ಪಾಟ್ನಾ:
ಅನಾರೋಗ್ಯದಿಂದ ಬಳಲುತ್ತಿದ್ದ ತನ್ನ ತಾಯಿಯ ಚೇತರಿಕೆಗಾಗಿ ಶಿವನಲ್ಲಿ ಪ್ರಾರ್ಥಿಸಿ ಮಾಡಿಕೊಂಡ ಹರಕೆಯನ್ನು ತೀರಿಸಲು ಬಿಹಾರದ 19 ವರ್ಷದ ಯುವಕನೊಬ್ಬ ಭಾರತದಾದ್ಯಂತ ಓಡುತ್ತಲೇ 12 ಜ್ಯೋತಿರ್ಲಿಂಗಗಳ ಪಾದಯಾತ್ರೆ ಕೈಗೊಂಡಿದ್ದಾನೆ. ದಿನಕ್ಕೆ ಬರೋಬ್ಬರಿ 50 ಕಿಲೋಮೀಟರ್ ಓಡುವ ಮೂಲಕ ಈತ ಇಂಟರ್ನೆಟ್ ಲೋಕದಲ್ಲಿ ಆಧುನಿಕ ಶ್ರವಣಕುಮಾರ ಎಂದೇ ಖ್ಯಾತಿ ಗಳಿಸುತ್ತಿದ್ದಾನೆ.
ಬಿಹಾರದ ಅರೇರಿಯಾ ಜಿಲ್ಲೆಯ ಮೋನು ಮೆತುರ್‌ಬಾಲಾ (Monu Meturbala) ಈ ಅಸಾಧಾರಣ ಸಂಕಲ್ಪ ತೊಟ್ಟ ಯುವಕ.
ತಾಯಿಯ ಕಾಯಿಲೆ ಮತ್ತು ಶಿವನಿಗೆ ಹೊತ್ತ ಹರಕೆ:
ಕೆಲ ತಿಂಗಳ ಹಿಂದೆ ಮೋನು ಅವರ ತಾಯಿ ಗಂಭೀರ ಕಾಯಿಲೆಯಿಂದ ಬಳಲುತ್ತಿದ್ದರು. ಆ ಸಂಕಷ್ಟದ ಸಮಯದಲ್ಲಿ ತಾಯಿಯ ಪ್ರಾಣ ಉಳಿಸಿಕೊಡುವಂತೆ ಭಗವಾನ್ ಶಿವನಲ್ಲಿ ಕಣ್ಣೀರಿಟ್ಟು ಪ್ರಾರ್ಥಿಸಿದ್ದ ಮೋನು, "ತಾಯಿ ಗುಣಮುಖಳಾದರೆ ದೇಶದ ಎಲ್ಲಾ 12 ಜ್ಯೋತಿರ್ಲಿಂಗಗಳ ದರ್ಶನ ಪಡೆಯುತ್ತೇನೆ" ಎಂದು ಹರಕೆ ಹೊತ್ತಿದ್ದರು.
ಅದರಂತೆ ತಾಯಿಯ ಆರೋಗ್ಯ ಸುಧಾರಿಸುತ್ತಿದ್ದಂತೆಯೇ, ನೀಡಿದ ಮಾತನ್ನು ಉಳಿಸಿಕೊಳ್ಳಲು ಈ ವರ್ಷದ ಮಾರ್ಚ್ 15 ರಂದು ತಮ್ಮ ಸುದೀರ್ಘ ಯಾತ್ರೆಯನ್ನು ಆರಂಭಿಸಿದರು. ಯಾವುದೇ ವಾಹನಗಳನ್ನು ಬಳಸದೆ ಕಾಲ್ನಡಿಗೆ ಮತ್ತು ಓಟದ ಮೂಲಕವೇ ಈ ಕಠಿಣ ಪಯಣವನ್ನು ಮುಂದುವರಿಸಿದ್ದಾರೆ.
ಈವರೆಗೆ 8,000 ಕಿ.ಮೀ ಕ್ರಮಿಸಿ 5 ಜ್ಯೋತಿರ್ಲಿಂಗ ದರ್ಶನ:
ಮಾರ್ಚ್ 15 ರಿಂದ ಆರಂಭವಾದ ಈ ಸಾಹಸಮಯ ಯಾತ್ರೆಯಲ್ಲಿ ಮೋನು ಈಗಾಗಲೇ ಸುಮಾರು 8,000 ಕಿಲೋಮೀಟರ್ ದೂರವನ್ನು ಕ್ರಮಿಸಿದ್ದಾರೆ. ನಿತ್ಯವೂ ಸರಾಸರಿ 50 ಕಿ.ಮೀ ಓಡುತ್ತಿರುವ ಈತ, ಈವರೆಗೆ 5 ಜ್ಯೋತಿರ್ಲಿಂಗಗಳ ದರ್ಶನ ಪೂರ್ಣಗೊಳಿಸಿದ್ದು, ಇನ್ನೂ 7 ಜ್ಯೋತಿರ್ಲಿಂಗಗಳ ದರ್ಶನ ಬಾಕಿ ಇದೆ.
ಭಾರತದ ವಿಭಿನ್ನ ಹವಾಮಾನ, ಬೆಟ್ಟ-ಗುಡ್ಡ, ರಸ್ತೆ ಸವಾಲುಗಳನ್ನು ಲೆಕ್ಕಿಸದೆ ತನ್ನ ಇನ್‌ಸ್ಟಾಗ್ರಾಮ್ ಖಾತೆ (@monu_betaurabala) ಮೂಲಕ ಈ ಯಾತ್ರೆಯ ದೈನಂದಿನ ಅಪ್ಟೇಟ್‌ಗಳನ್ನು ಹಂಚಿಕೊಳ್ಳುತ್ತಿದ್ದಾರೆ.
ಆಧುನಿಕ ಶ್ರವಣಕುಮಾರನಿಗೆ ನೆಟ್ಟಿಗರ ಮೆಚ್ಚುಗೆ:
ಭಾರತೀಯ ಪುರಾಣಗಳಲ್ಲಿ ಹೆತ್ತ ತಂದೆ-ತಾಯಿಯ ಸೇವೆಗಾಗಿ ಸರ್ವಸ್ವವನ್ನೂ ತ್ಯಾಗ ಮಾಡಿದ ಶ್ರವಣಕುಮಾರನಿಗೆ ನೆಟ್ಟಿಗರು ಈತನನ್ನು ಹೋಲಿಸುತ್ತಿದ್ದಾರೆ. ತಾಯಿಯ ಮೇಲಿನ ಅಪಾರ ಪ್ರೀತಿ, ಕೃತಜ್ಞತೆ ಹಾಗೂ ಶಿವನ ಮೇಲಿನ ಭಕ್ತಿಯಿಂದ ಇಷ್ಟೊಂದು ಕಠಿಣ ಹರಕೆಯನ್ನು ತೀರಿಸಲು ಮುಂದಾಗಿರುವ ಮೋನು ಅವರ ದೃಢ ಸಂಕಲ್ಪಕ್ಕೆ ಸಾಮಾಜಿಕ ಜಾಲತಾಣಗಳಲ್ಲಿ ವ್ಯಾಪಕ ಪ್ರಶಂಸೆ ವ್ಯಕ್ತವಾಗುತ್ತಿದೆ.
