ಅಮೇರಿಕಾದಲ್ಲಿನ ರಸ್ತೆ ಅಪಘಾತಕ್ಕೆ ಮೂವರು ಭಾರತೀಯ ವಿದ್ಯಾರ್ಥಿಗಳು ಬಲಿ: ಐವರು ಗಂಭೀರವಾಗಿ ಗಾಯ

ವಿಜಯವಾಡ : ಅಮೆರಿಕಾದ ನ್ಯೂ ಹೆವೆನ್ ನಲ್ಲಿ ಸಂಭವಿಸಿರುವ ಭೀಕರ ಅಪಘಾತದಲ್ಲಿ ಭಾರತದ ಮೂವರು ವಿದ್ಯಾರ್ಥಿಗಳು ಸ್ಥಳದಲ್ಲೇ ಮೃತಪಟ್ಟು, ಐವರು ಗಂಭೀರವಾಗಿ ಗಾಯಗೊಂಡ ಘಟನೆ ಮಂಗಳವಾರ ನಡೆದಿದೆ.‌ 

ಆಂಧ್ರ ಪ್ರದೇಶ ಮತ್ತು ತೆಲಂಗಾಣ ಮೂಲದವರಾದ ಗೋಡ ಪ್ರೇಮ್ ಕುಮಾರ್ ರೆಡ್ಡಿ (26) , ಗುಲ್ಲಪೆಲ್ಲಿ ಪವಣಿ (22) , ಸಾಯಿ ನರಸಿಂಹ (23) ಮೃತಪಟ್ಟ ವಿದ್ಯಾರ್ಥಿಗಳೆಂದು ಗುರುತಿಸಲಾಗಿದೆ .

ಮಿನಿವ್ಯಾನ್ ಹಾಗೂ ಕಾರ್ ಮುಖಾಮುಖಿ ಢಿಕ್ಕಿಯಾಗಿ ಈ  ಅಪಘಾತ ಸಂಭವಿಸಿದೆ. ಮಿನಿವ್ಯಾನ್ ನಲ್ಲಿ 7 ಮಂದಿ ಹಾಗೂ ಕಾರಿನಲ್ಲಿ ಮೂವರು ಇದ್ದರು ಎನ್ನಲಾಗಿದೆ. ವಿದ್ಯಾರ್ಥಿಗಳು ಅಮೆರಿಕಾಅದ ನ್ಯೂಹೆವನ್ ವಿಶ್ವವಿದ್ಯಾಲಯದಲ್ಲಿ ಎಂಎಸ್ ವ್ಯಾಸಂಗ ಮಾಡುತ್ತಿದ್ದರು. ಮೂಲಗಳ ಪ್ರಕಾರ ದಟ್ಟ ಮಂಜು ಇದ್ದ ಕಾರಣ ಅಪಘಾತ ಸಂಭವಿಸಿದೆ. ಈ ವಿದ್ಯಾರ್ಥಿಗಳು ವಿಹಾರಕ್ಕೆ ತೆರಳಿ ಹಿಂದಿರುಗುತ್ತಿದ್ದರು ಎನ್ನಲಾಗಿದೆ. ಸದ್ಯ ಗಂಭೀರವಾಗಿ ಗಾಯಗೊಂಡ ವಿದ್ಯಾರ್ಥಿಗಳು ಚಿಕಿತ್ಸೆ ಪಡೆಯುತ್ತಿದ್ದಾರೆ.