ಮುಂಬೈ: ಬಹುಭಾಷಾ ತಾರೆ, ನಟ ಕಮಲ್ ಹಾಸನ್ ಪುತ್ರಿ ಶ್ರುತಿ ಹಾಸನ್ ತಮ್ಮ ವೈಯಕ್ತಿಕ ಬದುಕು ಹಾಗೂ ಆರೋಗ್ಯದ ಕುರಿತು ಮನಬಿಚ್ಚಿ ಮಾತನಾಡಿದ್ದಾರೆ. ಈ ಜನವರಿಗೆ 40ನೇ ವಸಂತಕ್ಕೆ ಕಾಲಿಟ್ಟಿರುವ ಅವರು, ತಮಗಿರುವ ಪಿಸಿಒಎಸ್ (Polycystic Ovary Syndrome) ಸಮಸ್ಯೆಯ ನಡುವೆಯೂ ಮುಂದೊಂದು ದಿನ ತಾಯ್ತನದ ಮಧುರ ಅನುಭವ ಪಡೆಯುವ ಹಂಬಲವನ್ನು ವ್ಯಕ್ತಪಡಿಸಿದ್ದಾರೆ.
ಸೋಹಾ ಅಲಿ ಖಾನ್ ಅವರ ಪಾಡ್ಕ್ಯಾಸ್ಟ್ನಲ್ಲಿ ಭಾಗವಹಿಸಿದ್ದ ಶ್ರುತಿ, ಹದಿಹರೆಯದಿಂದಲೂ ತಾಯ್ತನದ ಕುರಿತು ತಮಗಿದ್ದ ಆತಂಕ ಹಾಗೂ ವೈದ್ಯರೊಬ್ಬರು ನೀಡಿದ ಹೊಸ ಭರವಸೆಯ ಬಗ್ಗೆ ಅನುಭವಗಳನ್ನು ಹಂಚಿಕೊಂಡಿದ್ದಾರೆ.
14ನೇ ವಯಸ್ಸಿನಲ್ಲೇ ಎದುರಾಗಿದ್ದ ನಿರಾಶೆ:
"ನನಗೆ 14 ವರ್ಷ ವಯಸ್ಸಿದ್ದಾಗಲೇ ಪಿಸಿಒಎಸ್ ಸಮಸ್ಯೆ ಇರುವುದು ಪತ್ತೆಯಾಗಿತ್ತು. ಆ ಸಮಯದಲ್ಲಿ ವೈದ್ಯರು 'ಪಿಸಿಒಎಸ್ ಇದ್ದರೆ ಮಗು ಪಡೆಯುವುದು ತುಂಬಾ ಕಷ್ಟ, ಆ ಆಸೆಯನ್ನೇ ಬಿಟ್ಟುಬಿಡಿ' ಎಂದು ಹೇಳಿದ್ದರು. ಇದರಿಂದಾಗಿ ನಾನು ಮಾನಸಿಕವಾಗಿ ಕುಗ್ಗಿಹೋಗಿದ್ದೆ. ಮುಂದೊಂದು ದಿನ ಮಗುವನ್ನು ದತ್ತು ಪಡೆಯಬೇಕಾಗಬಹುದು ಎಂದೇ ಮಾನಸಿಕವಾಗಿ ಸಿದ್ಧವಾಗಿದ್ದೆ. ವಯಸ್ಸು 40 ದಾಟುತ್ತಿದ್ದಂತೆ ಸ್ತ್ರೀರೋಗ ತಜ್ಞರ ಬಳಿ ಹೋದಾಗ 'ಇನ್ನು ನಿನ್ನ ತಾಯ್ತನದ ಸಾಧ್ಯತೆಯ ಬಾಗಿಲು ಮುಚ್ಚಿಹೋಯಿತು' (ದುಕಾನ್ ಬಂದ್ ಹೋಗಯಾ) ಎಂದು ಹೇಳಬಹುದು ಎಂದೇ ಭಾವಿಸಿದ್ದೆ," ಎಂದು ಶ್ರುತಿ ವಿವರಿಸಿದ್ದಾರೆ.
ಧೈರ್ಯ ತುಂಬಿದ ಸ್ತ್ರೀರೋಗ ತಜ್ಞೆ:
ಆದರೆ, ಸ್ತ್ರೀರೋಗ ತಜ್ಞೆ ಡಾ. ಧೃಪ್ತಿ ದೇಧಿಯಾ ಅವರು ಶ್ರುತಿ ಅವರ ಆಲೋಚನೆಯನ್ನೇ ಬದಲಾಯಿಸಿದರು.
"ಡಾ. ಧೃಪ್ತಿ ಅವರು ಪಿಸಿಒಎಸ್ ಇದ್ದರೂ ಗರ್ಭಧರಿಸಲು ಹೇಗೆ ಸಾಧ್ಯ ಎಂಬುದನ್ನು ಅತ್ಯಂತ ಸುಲಭವಾಗಿ ಮತ್ತು ಧನಾತ್ಮಕವಾಗಿ ವಿವರಿಸಿದರು. 'ನಿನಗೆ ಮಗು ಬೇಕು ಎಂದಾದರೆ, ನೀನು ಯಾವಾಗ ಸಿದ್ಧಳಾಗುತ್ತೀಯೋ ಆಗ ನಾವು ಅದಕ್ಕೆ ದಾರಿ ಕಂಡುಕೊಳ್ಳೋಣ' ಎಂದು ಧೈರ್ಯ ತುಂಬಿದರು. ಹಾಲಿವುಡ್ ನಟಿ ಕ್ಯಾಮರೂನ್ ಡಯಾಜ್ 53ನೇ ವಯಸ್ಸಿನಲ್ಲಿ ಮೂರನೇ ಮಗುವಿಗೆ ಜನ್ಮ ನೀಡಿದ್ದನ್ನು ನೋಡಿದಾಗ ನನಗೂ ಭರವಸೆ ಮೂಡಿದೆ. ಇಂತಹ ಸಕಾರಾತ್ಮಕ ವೈದ್ಯರು ಸಿಕ್ಕಿರುವುದು ನನ್ನ ಪುಣ್ಯ," ಎಂದು ಶ್ರುತಿ ಹಾಸನ್ ಸಂತಸ ಹಂಚಿಕೊಂಡಿದ್ದಾರೆ.
ತಜ್ಞರು ಏನಂತಾರೆ?
ಪಿಸಿಒಎಸ್ ಸಮಸ್ಯೆಯು ಅಂಡೋತ್ಪತ್ತಿಯ (Ovulation) ಮೇಲೆ ಪರಿಣಾಮ ಬೀರುವುದರಿಂದ ನೈಸರ್ಗಿಕವಾಗಿ ಗರ್ಭಧರಿಸುವ ಪ್ರಕ್ರಿಯೆ ಸ್ವಲ್ಪ ನಿಧಾನ ಅಥವಾ ಸವಾಲಾಗಬಹುದೇ ವಿನಃ, ಮಗು ಪಡೆಯುವುದು ಅಸಾಧ್ಯವೇನಲ್ಲ ಎಂದು ಬಂಜೆತನ ನಿವಾರಣಾ ತಜ್ಞರು ಸ್ಪಷ್ಟಪಡಿಸುತ್ತಾರೆ. ಸರಿಯಾದ ಜೀವನಶೈಲಿ, ಪೌಷ್ಟಿಕ ಆಹಾರ ಹಾಗೂ ಸೂಕ್ತ ವೈದ್ಯಕೀಯ ಚಿಕಿತ್ಸೆಗಳ ಮೂಲಕ ಪಿಸಿಒಎಸ್ ಇರುವ ಮಹಿಳೆಯರೂ ಆರೋಗ್ಯಕರವಾಗಿ ತಾಯ್ತನದ ಅನುಭವ ಪಡೆಯಬಹುದು.
