ಡ್ಯಾನ್ಸ್ ಮಾಡುತ್ತಿದ್ದಾಗ ರೆಕಾರ್ಡ್ ಸಂಗೀತವನ್ನು ನಿಲ್ಲಿಸಿದಕ್ಕಾಗಿ ಸಹೋದರನನ್ನೇ ಕೊಡಲಿಂದ ಕಡಿದು ಹತ್ಯೆ

ಸತ್ನಾ: ಕೌಟುಂಬಿಕ ಕಾರ್ಯಕ್ರಮವೊಂದರಲ್ಲಿ ರೆಕಾರ್ಡ್  ಸಂಗೀತವನ್ನು ನಿಲ್ಲಿಸಿದ್ದು ಮಾತ್ರವಲ್ಲದೆ ನೃತ್ಯ ಮಾಡದಂತೆ ತಡೆದಿದ್ದರಿಂದ ರೊಚ್ಚಿಗೆದ್ದ ಯುವಕನೊಬ್ಬ ತನ್ನ ಸಹೋದರನನ್ನೇ ಕೊಡಲಿಯಿಂದ ಕಡಿದು ಕೊಲೆಗೈದ ಬರ್ಬರ ಘಟನೆ ಮಧ್ಯಪ್ರದೇಶದ ಸತ್ನಾ ಜಿಲ್ಲೆಯ ಕೋಠಿ ಪೊಲೀಸ್ ಠಾಣಾ ವ್ಯಾಪ್ತಿಯಲ್ಲಿ ಶುಕ್ರವಾರ ರಾತ್ರಿ ಈ ಘಟನೆ ನಡೆದಿದೆ.

ಕೊಲೆ ಆರೋಪಿ ರಾಜ್ ಕುಮಾರ್ ಕೋಲ್ (30) ಎಂಬಾತ ಇದೀಗ ಪೊಲೀಸ್ ಅತಿಥಿಯಾಗಿದ್ದಾನೆ.

ರಾಜಕುಮಾರ್‌ನ ಸಹೋದರ ರಾಕೇಶ್ (35) ತನ್ನ ಮನೆಯಲ್ಲಿ ಕಾರ್ಯಕ್ರಮ ಆಯೋಜಿಸಿದ್ದನು. ಈ ಸಂದರ್ಭ ಸೌಂಡ್‌ ಸಿಸ್ಟಮ್ ಮೂಲಕ ಸಂಗೀತ ಹಾಕಲಾಗಿತ್ತು. ಈ ವೇಳೆ ರಾಕೇಶ್, ಸಂಗೀತವನ್ನು ನಿಲ್ಲಿಸಿದ್ದಾನೆ. ಆದರೆ ಆರೋಪಿ ರಾಜ್ ಕುಮಾರ್ ನೃತ್ಯ ಮುಂದುವರಿಸಲು ಬಯಸಿದ್ದನು. ಆದ್ದರಿಂದ ರೆಕಾರ್ಡ್ ಸಂಗೀತ ಹಾಕುವಂತೆ ತನ್ನ ಸಹೋದರನನ್ನು ಒತ್ತಾಯಿಸಿದ್ದಾನೆ.

ಈ ವಿಚಾರಕ್ಕಾಗಿ ಸಹೋದರರ ನಡುವೆ ಭಾರೀ ವಾಗ್ವಾದ ಏರ್ಪಟ್ಟಿದೆ. ರೋಷದ ಭರದಲ್ಲಿ ರಾಜಕುಮಾರ್, ಸೋದರ ರಾಕೇಶ್ ಮೇಲೆ ಕೊಡಲಿಯಿಂದ ದಾಳಿ ನಡೆಸಿ, ಆತನನ್ನು ಹತ್ಯೆಗೈದಿದ್ದಾನೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಆ ಬಳಿಕ ಆರೋಪಿ ಘಟನಾ ಸ್ಥಳದಿಂದ ಪರಾರಿಯಾಗಿದ್ದನು. ಪೊಲೀಸರು ಶೋಧ ಕಾರ್ಯ ನಡೆಸಿ, ಕಿರುಸೇತುವೆಯೊಂದರ ಸಮೀಪ ಅವಿತಿದ್ದ ಆತನನ್ನು ಬಂಧಿಸಿದ್ದಾರೆ. ಅಪರಾಧ ಕೃತ್ಯಕ್ಕೆ ಬಳಸಿಕೊಂಡ ಮಾರಕಾಯಿಧವನ್ನು ಪೊಲೀಸರು ವಶಪಡಿಸಿಕೊಂಡು ತನಿಖೆ ಮುಂದುವರಿಸಿದ್ದಾರೆ.