ಐದರ ಬಾಲಕನ ಹುಟ್ಟುಹಬ್ಬಕ್ಕೂ ಮುನ್ನವೇ ಇಡೀ ಕುಟುಂಬದ ಹತ್ಯೆ : ಸಮಾಧಿಯ ಮೇಲೆ ಬೊಂಬೆಗಳ ಉಡುಗೊರೆಗಳನ್ನಿಟ್ಟ ಅಜ್ಜ - ಅಜ್ಜಿ
Thursday, November 2, 2023
ನವದೆಹಲಿ: ಹಮಾಸ್ ಉಗ್ರರ ದಾಳಿಗೆ ಇಸ್ರೇಲ್ನಲ್ಲಿ ರಣಭೀಕರ ಪರಿಸ್ಥಿತಿ ಸೃಷ್ಟಿಗಿದ್ದು, ಅಲ್ಲಿನ ಪ್ರಕ್ಷುಬ್ಧ ವಾತಾವರಣ ಇನ್ನೂ ತಿಳಿಯಾಗಿಲ್ಲ. ಅಲ್ಲಿ ಮತ್ತೆ ಮತ್ತೆ ಗುಂಡಿನ ಮೊರೆತ ಕೇಳುತ್ತಿದ್ದು, ಜನರಲ್ಲಿ ಆತಂಕ ಮುಂದುವರಿದಿದೆ. ಈ ಮಧ್ಯೆ ಒಂದೊಂದೇ ದುರಂತಗಳು ಬಹಿರಂಗಗೊಳ್ಳುತ್ತಿವೆ.
ಹಮಾಸ್ ಉಗ್ರರ ದಾಳಿಯಿಂದಾಗಿ ನಲುಗಿರುವ ಇಸ್ರೇಲ್ ಜನತೆ ಎದುರಿಸಿದ ಭಯಾನಕತೆ, ಅನುಭವಿಸಿದ ನೋವು-ಯಾತನೆಗಳು ಒಂದೊಂದಾಗಿ ಬಯಲಾಗುತ್ತಿದೆ. ಮೊನ್ನೆ ಮೊನ್ನೆಯಷ್ಟೇ ಇಟಲಿಯ ಗಾಯಕಿಯೊಬ್ಬಳು ಇಲ್ಲಿಗೆ ಹಾಡಲು ಬಂದು ಹಮಾಸ್ ಉಗ್ರರ ಕೈಗೆ ಸಿಲುಕಿ ಭೀಕರವಾಗಿ ಹತ್ಯೆಯಾಗಿದ್ದಳು. ಇದೀಗ ಹಮಾಸ್ ಉಗ್ರರ ದಾಳಿಗೆ ನಲುಕಿದ ಕುಟುಂಬವೊಂದರ ಕರುಣಾಜನಕ ಸಂಗತಿಯೊಂದನ್ನು ಇಸ್ರೇಲ್ ತನ್ನ ಅಧಿಕೃತ ಎಕ್ಸ್ ಹ್ಯಾಂಡಲ್ನಲ್ಲಿ ಹಂಚಿಕೊಂಡಿದೆ. ಐಟನ್ ಎಂಬ ಐದು ವರ್ಷದ ಬಾಲಕ ತನ್ನ ಹುಟ್ಟುಹಬ್ಬದ ಮುನ್ನಾದಿನವೇ ತಂದೆ-ತಾಯಿ, ಸೋದರಿ ಸಹಿತ ಹಮಾಸ್ ಉಗ್ರರಿಂದ ಹತ್ಯೆಗೀಡಾದ ವಿಚಾರವನ್ನು ಇಸ್ರೇಲ್ ಹಂಚಿಕೊಂಡಿದೆ.
ಅ.8ರಂದು ಐಟನ್ನ ಬರ್ತ್ಡೇ. ಆ ಸಲುವಾಗಿ ಆತನ ಪಾಲಕರು ತಮ್ಮ ಪುತ್ರಿ-ಪುತ್ರನನ್ನು ಕರೆದುಕೊಂಡು ದಕ್ಷಿಣ ಇಸ್ರೇಲ್ನ ಪ್ರದೇಶಕ್ಕೆ ಕ್ಯಾಂಪಿಂಗ್ ಗೆ ಹೋಗಿದ್ದರು. ದುರದೃಷ್ಟವಶಾತ್ ಅ. 7ರಂದು ನಡೆದ ಹಮಾಸ್ ಉಗ್ರರ ದಾಳಿಗೆ ಈ ಕುಟುಂಬ ಸಿಲುಕಿದ್ದು, ಅವರು ಐಟನ್, ಆತನ ಏಳು ವರ್ಷದ ಸಹೋದರಿ ಹಾಗೂ ತಂದೆ-ತಾಯಿಯನ್ನು ಬರ್ಬರವಾಗಿ ಕೊಲೆ ಮಾಡಿದ್ದಾರೆ.
ಮೊಮ್ಮಗನ ಬರ್ತ್ಡೇಗೆಂದು ಅಜ್ಜ-ಅಜ್ಜಿ ತಂದಿಟ್ಟಿದ್ದ ಉಡುಗೊರೆಯ ಗೊಂಬೆಗಳನ್ನು ಬಳಿಕ ಆತನ ಸಮಾಧಿ ಮೇಲಿಟ್ಟ ಚಿತ್ರವನ್ನು ಇಸ್ರೇಲ್ ಹಂಚಿಕೊಂಡಿದ್ದು, ಹಮಾಸ್ ದಾಳಿಯ ಭೀಕರತೆ ಹಾಗೂ ಅದರಿಂದಾದ ದುರಂತವನ್ನು ಅನಾವರಣಗೊಳಿಸಿದೆ.