ಪತಿಗೆ ಡೈವೊರ್ಸ್ ನೀಡಿ ಶ್ವಾನದೊಂದಿಗೆ ವಿವಾಹವಾದ ಮಹಿಳೆ: ವಿಚಿತ್ರವೆನಿಸಿದರೂ ಸತ್ಯ ಘಟನೆ

ಲಂಡನ್​: ಮದುವೆ ಅನ್ನೋದು ಜೀವನದಲ್ಲಿ ಒಂದು ಬಾರಿ ಆಗುವ ಘಟನೆ.  ಆದ್ದರಿಂದ ಪ್ರತಿಯೊಬ್ಬರಿಗೂ ತಮ್ಮ ಮದುವೆಯ ಬಗ್ಗೆ ನೂರಾರು ಕನಸುಗಳಿರುತ್ತದೆ. ತನ್ನನ್ನು ಮದುವೆಯಾಗುವ ಗಂಡು ಹಾಗಿರಬೇಕು ಹೀಗಿರಬೇಕು ಎಂದು ಯುವಕ-ಯುವತಿಯರಲ್ಲಿ ಅವರದ್ದೇ ಆದ ಬಯಕೆಗಳಿರುತ್ತವೆ. ಆದರೆ ಇಲ್ಲೊಬ್ಬ ಮಹಿಳೆ ತಾನು ಕಟ್ಕೊಂಡ ಗಂಡನಿಗೇ ಡೈವೋರ್ಸ್ ಕೊಟ್ಟು ತಾನು ಸಾಕಿರುವ ಶ್ವಾನವನ್ನೇ ವಿವಾಹವಾಗಿದ್ದಾಳೆ.

ಹೌದು, ಈ ಘಟನೆಯನ್ನು ನೋಡುವಾಗ ವಿಚಿತ್ರ ಎನ್ನಿಸಿದರೂ ಇದು ಸತ್ಯ ಘಟನೆ. ಇಂತಹ ವಿಚಿತ್ರ ಮದುವೆ ನಡೆದಿರೋದು ಲಂಡನ್​ನ ಕ್ರಯೋಷಿಯಾದಲ್ಲಿ. ಶ್ವಾನವನ್ನೇ ವರಿಸಿರುವ ಮಹಿಳೆ ಹೆಸರು ಅಮಂಡಾ ರಾಡ್ಜರ್ಸ್​.  ಇದಕ್ಕೂ ಮೊದಲು ವ್ಯಕ್ತಿಯೊಬ್ಬರ ಜತೆ ಅಮಂಡಾ ರಾಡ್ಜರ್ಸ್​  ವಿವಾಹವಾಗಿತ್ತು. ಆದರೆ ಇದೀಗ ಆಕೆ ಪತಿಗೆ ಡೈವೋರ್ಸ್​ ನೀಡಿ ತನ್ನ ಸಾಕು ನಾಯಿಯೊಂದಿಗೆ ಕ್ರೈಸ್ತ ಸಂಪ್ರದಾಯದಂತೆ ಅದ್ದೂರಿಯಾಗಿ ಮದುವೆ ಮಾಡಿಕೊಂಡಿದ್ದಾಳೆ.

ತಮ್ಮ ಸಂಬಂಧಿಕರು, ಸ್ನೇಹಿತರನ್ನೂ ಮದುವೆಗೆ ಆಹ್ವಾನಿಸಿದ್ದಳು. 200ಕ್ಕೂ ಅಧಿಕ ಮಂದಿ ಈಕೆ ಹಿತೈಷಿಗಳು ಈ ಮದುವೆಯಲ್ಲಿ ಪಾಲ್ಗೊಂಡು ಮಹಿಳೆ ಮತ್ತು ನಾಯಿಗೆ ಶುಭಕೋರಿದ್ದಾರೆ.  

ಶ್ವಾನದೊಂದಿಗೆ ವಿವಾಹವಾಗಿರುವ ಬಗ್ಗೆ ಪ್ರತಿಕ್ರಿಯಿಸಿರುವ ಅಮಂಡಾ ರಾಡ್ಜರ್ಸ್​, ನಾನು ನನ್ನ ಪತಿಯಿಂದ ನಿರೀಕ್ಷಿಸಿದ್ದನ್ನು ಪಡೆಯಲು ಸಾಧ್ಯವಾಗಲಿಲ್ಲ. ನನ್ನ ಮುದ್ದಿನ ನಾಯಿ ಶಬಾ ಯಾವಾಗಲೂ ನನ್ನ ಸಂತೋಷವನ್ನೇ ಬಯಸುತ್ತಿತ್ತು. ಆದ್ದರಿಂದ ನಾನು ಶಬಾನೊಂದಿಗೆ "ತನ್ನನ್ನು  ಮದುವೆಯಾಗುವೆಯಾ ಎಂದು ಕೇಳಿಕೊಂಡೆ. ಬಾಲ ಅಲ್ಲಾಡಿಸಿ ಶ್ವಾನ ಒಪ್ಪಿಗೆ ಕೊಟ್ಟಿದೆ" ಎಂದಿದ್ದಾರೆ. 

ಒಟ್ಟಿನಲ್ಲಿ ಅಮಂಡಾ ರಾಡ್ಜರ್ಸ್​ ಶ್ವಾನದೊಂದಿಗೆ ಮದುವೆ ಆಗುವ ಮೂಲಕ ಜಗತ್ತಿನ ಗಮನ ಸೆಳೆದಿದ್ದಾರೆ.