ಡ್ರಗ್ಸ್ ಪ್ರಕರಣದಲ್ಲಿ ಕ್ಲಿನ್ ಚಿಟ್ ದೊರಕಿರುವ ಬೆನ್ನಲ್ಲೇ 'ನಾನಿದನ್ನು ಸೇವಿಸ್ತಿದ್ದೆ' ಎಂದು ಹೇಳಿದ ಶಾರುಖ್ ಪುತ್ರ
Monday, May 30, 2022
ಮುಂಬೈ: ಬಾಲಿವುಡ್ ನಟ ಶಾರುಖ್ ಖಾನ್ ಪುತ್ರ ಆರ್ಯನ್ ಖಾನ್ ಡ್ರಗ್ಸ್ ಪ್ರಕರಣದಲ್ಲಿ ಕ್ಲಿನ್ ಚಿಟ್ ದೊರಕಿರುವ ಬೆನ್ನಲ್ಲೇ ತಾನದನ್ನು ಸೇವಿಸುತ್ತಿದ್ದೆ ಎಂದು ಹೇಳಿದ್ದಾನೆ.
ಕಳೆದ ಅಕ್ಟೋಬರ್ 30ರಂದು ಕ್ರೂಸ್ ನಲ್ಲಿ ಪಾರ್ಟಿ ಮಾಡುತ್ತಿದ್ದ ಸಂದರ್ಭ ಸಿಕ್ಕಿಬಿದ್ದಿರುವ ಆರ್ಯನ್ ಖಾನ್ ಜೈಲುಪಾಲಾಗಿದ್ದ. ಆ ಬಳಿಕ ಹೊರಗೆ ಬಂದರೂ ಕೇಸ್ ಮಾತ್ರ ನಡೆಯುತ್ತಿತ್ತು. ಇದೀಗ ಆರ್ಯನ್ಗೆ ವಿಶೇಷ ತನಿಖಾಧಿಕಾರಿಗಳು ಕ್ಲೀನ್ಚಿಟ್ ನೀಡಿದ್ದಾರೆ. ಈ ಸಮಯದಲ್ಲಿ ಆರ್ಯನ್ ಖಾನ್ ಬಳಿ ಡ್ರಗ್ಸ್ ಇರುವುದಕ್ಕೆ ಸಾಕ್ಷ್ಯಾಧಾರ ಸಿಕ್ಕಿಲ್ಲ ಎಂದಿದ್ದಾರೆ. ಆರ್ಯನ್ ಖಾನ್ ಬಗ್ಗೆ ಯಾವುದೇ ಪುರಾವೆಗಳು ಲಭ್ಯವಾಗಿಲ್ಲ. ಅಲ್ಲದೆ ವಶಪಡಿಸಿಕೊಂಡ ವಸ್ತುಗಳಲ್ಲಿ ಡ್ರಗ್ಸ್ ಕಂಡು ಬಂದಿಲ್ಲ ಎಂದು ಚಾರ್ಜ್ಶೀಟ್‌ನಲ್ಲಿ ಉಲ್ಲೇಖಿಸಲಾಗಿದೆ. ಪ್ರಕರಣದಲ್ಲಿ 22 ದಿನಗಳ ಕಾಲ ಜೈಲು ಶಿಕ್ಷೆಯನ್ನು ಅನುಭವಿಸಿದ್ದ ಆರ್ಯನ್ ಖಾನ್ ಕೊನೆಗೂ ನೆಮ್ಮದಿಯಿಂದ ಉಸಿರುಬಿಡುವಂತಾಗಿದೆ.
ಈ ನಡುವೆ, ವಿಚಾರಣೆಯ ವೇಳೆ ಆರ್ಯನ್ ಖಾನ್ ತಾನು ಡ್ರಗ್ಸ್ ಸೇವನೆ ಮಾಡುತ್ತಿದ್ದುದು ನಿಜವೆಂದು ಒಪ್ಪಿಕೊಂಡಿದ್ದಾನೆ. ಅಮೆರಿಕಾದಲ್ಲಿ ಪದವಿ ಅಭ್ಯಾಸ ಮಾಡುತ್ತಿದ್ದ ಸಂದರ್ಭ ತಾನು ಗಾಂಜಾ ಸೇವಿಸುತ್ತಿದ್ದೆ ಎಂದು ನಾರ್ಕೋಟಿಕ್ಸ್ ಕಂಟ್ರೋಲ್ ಬ್ಯೂರೋ (ಎನ್‌ಸಿಬಿ) ಮುಂದೆ ಹೇಳಿಕೆ ನೀಡಿದ್ದಾರೆ. ತನಗೆ ಆ ವೇಳೆ ನಿದ್ದೆ ಬರುತ್ತಿರಲಿಲ್ಲ. ಹಾಗಾಗಿ ಇಂಟರ್ನೆಟ್ನಲ್ಲಿ ಈ ಬಗ್ಗೆ ಹುಡುಕಾಡಿದಾಗ ಗಾಂಜಾ ಸೇವನೆ ಮಾಡಬೇಕೆಂಬ ಮಾಹಿತಿ ದೊರಕಿತ್ತು. ಅದಕ್ಕಾಗಿ ತಾನು ಗಾಂಜಾ ಸೇವಿಸುತ್ತಿದ್ದೆ ಎಂದು ಹೇಳಿದ್ದಾನೆ. ಆರ್ಯನ್ ಖಾನ್ ತನ್ನ ಸ್ನೇಹಿತೆ ಅನನ್ಯ ಪಾಂಡೆಯೊಂದಿಗೆ ಪಾರ್ಟಿಗೂ ಮೊದಲು ಕೊಕೇನ್ ಪ್ಲ್ಯಾನ್ ಮಾಡಿದ್ದ ವಾಟ್ಸ್ಆ್ಯಪ್ ಸಂದೇಶ ದೊರಕಿತ್ತು. ಇದರಲ್ಲಿ ಗಾಂಜಾ ಬಗ್ಗೆಯೂ ಉಲ್ಲೇಖವಿತ್ತು. ಇದಕ್ಕೆ ಉತ್ತರಿಸಿರುವ ಆರ್ಯನ್, 'ಈ ಮೆಸೇಜ್ ಮಾಡಿದ್ದು ತಾನೇ. ಆದರೆ ಇದೆಲ್ಲಾ ತಮಾಷೆಗೆ ಮಾಡಿರುವ ಮೆಸೇಜ್ಗಳಷ್ಟೇ. ನಾವೇನೂ ಪಾರ್ಟಿಯಲ್ಲಿ ಡ್ರಗ್ಸ್ ಸೇವನೆ ಮಾಡುತ್ತಿರಲಿಲ್ಲ' ಎಂದಿದ್ದಾನೆ.
ಮುಂಬೈನಿಂದ ಒಬ್ಬ ಡೀಲರ್ ಡ್ರಗ್ಸ್ ಪೂರೈಕೆ ಮಾಡುತ್ತಿದ್ದ ಬಗ್ಗೆ ಈ ಹಿಂದೆ ಆರ್ಯನ್ ಬಾಯಿಬಿಟ್ಟಿದ್ದ. 'ಡ್ರಗ್ಸ್ ಪೂರೈಕೆ ಮಾಡುತ್ತಿದ್ದುದು ಸತ್ಯ. ಆದರೆ ಆತನ ಹೆಸರು ಮತ್ತು ಮಾಹಿತಿ ತನಗಿಲ್ಲ' ಎಂದು ತಿಳಿಸಿದ್ದಾನೆ. ಅದೇನೇ ಆದರೂ ಅಧಿಕಾರಿಗಳು ಇದೀಗ ಕ್ಲೀನ್ಚಿಟ್ ಕೊಟ್ಟಿದ್ದರಿಂದ ಶಾರುಖ್ ಪುತ್ರ ನೆಮ್ಮದಿಯಿಂದ ಇದ್ದಾನೆ.
