ಅಶ್ಲೀಲ ಜಾಲತಾಣ ಓನ್ಲಿ ಫ್ಯಾನ್ಸ್ ಗೆ ಸಿಇಒ ಹುದ್ದೆಗೆ ಭಾರತೀಯ ಮಹಿಳೆ ನೇಮಕ!
Friday, December 24, 2021
ನವದೆಹಲಿ: ಓನ್ಲಿ ಫ್ಯಾನ್ಸ್ ಎಂಬ ಕಂಪೆನಿಯು ತನ್ನ ನೂತನ ಸಿಇಒ ಹುದ್ದೆಗೆ ಭಾರತೀಯ ಮೂಲದ ಆಮ್ರಪಾಲಿ ಗ್ಯಾನ್ ಅವರನ್ನು ಆಯ್ಕೆ ಮಾಡಿದೆ. ಕಂಪೆನಿಯ ಸಂಸ್ಥಾಪಕ ಟೀಮ್ ಸ್ಟೋಕ್ಲಿ ತಮ್ಮ ಇತರೆ ಪ್ರಯತ್ನವನ್ನು ಮುಂದುವರಿಸುವ ಉದ್ದೇಶದಿಂದ ಸಿಇಒ ಸ್ಥಾನದಿಂದ ಕೆಳಗಿಳಿದ ಬಳಿಕ ಆ ಸ್ಥಾನಕ್ಕೆ ಮುಂಬೈ ಮೂಲದ ಆಮ್ರಪಾಲಿ ಗ್ಯಾನ್ ಅವರನ್ನು ಆಯ್ಕೆ ಮಾಡಲಾಗಿದೆ.
ಆಮ್ರಪಾಲಿಯನ್ನು ಸಿಇಒ ಹುದ್ದೆಗೆ ಘೋಷಣೆ ಮಾಡಿದಾಗಿನಿಂದ ಆಕೆ ಯಾರು? ಆಕೆಯ ಹಿನ್ನೆಲೆ ಏನು? ಹಾಗೂ ಭಾರತಕ್ಕೂ ಅವರಿಗೂ ಇರುವ ಸಂಬಂಧವೇನು? ಎಂಬ ಪ್ರಶ್ನೆಗಳು ಸಾಮಾಜಿಕ ಜಾಲತಾಣದಲ್ಲಿ ಹರಿದಾಡ ತೊಡಗಿವೆ. ಆಮ್ರಪಾಲಿಯವರ ಈ ಹೊಸ ಹುದ್ದೆಯೊಂದಿಗೆ ವಿದೇಶಿ ಕಂಪೆನಿಗಳಲ್ಲಿ ಸಿಇಒ ಸ್ಥಾನವನ್ನು ಅಲಂಕರಿಸಿರುವ ಭಾರತೀಯರು ದೀರ್ಘ ಪಟ್ಟಿಗೆ ಕೂಡ ಸೇರಿಕೊಂಡಿದ್ದಾರೆ. ಸುಂದರ್ ಪಿಚೈ, ಸತ್ಯ ನಾದೆಲ್ಲ, ಇಂದ್ರಾ ನೂಯಿ, ಅರವಿಂದ್ ಕೃಷ್ಣ ಮತ್ತು ಇತ್ತೀಚೆಗಷ್ಟೇ ಟ್ವಿಟರ್ ಸಿಇಒ ಆಗಿ ನೇಮಕವಾದ ಪರಾಗ್ ಅಗರವಾಲ್ ಮುಂತಾದವರ ಸಾಲಿಗೆ ಇದೀಗ ಆಮ್ರಪಾಲಿ ಸೇರ್ಪಡೆಗೊಂಡಿದ್ದಾರೆ. ಈ ಮೂಲಕ ವಿದೇಶಿ ಕಂಪೆನಿಗಳಲ್ಲಿ ಬಹುತೇಕ ಭಾರತೀಯರದ್ದೇ ಕಾರುಬಾರು ಎಂಬುದು ಮತ್ತೊಮ್ಮೆ ಸಾಬೀತಾಗಿದೆ.
ಅದರಲ್ಲೂ ಓನ್ಲಿ ಫ್ಯಾನ್ಸ್ ಎಂಬ ಕಂಪೆನಿಗೆ ಸಿಇಒ ಆಗಿ ಓರ್ವ ಮಹಿಳೆಯನ್ನು ಆಯ್ಕೆ ಮಾಡಿರುವುದು ಹೊಸ ಅಲೆಗೆ ನಾಂದಿಯಾದಂತಾಗಿದೆ. ಏಕೆಂದರೆ ಓನ್ಲಿ ಫ್ಯಾನ್ಸ್ ಎಂಬುದು ಒಂದು ಸಾಮಾನ್ಯ ಕಂಪೆನಿಯಲ್ಲ. ಅದೊಂದು ಅಶ್ಲೀಲ ಚಿತ್ರ ಹಾಗೂ ವೀಡಿಯೋಗಳ ಜಾಲತಾಣ ಎಂಬುದು ಗಮನಾರ್ಹ ವಿಚಾರ. ಇದು ಚಂದಾದಾರ ಆಧಾರಿತ ಅಶ್ಲೀಲ ವಿಡಿಯೋ ಹಾಗೂ ಫೋಟೋಗಳನ್ನು ಖರೀದಿಸುವ ಜಾಲತಾಣವಾಗಿದೆ. ಈ ಸಾಮಾಜಿಕ ಜಾಲತಾಣವನ್ನು 2016ರಲ್ಲಿ ಲಾಂಚ್ ಮಾಡಲಾಯಿತು. ಈಗ ಈ ಕಂಪನಿಗೆ ಓರ್ವ ಭಾರತೀಯಳು ಆಯ್ಕೆ ಆಗಿರುವುದು ನಿಜಕ್ಕೂ ಅಚ್ಚರಿಯ ಸಂಗತಿಯಾಗಿದೆ.
ಹಾಗಾದ್ರೆ ಆಮ್ರಪಾಲಿ ಗ್ಯಾನ್ ಯಾರು ಎಂಬುದು ಮೊದಲು ತಿಳಿಯಬೇಕಾಗಿದೆ. ಈಕೆ ಮುಂಬೈ ಮೂಲದವರಾಗಿದ್ದು, ಹೊರತುಪಡಿಸಿದರೆ, ಆಕೆಯ ವೈಯುಕ್ತಿಕ ದಾಖಲೆಗಳಲ್ಲಿ ದೇಶದ ಬಗ್ಗೆ ಕಡಿಮೆ ಉಲ್ಲೇಖವಿದೆ. ಅವರ ಆರಂಭಿಕ ಮತ್ತು ಉನ್ನತ ಶಿಕ್ಷಣವು ಯುಎಸ್ನ ಕ್ಯಾಲಿಫೋರ್ನಿಯಾದಲ್ಲಿ ಆಗಿದೆ. ಕ್ಯಾಲಿಫೋರ್ನಿಯಾ ಅವರ ಖಾಯಂ ನಿವಾಸವೂ ಆಗಿದೆ. ಹೀಗಾಗಿ ಆಕೆ ಭಾರತದವಳಾದರೂ ತವರಿನೊಂದಿಗೆ ಸಂಪರ್ಕ ಕಡಿಮೆ ಇಟ್ಟುಕೊಂಡಿದ್ದಾರೆ. ಆಮ್ರಪಾಲಿ ಎಫ್ಐಡಿಎಂನಿಂದ ಮರ್ಚಂಡೈಸ್ ಮಾರ್ಕೆಟಿಂಗ್‌ನಲ್ಲಿ ಅಸೋಸಿಯೇಟ್ ಆಫ್ ಆರ್ಟ್ಸ್ ಪದವಿ, ಕ್ಯಾಲಿಫೋರ್ನಿಯಾ ಸ್ಟೇಟ್ ಯೂನಿವರ್ಸಿಟಿಯಿಂದ ಪಿಆರ್ ಮತ್ತು ಸಾಂಸ್ಥಿಕ ಸಂವಹನದಲ್ಲಿ ಬ್ಯಾಚುಲರ್ ಆಫ್ ಆರ್ಟ್ಸ್ ಮತ್ತು ಹಾರ್ವರ್ಡ್ ಬಿಸಿನೆಸ್ ಸ್ಕೂಲ್ ಆನ್‌ಲೈನ್‌ನಿಂದ ಉದ್ಯಮಶೀಲತೆಯ ಪ್ರಮಾಣಪತ್ರ ಸೇರಿದಂತೆ ಮೂರು ಪದವಿಗಳನ್ನು ಪಡೆದಿದ್ದಾರೆ.
36 ವರ್ಷ ವಯಸ್ಸಿನ, ಅವಿವಾಹಿತ ಮಹಿಳೆಯಾಗಿರುವ ಆಮ್ರಪಾಲೊ ಗ್ಯಾನ್ ಓನ್ಲಿ ಫ್ಯಾನ್ ಸಿಇಒ ಮಾತ್ರವಲ್ಲದೆ, ಕಳೆದ 4 ವರ್ಷಗಳಲ್ಲಿ ಆರ್ಕೆಡ್ ಏಜೆನ್ಸಿಗೆ ಸಮಾಲೋಚಕರಾಗಿಯೂ ಕೆಲಸ ಮಾಡಿದ್ದಾರೆ. ಈ ಬಗ್ಗೆ ಅವರ ಲಿಂಕ್ಡಿನ್ ಪ್ರೊಫೈಲ್ ಹೇಳುತ್ತಿದೆ. ಸಿಇಒ ಆಗಿ ಆಯ್ಕೆ ಆಗುವ ಮೊದಲು ಓನ್ಲಿ ಫ್ಯಾನ್ಸ್ ಕಂಪನಿಯಲ್ಲಿ ಮಾರ್ಕೆಟಿಂಗ್ ಹಾಗಯ ಸಂವಹನ ಅಧಿಕಾರಿಯಾಗಿ 2020ರಿಂದಲೂ ಸೇವೆ ಸಲ್ಲಿಸಿದ್ದಾರೆ. ಅದಕ್ಕೂ ಮುನ್ನ ಯುಎಸ್ನ ಕನ್ನಾಬಿಸ್ ರೆಸ್ಟೋರೆಂಟ್ನ ಕೆನ್ನಾಬಿಸ್ ಕೆಫೆಯಲ್ಲಿ ಮಾರ್ಕೆಟಿಂಗ್ ಮತ್ತು ಪಬ್ಲಿಷಿಟಿಯ ಉಪಾಧ್ಯಕ್ಷರಾಗಿ ಒಂದು ವರ್ಷಗಳ ಕಾಲ ಸೇವೆ ಸಲ್ಲಿಸಿದ್ದಾರೆ. ಅಲ್ಲದೆ, ಲೋವೆಲ್ ಹರ್ಬ್ ಕಂಪನಿಯಲ್ಲಿ ಸಂವಹನ ನಿರ್ದೇಶಕರಾಗಿ ಒಂದು ವರ್ಷಕ್ಕಿಂತ ಕಡಿಮೆ ಕಾಲ ಕೆಲಸ ಮಾಡಿದ್ದಾರೆ. ರೆಡ್ ಬುಲ್ ಮೀಡಿಯಾ ಹೌಸ್ನಲ್ಲಿ ಬ್ರ್ಯಾಂಡ್ ಆ್ಯಕ್ಟಿವೇಶನ್ ಮತ್ತು ಕಮ್ಯುನಿಕೇಷನ್ ಮ್ಯಾನೇಜರ್ ಆಗಿ ಸುಮಾರು 2 ವರ್ಷ ಸೇವೆ ಸಲ್ಲಿಸಿದ್ದಾರೆ. ಅದಕ್ಕೂ ಮುನ್ನ ಕೆಲವು ಸ್ಟಾರ್ಟಪ್ಸ್ ಕಂಪನಿಗಳಲ್ಲಿ 2008 ರಿಂದ 2016ರವರೆಗೆ ಮಾರ್ಕೆಟಿಂಗ್ ವಿಭಾಗದಲ್ಲಿ ಕೆಲಸ ಮಾಡಿದ್ದಾರೆ.
ಆಮ್ರಪಾಲಿಯವರು ಓನ್ಲಿ ಫ್ಯಾನ್ಸ್ ಅಕೌಂಟ್ ಹೊಂದಿದ್ದು, ಅದರಲ್ಲಿ ತಮ್ಮ ವೈಯುಕ್ತಿಕ ಹಾಗೂ ವೃತ್ತಿ ಜೀವನದ ವಿಚಾರಗಳನ್ನು ಹಂಚಿಕೊಳ್ಳುತ್ತಿರುತ್ತಾರೆ. ಆದರೆ, ಈ ಖಾತೆ ಹೆಚ್ಚು ಸಕ್ರಿಯವಾಗಿರುವಂತೆ ಕಾಣುತ್ತಿಲ್ಲ. ಸದ್ಯ ಆಕೆ ತಮ್ಮ ಸಂಬಳ ಅಥವಾ ಇನ್ನಿತರ ಮಾಹಿತಿಗಳನ್ನು ಹಂಚಿಕೊಂಡಿಲ್ಲ. ಮುಂದಿನ ದಿನಗಳಲ್ಲಿ ತಮ್ಮ ಓನ್ಲಿ ಫ್ಯಾನ್ ಖಾತೆಯಲ್ಲಿ ಅಭಿಮಾನಿಗಳೊಂದಿಗೆ ಮತ್ತಷ್ಟು ಮಾಹಿತಿಯನ್ನು ಹಂಚಿಕೊಳ್ಳಲಿದ್ದಾರೆ ಎಂದು ಹೇಳಲಾಗುತ್ತಿದೆ.