ಬೋಸ್ಟನ್/ಹೈದರಾಬಾದ್:
ಉನ್ನತ ವ್ಯಾಸಂಗಕ್ಕಾಗಿ ಅಮೆರಿಕಕ್ಕೆ ತೆರಳಿದ್ದ ತೆಲಂಗಾಣ ಮೂಲದ 23 ವರ್ಷದ ವಿದ್ಯಾರ್ಥಿನಿಯೊಬ್ಬರು ಬೋಸ್ಟನ್‌ನಲ್ಲಿ ಸಂಜೆ ವಾಕಿಂಗ್ ತೆರಳಿದವರು ನಿಗೂಢವಾಗಿ ನಾಪತ್ತೆಯಾಗಿದ್ದಾರೆ. ಕಳೆದ ಐದು ದಿನಗಳಿಂದ ಆಕೆಯ ಮೊಬೈಲ್ ಫೋನ್ ಕೂಡ ಸ್ವಿಚ್ ಆಫ್ ಆಗಿದ್ದು, ಆಕೆಯ ಕುಟುಂಬ ಕಣ್ಣೀರಿನಲ್ಲಿ ಕೈತೊಳೆಯುತ್ತಾ ಭಾರತ ಸರ್ಕಾರದ ನೆರವಿಗೆ ಮೊರೆಹೋಗಿದೆ.
ತೆಲಂಗಾಣದ ನಲ್ಗೊಂಡ ಜಿಲ್ಲೆಯ ಕನಗಲ್ ಮಂಡಲದ ಶಬ್ದುಲ್ಲಾಪುರಂ ಗ್ರಾಮದ ನಿವಾಸಿ ಶ್ರೀಜಾ ರೆಡ್ಡಿ ಕೊಯ್ಯ (23) ನಾಪತ್ತೆಯಾದ ಯುವತಿ. ಬೋಸ್ಟನ್‌ನ ಯುಮಾಸ್ (UMass Boston) ವಿಶ್ವವಿದ್ಯಾಲಯದಲ್ಲಿ ಉನ್ನತ ಶಿಕ್ಷಣ ಪಡೆಯುತ್ತಿದ್ದ ಈಕೆ, ಅರೆಕಾಲಿಕ ಉದ್ಯೋಗವನ್ನೂ (Part-time job) ಮಾಡಿಕೊಂಡಿದ್ದರು.
ವಾಕಿಂಗ್ ತೆರಳಿದ ಬಳಿಕ ನಾಪತ್ತೆ – ಮೊಬೈಲ್ ಸ್ವಿಚ್ ಆಫ್:
ನವೆಂಬರ್ 2ರಂದು ಕಾಲೇಜು ಮುಗಿಸಿ ತನ್ನ ಕೋಣೆಗೆ ವಾಪಸ್ಸಾಗಿದ್ದ ಶ್ರೀಜಾ, ಸಂಜೆ ವಾಕಿಂಗ್‌ಗೆಂದು ಹೊರಗೆ ತೆರಳಿದ್ದರು. ಸುಮಾರು 1 ಕಿಲೋಮೀಟರ್ ದೂರ ನಡೆದ ಬಳಿಕ ಆಕೆ ನಾಪತ್ತೆಯಾಗಿದ್ದು, ಅಂದಿನಿಂದ ಆಕೆಯ ಮೊಬೈಲ್ ಫೋನ್ ಸ್ವಿಚ್ ಆಫ್ ಆಗಿದೆ. ನವೆಂಬರ್ 3ರಂದು ಸ್ನೇಹಿತರು ಪೊಲೀಸರಿಗೆ ಮಾಹಿತಿ ನೀಡಿದ್ದು, ನವೆಂಬರ್ 4ರಂದು ಬೋಸ್ಟನ್ ಪೊಲೀಸ್ ಇಲಾಖೆಯು ಅಧಿಕೃತ ‘ಮಿಸ್ಸಿಂಗ್ ಪರ್ಸನ್’ (Missing Person Alert) ಪ್ರಕಟಣೆ ಹೊರಡಿಸಿ ಸಾರ್ವಜನಿಕರ ನೆರವು ಕೋರಿದೆ.
ಘಟನೆ ಕುರಿತು ಕಣ್ಣೀರಿಟ್ಟ ತಂದೆ ಕೊಯ್ಯ ಯಾದಗಿರಿ ರೆಡ್ಡಿ, "ದೊಡ್ಡ ಕನಸುಗಳನ್ನು ಹೊತ್ತು ಒಂದೂವರೆ ವರ್ಷದ ಹಿಂದೆ ಆಕೆ ಅಮೆರಿಕಕ್ಕೆ ತೆರಳಿದ್ದಳು. ಇತ್ತೀಚೆಗಷ್ಟೇ ಊರಿಗೆ ಬಂದು ಒಂದು ತಿಂಗಳು ನಮ್ಮ ಜೊತೆಯಲ್ಲಿದ್ದು ವಾಪಸ್ ಹೋಗಿದ್ದಳು. ಘಟನೆ ನಡೆದ ದಿನ ಸಂಜೆ ವಾಕಿಂಗ್ ಹೋಗಿದ್ದವಳು ನಾಪತ್ತೆಯಾಗಿದ್ದಾಳೆ. ಆಕೆಯ ಕೊನೆಯ ಲೊಕೇಶನ್ ಆಕೆಯ ಕೊಠಡಿಯಿಂದ ಕೇವಲ ಅರ್ಧ ಕಿಲೋಮೀಟರ್ ದೂರದಲ್ಲೇ ತೋರಿಸುತ್ತಿದೆ. ಆಕೆ ಕಾಣೆಯಾಗಿ 5 ದಿನಗಳು ಕಳೆದಿವೆ, ನಮಗೆ ಜೀವವೇ ಬಾಯಿಗೆ ಬಂದಂತಾಗಿದೆ" ಎಂದು ಗೋಳು ತೋಡಿಕೊಂಡಿದ್ದಾರೆ.
ಬೋಸ್ಟನ್ ಪೊಲೀಸರಿಂದ ಹುಡುಕಾಟ – ಸಾರ್ವಜನಿಕರ ನೆರವಿಗೆ ಮನವಿ:
ಬೋಸ್ಟನ್ ಪೊಲೀಸರ ಪ್ರಕಾರ, ಶ್ರೀಜಾ ರೆಡ್ಡಿ 5 ಅಡಿ 3 ಇಂಚಿನಿಂದ 5 ಅಡಿ 5 ಇಂಚು ಎತ್ತರವಿದ್ದು, ಕಪ್ಪು ಕೂದಲು ಮತ್ತು ಸ್ಲಿಮ್ ಮೈಕಟ್ಟು ಹೊಂದಿದ್ದಾರೆ. ಕೊನೆಯ ಬಾರಿಗೆ ಕಾಣಿಸಿಕೊಂಡಾಗ ಕಪ್ಪು ಬಣ್ಣದ ಜಾಕೆಟ್ ಮತ್ತು ನೀಲಿ ಜೀನ್ಸ್ ಧರಿಸಿದ್ದರು. ಆಕೆ ಕಾರ್ಸನ್ ಬೀಚ್ (Carson Beach) ಅಥವಾ ಹಾರ್ಬರ್ ಪಾಯಿಂಟ್ (Harbor Point) ಪ್ರದೇಶದಲ್ಲಿರುವ ಸಾಧ್ಯತೆ ಇದೆ ಎಂದು ಪೊಲೀಸರು ಶಂಕಿಸಿದ್ದಾರೆ.
ಆಕೆಯ ಬಗ್ಗೆ ಯಾವುದೇ ಮಾಹಿತಿ ದೊರೆತಲ್ಲಿ 911 ಅಥವಾ ಡಿಸ್ಟ್ರಿಕ್ಟ್ C-11 (ಡಾರ್ಚೆಸ್ಟರ್) ಡಿಟೆಕ್ಟಿವ್‌ಗಳನ್ನು (617) 343-4335 ಸಂಖ್ಯೆಗೆ ಸಂಪರ್ಕಿಸುವಂತೆ ಪೊಲೀಸರು ಸಾರ್ವಜನಿಕರಲ್ಲಿ ಮನವಿ ಮಾಡಿದ್ದಾರೆ.
ವಿದೇಶಾಂಗ ಇಲಾಖೆಯ ನೆರವು ಕೋರಿದ ಸಚಿವ ಕೋಮಟಿರೆಡ್ಡಿ ವೆಂಕಟರೆಡ್ಡಿ:
ಘಟನೆಯ ಬಗ್ಗೆ ತೀವ್ರ ಆತಂಕ ವ್ಯಕ್ತಪಡಿಸಿರುವ ತೆಲಂಗಾಣ ರಸ್ತೆ ಮತ್ತು ಕಟ್ಟಡಗಳ ಖಾತೆ ಸಚಿವ ಹಾಗೂ ನಲ್ಗೊಂಡ ಶಾಸಕ ಕೋಮಟಿರೆಡ್ಡಿ ವೆಂಕಟರೆಡ್ಡಿ, ಸಾಮಾಜಿಕ ಜಾಲತಾಣ 'ಎಕ್ಸ್'ನಲ್ಲಿ (ಟ್ವಿಟರ್) ಪೋಸ್ಟ್ ಮಾಡಿದ್ದಾರೆ.
ವಿದ್ಯಾರ್ಥಿನಿಯ ರಕ್ಷಣೆಗೆ ಭಾರತೀಯ ವಿದೇಶಾಂಗ ಸಚಿವಾಲಯ, ಬೋಸ್ಟನ್‌ನಲ್ಲಿರುವ ಭಾರತೀಯ ಕಾನ್ಸುಲೇಟ್ ಜನರಲ್ ಹಾಗೂ ಸ್ಥಳೀಯ ಬೋಸ್ಟನ್ ಪೊಲೀಸರ ತುರ್ತು ಹಸ್ತಕ್ಷೇಪವನ್ನು ಕೋರಿದ್ದಾರೆ. ಜೊತೆಗೆ ಉತ್ತರ ಅಮೆರಿಕದ ತೆಲುಗು ಸಂಘದ (TANA) ಸದಸ್ಯರನ್ನೂ ಸಂಪರ್ಕಿಸಿ ಹುಡುಕಾಟ ಕಾರ್ಯಾಚರಣೆಯನ್ನು ತೀವ್ರಗೊಳಿಸುವಂತೆ ಮನವಿ ಮಾಡಿದ್ದಾರೆ.
