ಪಶ್ಚಿಮ ಬಂಗಾಳದ ಕೆಲವು ಜಿಲ್ಲೆಗಳಲ್ಲಿ ಹಲವು ದಿನಗಳ ಕಾಲ ಇಂಟರ್ನೆಟ್ ಸಂಪರ್ಕ ಕಡಿತ: ಕಾರಣ ಏನು ಗೊತ್ತೇ?

ಕೋಲ್ಕತ: ಇಂಟರ್​ನೆಟ್​ ನೆಟ್ಟಗಿಲ್ಲದಿದ್ದರೆ ಯಾವುದೂ ಸರಿಯಿಲ್ಲ ಎಂದೆನಿಸುವುದು ಸಹಜ. ಇಂಟರ್ನೆಟ್ ಕೈಕೊಟ್ಟರೆ ಕೆಲವೇ ನಿಮಿಷಗಳಲ್ಲಿ ಆಗಬಹುದಾದ ಅದೆಷ್ಟೋ ಕೆಲಸಗಳು ಪೂರೈಸಲು ಗಂಟೆಗಟ್ಟಲೆ ಸಮಯ ಬೇಕಾಗಬಹುದು. ಅಂಥದ್ದೊಂದು ಪರಿಸ್ಥಿತಿಯನ್ನು ಪಶ್ಚಿಮ ಬಂಗಾಳದ ಏಳು ಜಿಲ್ಲೆಗಳ ಜನತೆ ಮುಂದಿನ ಕೆಲ ದಿನಗಳವರೆಗೆ ಎದುರಿಸಬೇಕಾಗುತ್ತದೆ. ಏಕೆಂದರೆ, ಈ ಜಿಲ್ಲೆಗಳಲ್ಲಿ ಇಂಟರ್​ನೆಟ್​ಗೆ ನಿರ್ಬಂಧ ಹೇರಿ ಪಶ್ಚಿಮ ಬಂಗಾಳದ ಗೃಹ ಸಚಿವಾಲಯದ ಹೆಚ್ಚುವರಿ ಮುಖ್ಯ ಕಾರ್ಯದರ್ಶಿ ಸುತ್ತೋಲೆಯೊಂದನ್ನು ಹೊರಡಿಸಿದ್ದಾರೆ. 

ಈ ಸುತ್ತೋಲೆಯ ಪ್ರಕಾರ ಪಶ್ಚಿಮ ಬಂಗಾಳದ ಜಿಲ್ಲೆಗಳಾದ ಮಲ್ದ, ಮುರ್ಷಿಬಾದ್, ಉತ್ತರ್ ದಿನಜ್​ಪುರ್, ಕೂಚ್​ಬೆಹರ್​, ಜಲ್ಪೈಗುರಿ, ಬಿರ್ಬುಹಂ ಮತ್ತು ದಾರ್ಜೀಲಿಂಗ್​ನ ಕೆಲವು ಬ್ಲಾಕ್​ಗಳಲ್ಲಿ ಮಾ. 7ರಿಂದ 9. ಮಾ. 11 ಮತ್ತು 12, ಮಾ. 15 ಮತ್ತು 16ರಂದು ಬೆಳಗ್ಗೆ 11ರಿಂದ ಮಧ್ಯಾಹ್ನ 3.15ರವರೆಗೂ ಇಂಟರ್​ನೆಟ್​ ಸೌಲಭ್ಯ ಸ್ಥಗಿತಗೊಂಡಿರಲಿದೆ. ಆದರೆ ವಾಯ್ಸ್​ ಕಾಲ್​, ಎಸ್​ಎಂಎಸ್​ ಹಾಗೂ ಪತ್ರಿಕೆಗಳಿಗೆ ನಿರ್ಬಂಧವಿಲ್ಲ. ಇಂಟರ್ನೆಟ್ ಬಳಸಿಕೊಂಡು ಕಾನೂನುಬಾಹಿರ ಚಟುವಟಿಕೆಗಳು ನಡೆಯಲಿವೆ ಎಂದು ಗುಪ್ತದಳ ಸರ್ಕಾರಕ್ಕೆ ಮಾಹಿತಿ ನೀಡಿರುವ ಹಿನ್ನೆಲೆಯಲ್ಲಿ ಮುಂಜಾಗ್ರತಾ ಕ್ರಮವಾಗಿ ಈ ನಿರ್ಬಂಧ ಹೇರಲಾಗಿದೆ ಎಂದು ಗೃಹ ಇಲಾಖೆಯ ಹೆಚ್ಚುವರಿ ಮುಖ್ಯ ಕಾರ್ಯದರ್ಶಿ ತಿಳಿಸಿದ್ದಾರೆ.