದ್ದ. ಪೊಲೀಸರ ಸತತ ವಿಚಾರಣೆಯ ನಂತರ ಆರೋಪಿ ತನ್ನ ತಪ್ಪನ್ನು ಒಪ್ಪಿಕೊಂಡಿದ್ದಾನೆ.