ಸಿಂಗಲ್ ಯೂಸ್ ಪ್ಲಾಸ್ಟಿಕ್ ಮಾಲಿನ್ಯ ಇಡೀ ಪ್ರಪಂಚಕ್ಕೇ ದೊಡ್ಡ ಸವಾಲಾಗಿ ಪರಿಣಮಿಸಿರುವಾಗ, ಅದನ್ನೇ ಒಂದು ಯಶಸ್ವಿ ಉದ್ಯಮಾವಕಾಶವನ್ನಾಗಿ ಪರಿವರ್ತಿಸಿದ ಸಾಹಸಿ ಬೆಂಗಳೂರಿನ ವೈಭವ್ ಅನಂತ್. ನೈಸರ್ಗಿಕ ಪರಿಸರ ಸ್ನೇಹಿ ವಸ್ತುಗಳನ್ನು ಬಳಸಿ ಪ್ಲಾಸ್ಟಿಕ್ಗೆ ಪರ್ಯಾಯವಾಗಿ ಪ್ಯಾಕೇಜಿಂಗ್ ಉತ್ಪನ್ನಗಳನ್ನು ತಯಾರಿಸುವ 'ಬ್ಯಾಂಬ್ರೂ' (Bambrew) ಎಂಬ ಗ್ರೀನ್-ಟೆಕ್ ಸ್ಟಾರ್ಟ್ಅಪ್ ನಿರ್ಮಿಸಿ, ಇಂದು ಭಾರಿ ಯಶಸ್ಸು ಕಂಡಿದ್ದಾರೆ.
ಎನ್ಐಎಫ್ಟಿ ಪದವೀಧರನ ಗ್ರೀನ್ ಸಾಹಸ!
ಬೆಂಗಳೂರಿನ ನ್ಯಾಷನಲ್ ಇನ್ಸ್ಟಿಟ್ಯೂಟ್ ಆಫ್ ಫ್ಯಾಷನ್ ಟೆಕ್ನಾಲಜಿ (NIFT) ಪದವೀಧರರಾದ ವೈಭವ್ ಅನಂತ್ ಅವರು, 2018ರಲ್ಲಿ ಕೇಂದ್ರ ಸರ್ಕಾರವು ಸಿಂಗಲ್ ಯೂಸ್ ಪ್ಲಾಸ್ಟಿಕ್ ಬ್ಯಾನ್ ಮಾಡುವ ಕುರಿತು ಸೂಚನೆ ನೀಡಿದಾಗ ತಕ್ಷಣವೇ ಸ್ಪಂದಿಸಿದರು. ಪ್ಲಾಸ್ಟಿಕ್ನಿಂದ ಪರಿಸರಕ್ಕಾಗುವ ಹಾನಿಯನ್ನು ತಡೆಯಲು ತಮ್ಮ ಕೆಲಸಕ್ಕೆ ರಾಜೀನಾಮೆ ನೀಡಿ, ಅದೇ ವರ್ಷ ಆಗಸ್ಟ್ನಲ್ಲಿ 'ಬ್ಯಾಂಬ್ರೂ' ಸಂಸ್ಥೆಯನ್ನು ಸ್ಥಾಪಿಸಿದರು.
ಆರಂಭದಲ್ಲಿ ಪ್ಲಾಸ್ಟಿಕ್ ಸ್ಟ್ರಾಗಳಿಗೆ ಪರ್ಯಾಯವಾಗಿ ಬಿದಿರಿನ ಸ್ಟ್ರಾಗಳನ್ನು ತಯಾರಿಸಲು ಶುರುಮಾಡಿದ ಈ ಸಂಸ್ಥೆ, ತದನಂತರ ವಿಸ್ತರಿಸುತ್ತಾ ಇಂದು ಬಿದಿರು, ಮರದ ತಿರುಳು (Wood Pulp), ಕಬ್ಬಿನ ಜಲ್ಲೆ ಹಾಗೂ ಸಮುದ್ರದ ಕಳೆಗಳನ್ನು (Seaweed) ಬಳಸಿ ಸಂಪೂರ್ಣ ಬಯೋಡಿಗ್ರೇಡಬಲ್ ಹಾಗೂ ಪ್ಲಾಸ್ಟಿಕ್ ಮುಕ್ತ ಪ್ಯಾಕೇಜಿಂಗ್ ಉತ್ಪನ್ನಗಳನ್ನು ತಯಾರಿಸುತ್ತಿದೆ.
₹50 ಕೋಟಿ ವಾರ್ಷಿಕ ವಹಿವಾಟು ಹಾಗೂ ವಿಸ್ತರಣೆ
'ಸ್ಟಾರ್ಟ್ಅಪ್ ಇಂಟ್ರೋಸ್' ಪ್ರಕಾರ, 'ಬ್ಯಾಂಬ್ರೂ' ಸಂಸ್ಥೆಯು ಪ್ರಸ್ತುತ ಪ್ರತಿ ತಿಂಗಳಿಗೆ 3,000 ಟನ್ ಉತ್ಪಾದನಾ ಸಾಮರ್ಥ್ಯ ಹೊಂದಿರುವ ಅತ್ಯಾಧುನಿಕ ತಯಾರಿಕಾ ಘಟಕವನ್ನು ನಿರ್ವಹಿಸುತ್ತಿದೆ. 500ಕ್ಕೂ ಹೆಚ್ಚು ಪ್ರಮುಖ ಕಾಪೊರೇಟ್ ಕಂಪನಿಗಳಿಗೆ ಸರಬರಾಜು ಮಾಡುತ್ತಿರುವ ಈ ಸಂಸ್ಥೆಯು ವರ್ಷಕ್ಕೆ ಸುಮಾರು ₹50 ಕೋಟಿ ವಾರ್ಷಿಕ ಆದಾಯ (Revenue) ಈಟುತ್ತಿದೆ.
ಇತ್ತೀಚೆಗಷ್ಟೇ ಸೀರೀಸ್ A ಫಂಡಿಂಗ್ ಮೂಲಕ ₹60 ಕೋಟಿ ಸೇರಿದಂತೆ ಒಟ್ಟಾರೆಯಾಗಿ 12 ಮಿಲಿಯನ್ ಡಾಲರ್ಗೂ ಹೆಚ್ಚು ಹೂಡಿಕೆ ಬಂಡವಾಳವನ್ನು (Funding) ಆಕರ್ಷಿಸುವಲ್ಲಿ ವೈಭವ್ ಯಶಸ್ವಿಯಾಗಿದ್ದಾರೆ.
ಬ್ಯಾಂಬ್ರೂ ಸಾಧಿಸಿದ ಪರಿಸರ ಪ್ರಭಾವ (Environmental Impact):
- 10,000 ಟನ್ಗೂ ಹೆಚ್ಚು ಪ್ಲಾಸ್ಟಿಕ್ ಬಳಕೆಗೆ ತಡೆ ನೀಡಿದೆ.
- 10 ಲಕ್ಷಕ್ಕೂ ಹೆಚ್ಚು ಮರಗಳನ್ನು ಕತ್ತರಿಸುವುದರಿಂದ ಉಳಿಸಲಾಗಿದೆ.
- 25,000 ಟನ್ ಇಂಗಾಲದ ಡೈಆಕ್ಸೈಡ್ (CO2) ಹೊರಸೂಸುವಿಕೆಯನ್ನು ತಗ್ಗಿಸಲಾಗಿದೆ.
- 4.3 ಮಿಲಿಯನ್ kWh ವಿದ್ಯುತ್ ಹಾಗೂ 2.5 ಲಕ್ಷ ಬ್ಯಾರಲ್ ತೈಲದ ಬಳಕೆಯನ್ನು ಉಳಿಸಲಾಗಿದೆ.
ಕೇವಲ ಪರಿಸರ ಕಾಳಜಿಯಷ್ಟೇ ಅಲ್ಲದೆ, ವಾಣಿಜ್ಯಿಕವಾಗಿಯೂ ಯಶಸ್ವಿಯಾಗಬಹುದು ಎಂಬುದಕ್ಕೆ ಬೆಂಗಳೂರಿನ ವೈಭವ್ ಅನಂತ್ ಅವರ 'ಬ್ಯಾಂಬ್ರೂ' ಒಂದು ಅತ್ಯುತ್ತಮ ಉದಾಹರಣೆಯಾಗಿದೆ.
