ಕೇವಲ 100 ರೂ.ಗೆ ನಡೆಯಿತು ಕೊಲೆ: ಸಿಮೆಂಟ್ ಬ್ಲಾಕ್ ನಿಂದ ಹೊಡೆದು ಸಹೋದ್ಯೋಗಿಯ ಹತ್ಯೆ

ಮುಂಬೈ: ಕೇವಲ 100 ರೂ. ವಿಚಾರಕ್ಕಾಗಿ ಶುರುವಾದ ಜಗಳವೊಂದು ಕೊಲೆಯಲ್ಲಿ ಅಂತ್ಯವಾಗಿರುವ ಘಟನೆ ಮಹಾರಾಷ್ಟ್ರದ ಮುಂಬೈನಲ್ಲಿ ನಡೆದಿದೆ. ಹತ್ಯೆಗೈದ ಆರೋಪಿಯನ್ನು ಬಂಧಿಸುವಲ್ಲಿ ಪೊಲೀಸರು ಯಶಸ್ವಿಯಾಗಿದ್ದಾರೆ.

ರಾಜಸ್ತಾನ ಮೂಲದ ಅರ್ಜುನ್ ಯಶ್ವಂತ್ ಸಿಂಗ್ ಮೃತಪಟ್ಟ ದುರ್ದೈವಿ. ಮನೋಜ್ ಕೊಲೆಗೈದ ಆರೋಪಿ.

ಅರ್ಜುನ್​ ಯಶ್ವಂತ್ ಸಿಂಗ್​ ಸಹೋದ್ಯೋಗಿ ಮನೋಜ್ ಎಂಬಾತನಿಂದ 100 ರೂ. ಸಾಲ ಪಡೆದಿದ್ದನು. ಇದೇ ವಿಚಾರವಾಗಿ ಗುರುವಾರ ರಾತ್ರಿ ಮದ್ಯಸೇವನೆ ಮಾಡಿರುವ ಮತ್ತಿನಲ್ಲಿ ಇಬ್ಬರ ಮಧ್ಯೆ ಜಗಳವಾಗಿದೆ. ಈ ವೇಳೆ ಸಿಮೆಂಟ್​ ಬ್ಲಾಕ್​​ನಿಂದ ತಲೆಗೆ ಹೊಡೆದು ಮನೋಜ್ ಸ್ಥಳದಿಂದ ಪರಾರಿಯಾಗಿದ್ದಾನೆ. ಸಿಮೆಂಟ್ ಬ್ಲಾಕ್ ನಿಂದ ಬಲವಾದ ಏಟು ಬಿದ್ದಿರುವುದರಿಂದ ಗಂಭೀರವಾಗಿ ಗಾಯಗೊಂಡ ಅರ್ಜುನ್​ ಯಶ್ವಂತ್ ಸಿಂಗ್​​ ಸಾವನ್ನಪ್ಪಿದ್ದಾನೆಂದು ಪೊಲೀಸರು ತಿಳಿಸಿದ್ದಾರೆ. ಆರೋಪಿಯನ್ನು ಬಂಧಿಸುವಲ್ಲಿ ವಿಪಿ ರೋಡ್ ಪೊಲೀಸರು ಯಶಸ್ವಿಯಾಗಿದ್ದಾರೆ. ಈ ಬಗ್ಗೆ ಪ್ರಕರಣ ದಾಖಲಿಸಿಕೊಂಡ ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ.