ಮಂಗಳೂರು: ದಕ್ಷಿಣ ಕನ್ನಡ ಜಿಲ್ಲೆಯಲ್ಲಿ ಆಟೋರಿಕ್ಷಾಗಳ ನಂತರದ ಪ್ರತಿ ಕಿಲೋಮೀಟರ್ ಸಂಚಾರ ವೆಚ್ಚವನ್ನು ₹23ಕ್ಕೆ ಹೆಚ್ಚಿಸಿ ಪ್ರಾದೇಶಿಕ ಸಾರಿಗೆ ಪ್ರಾಧಿಕಾರವು ಹೊಸ ಪರಿಷ್ಕೃತ ಆದೇಶ ಹೊರಡಿಸಿದೆ. ಈ ಹಿಂದೆ ಆಗಸ್ಟ್ 28ರಂದು ಪ್ರಕಟಿಸಲಾಗಿದ್ದ ದರಪಟ್ಟಿಯನ್ನು ಹಿಂಪಡೆಯಲಾಗಿದ್ದು, ನವೀಕೃತ ಪ್ರಯಾಣ ದರಗಳು 2026ರ ನವೆಂಬರ್ 1ರಿಂದ ಅಧಿಕೃತವಾಗಿ ಜಾರಿಗೆ ಬರಲಿವೆ.
ಪ್ರಮುಖ ದರಗಳ ವಿವರ (01-11-2026 ರಿಂದ ಅನ್ವಯ):
- ನಂತರದ ಪ್ರತಿ ಕಿ.ಮೀ. ದರ: ₹23-00 (ಗರಿಷ್ಠ 3 ಜನ ಪ್ರಯಾಣಿಕರಿಗೆ ನಿಗದಿ).
- ಆರಂಭಿಕ ಕನಿಷ್ಠ ದರ: ಮೊದಲ 1.5 ಕಿ.ಮೀ. ಸಂಚಾರಕ್ಕೆ ₹40-00.
- ವೇಟಿಂಗ್ ಶುಲ್ಕ: ಮೊದಲ 10 ನಿಮಿಷ ಉಚಿತ ಸೇವೆ. ಆ ಬಳಿಕದ ಪ್ರತಿ 15 ನಿಮಿಷಕ್ಕೆ ಅಥವಾ ಅದರ ಅವಧಿಗೆ ₹5-00.
- ಸಾಮಾನು ಸರಕು (ಲಗೇಜ್) ದರ: ಪ್ರಯಾಣಿಕರ ಉಪಸ್ಥಿತಿ ಕಡ್ಡಾಯ. ಆರಂಭಿಕ 20 ಕೆ.ಜಿ.ವರೆಗೆ ಉಚಿತ. ನಂತರದ ಪ್ರತಿ 20 ಕೆ.ಜಿ. ಅಥವಾ ಅದರ ಭಾಗಕ್ಕೆ ₹5-00 ನಿಗದಿ.
- ರಾತ್ರಿ ಸಂಚಾರ ದರ: ರಾತ್ರಿ 10:00ರಿಂದ ಮುಂಜಾನೆ 05:00ರವರೆಗೆ ಮಾತ್ರ ನಿಗದಿತ ಸಾಮಾನ್ಯ ಮೊತ್ತದ ಒಂದೂವರೆ ಪಟ್ಟು (1.5 ಪಟ್ಟು) ಹಣ ಪಡೆಯಲು ಅವಕಾಶವಿದೆ.
ಮರು ಪರಿಷ್ಕರಣೆಗೆ ಕಾರಣವೇನು?
2022ರ ನವೆಂಬರ್ 23ರಂದು ನಿಗದಿಪಡಿಸಲಾಗಿದ್ದ ನಂತರದ ಪ್ರತಿ ಕಿ.ಮೀ.ಗೆ ₹20-00 ದರವನ್ನು ಈ ಹಿಂದಿನ ಆದೇಶದಲ್ಲಿ ತಾಂತ್ರಿಕವಾಗಿ ಪರಿಗಣಿಸಿರಲಿಲ್ಲ. ಈ ಹಿನ್ನೆಲೆಯಲ್ಲಿ ಆ ಆದೇಶವನ್ನು ರದ್ದುಪಡಿಸಿ, ಇದೀಗ ನಂತರದ ಪ್ರತಿ ಕಿ.ಮೀ.ಗೆ ₹23-00 ದರವನ್ನು ಸೇರ್ಪಡೆಗೊಳಿಸಿ ಮರು ಆದೇಶ ಪ್ರಕಟಿಸಲಾಗಿದೆ. ಸಿಎನ್‌ಜಿ, ಎಲ್‌ಪಿಜಿ, ಡೀಸೆಲ್ ಹಾಗೂ ವಾಹನಗಳ ಬಿಡಿಭಾಗಗಳ ದರ ಏರಿಕೆಯಿಂದಾಗಿ ಚಾಲಕರ ವೆಚ್ಚ ಹೆಚ್ಚಾಗಿದ್ದರೂ, ಸಾರ್ವಜನಿಕರ ಮೇಲಿನ ಆರ್ಥಿಕ ಹೊರೆ ಹಾಗೂ ಆಟೋ ಅವಲಂಬನೆಯನ್ನು ಗಮನದಲ್ಲಿಟ್ಟುಕೊಂಡು ಸಮತೋಲಿತ ದರ ನಿಗದಿಪಡಿಸಲಾಗಿದೆ.
ಮೀಟರ್ ಅಳವಡಿಕೆ ಹಾಗೂ ತಪಾಸಣೆ ಕಡ್ಡಾಯ:
- ಪ್ರತಿಯೊಬ್ಬ ಆಟೋ ಮಾಲಕರು ಹಾಗೂ ಚಾಲಕರು ತಮ್ಮ ವಾಹನಗಳ ಮೀಟರ್‌ಗಳನ್ನು ಹೊಸ ದರಪಟ್ಟಿಗೆ ತಕ್ಕಂತೆ ರಿಕ್ಯಾಲಿಬ್ರೇಶನ್ ಮತ್ತು ಸೀಲ್ ಮಾಡಿಸಿಕೊಳ್ಳುವುದು ಕಡ್ಡಾಯವಾಗಿದೆ.
- ಸಾರಿಗೆ ಪ್ರಾಧಿಕಾರ ನೀಡುವ ಪರಿಷ್ಕೃತ ದರಪಟ್ಟಿಯ ಕಾರ್ಡ್ ಅನ್ನು ಸಾರ್ವಜನಿಕರಿಗೆ ಕಾಣುವಂತೆ ವಾಹನದಲ್ಲಿ ಪ್ರದರ್ಶಿಸಬೇಕು.
- ನಿಗದಿತ ದರಕ್ಕಿಂತ ದುಬಾರಿ ಬಾಡಿಗೆ ವಸೂಲಿ ಮಾಡುವುದು ಅಥವಾ ಮೀಟರ್ ಹಾಕದೆ ನಿಯಮ ಉಲ್ಲಂಘಿಸುವುದು ಕಂಡುಬಂದರೆ ಅಂತಹವರ ಪರವಾನಗಿ ಅಮಾನತು, ರದ್ದು ಹಾಗೂ ಕಾನೂನು ರೀತ್ಯಾ ದಂಡ ವಿಧಿಸಲು ಪೊಲೀಸ್ ಹಾಗೂ ಆರ್‌ಟಿಒ ಇಲಾಖೆಗಳಿಗೆ ನಿರ್ದೇಶನ ನೀಡಲಾಗಿದೆ.
