ಗೋರಖ್‌ಪುರ (ಉತ್ತರ ಪ್ರದೇಶ):
ಬೀದಿ ನಾಯಿ ಕಡಿತಕ್ಕೆ ಒಳಗಾಗಿ ಸಾವನ್ನಪ್ಪಿದ ಹಸುವಿನ ಹಾಲಿನಿಂದ ತಯಾರಿಸಲಾದ ಚರಣಾಮೃತ (ತೀರ್ಥ) ಸೇವಿಸಿದ ಸುಮಾರು 450ಕ್ಕೂ ಹೆಚ್ಚು ಭಕ್ತರು ಮುನ್ನೆಚ್ಚರಿಕಾ ಕ್ರಮವಾಗಿ ರೇಬಿಸ್ ನಿರೋಧಕ ಲಸಿಕೆ (Anti-rabies vaccine) ಪಡೆದುಕೊಂಡಿರುವ ಆತಂಕಕಾರಿ ಘಟನೆ ಉತ್ತರ ಪ್ರದೇಶದ ಗೋರಖ್‌ಪುರ ಜಿಲ್ಲೆಯಲ್ಲಿ ನಡೆದಿದೆ.
ಗೋಲಾ ಬ್ಲಾಕ್ ವ್ಯಾಪ್ತಿಯ ದಾಡಿ ಖಾಸ್ ಗ್ರಾಮದಲ್ಲಿ ನಡೆದ ದುರ್ಗಾಪೂಜಾ ಮಹೋತ್ಸವದ ವೇಳೆ ಭಕ್ತರಿಗೆ ಚರಣಾಮೃತ ವಿತರಿಸಲಾಗಿತ್ತು. ಆದರೆ, ಆ ಹಾಲನ್ನು ನೀಡಿದ ಹಸು ನಾಯಿ ಕಡಿತದಿಂದ ಅಸಹಜವಾಗಿ ವರ್ತಿಸಿ ಸಾವನ್ನಪ್ಪಿದೆ ಎಂಬ ವಿಚಾರ ತಿಳಿಯುತ್ತಿದ್ದಂತೆಯೇ ಗ್ರಾಮಸ್ಥರಲ್ಲಿ ಭಾರಿ ಭೀತಿ ಆವರಿಸಿದೆ.
ಹಸುವಿನ ಅಸಹಜ ವರ್ತನೆ ಹಾಗೂ ಸಾವು:
ಹಸುವಿನ ಮಾಲೀಕ ನವಮಿ ಯಾದವ್ ಅವರು ನಿತ್ಯ ಗ್ರಾಮದ ಮನೆಗಳಿಗೆ ಹಾಗೂ ಎರಡು ಅಂಗಡಿಗಳಿಗೆ ಹಾಲು ಪೂರೈಸುತ್ತಿದ್ದರು. ದುರ್ಗಾಪೂಜೆಗೂ ಇವರ ಮನೆಯಿಂದಲೇ ಹಾಲು ಪಡೆದು ಮೊಸರು ಹಾಗೂ ಚರಣಾಮೃತ ತಯಾರಿಸಲಾಗಿತ್ತು. ಕಳೆದ ಎರಡು ದಿನಗಳಿಂದ ಹಸುವಿನ ಆರೋಗ್ಯದಲ್ಲಿ ಏರುಪೇರಾಗಿದ್ದು, ಮಂಗಳವಾರ ತೀವ್ರ ಸ್ವರೂಪ ಪಡೆದುಕೊಂಡಿತ್ತು. ಸ್ಥಳೀಯ ಪಶುವೈದ್ಯರ ಬಳಿ ತಪಾಸಣೆ ನಡೆಸಿದಾಗ ಹಸುವಿಗೆ ಬೀದಿ ನಾಯಿ ಕಡಿದಿರುವ ಶಂಕೆ ವ್ಯಕ್ತವಾಗಿತ್ತು. ಮಂಗಳವಾರ ಸಂಜೆ ಹಸು ನಾಯಿಯಂತೆ ವಿಚಿತ್ರವಾಗಿ ಕೂಗುತ್ತಾ (ಬೊಗಳುತ್ತಾ) ಅಸಹಜ ವರ್ತನೆ ತೋರಿ ಸಾವನ್ನಪ್ಪಿದೆ. ಪಶುವೈದ್ಯರು ಕೂಡ ರೇಬಿಸ್ ಸೋಂಕಿನ ಸಾಧ್ಯತೆಯನ್ನು ದೃಢಪಡಿಸಿದ್ದರಿಂದ, ಆ ಹಾಲಿನಿಂದ ಮಾಡಿದ ತೀರ್ಥ ಸೇವಿಸಿದವರಲ್ಲಿ ಆತಂಕ ಮುಗಿಲು ಮುಟ್ಟಿತು.
ಗ್ರಾಮದಲ್ಲೇ ವಿಶೇಷ ಲಸಿಕಾ ಶಿಬಿರ:
ಘಟನೆಯಿಂದ ಗಾಬರಿಗೊಂಡ ದಾಡಿ ಖಾಸ್ ಹಾಗೂ ಗೋವಿಂದಪುರ ಗ್ರಾಮಗಳ ನೂರಾರು ನಿವಾಸಿಗಳು ತಕ್ಷಣವೇ ಸಮುದಾಯ ಆರೋಗ್ಯ ಕೇಂದ್ರಕ್ಕೆ ಧಾವಿಸಿದ್ದಾರೆ. ಮಂಗಳವಾರ ಸುಮಾರು 50 ಮಂದಿ ಆಸ್ಪತ್ರೆಗೆ ಬಂದು ರೇಬಿಸ್ ನಿರೋಧಕ ಇಂಜೆಕ್ಷನ್ ಚುಚ್ಚಿಸಿಕೊಂಡಿದ್ದರು. ಪರಿಸ್ಥಿತಿಯ ಗಂಭೀರತೆ ಅರಿತ ಆರೋಗ್ಯ ಇಲಾಖೆಯು ಬುಧವಾರ ದಾಡಿ ಖಾಸ್ ಗ್ರಾಮದಲ್ಲೇ ತುರ್ತು ಲಸಿಕಾ ಶಿಬಿರ ಆಯೋಜಿಸಿದ್ದು, ಒಂದೇ ದಿನ 400 ಮಂದಿಗೆ ಲಸಿಕೆ ನೀಡಲಾಗಿದೆ. ಒಟ್ಟಾರೆಯಾಗಿ 450ಕ್ಕೂ ಅಧಿಕ ಮಂದಿಗೆ ಮುನ್ನೆಚ್ಚರಿಕೆಯಾಗಿ ಲಸಿಕೆ ನೀಡಲಾಗಿದೆ.
ಆತಂಕ ಬೇಡ ಎಂದ ಆರೋಗ್ಯಾಧಿಕಾರಿಗಳು:
ಈ ಕುರಿತು ಪ್ರತಿಕ್ರಿಯಿಸಿರುವ ಗೋರಖ್‌ಪುರ ಉಪ ಮುಖ್ಯ ವೈದ್ಯಾಧಿಕಾರಿ (ಡೆಪ್ಯುಟಿ ಸಿಎಂಒ) ಡಾ. ರಾಜೇಶ್ ಕುಮಾರ್, "ಮೊಸರು ಹಾಗೂ ಚರಣಾಮೃತ ತಯಾರಿಸುವ ಮುನ್ನ ಹಾಲನ್ನು ಚೆನ್ನಾಗಿ ಕುದಿಸಲಾಗಿತ್ತು. ಹೀಗಾಗಿ ರೋಗ ಹರಡುವ ಸಾಧ್ಯತೆ ತೀರಾ ಕಡಿಮೆ ಇದ್ದು, ಸಾರ್ವಜನಿಕರು ಆತಂಕ ಪಡುವ ಅಗತ್ಯವಿಲ್ಲ. ಆದಾಗ್ಯೂ, ಗ್ರಾಮಸ್ಥರ ಮಾನಸಿಕ ನೆಮ್ಮದಿ ಹಾಗೂ ಸುರಕ್ಷತೆಯ ದೃಷ್ಟಿಯಿಂದ ಮುನ್ನೆಚ್ಚರಿಕೆಯಾಗಿ ಎಲ್ಲರಿಗೂ ಆ್ಯಂಟಿ-ರೇಬಿಸ್ ಲಸಿಕೆ ನೀಡಲಾಗಿದೆ" ಎಂದು ಸ್ಪಷ್ಟಪಡಿಸಿದ್ದಾರೆ. ವೈದ್ಯರ ಸಲಹೆಯಂತೆ ಅಗತ್ಯವಿರುವವರು ಮುಂದಿನ ಡೋಸ್‌ಗಳನ್ನು ತಪ್ಪದೇ ಪಡೆಯುವಂತೆ ಸೂಚಿಸಲಾಗಿದೆ.
