‘ಎಂದೆಂದಿಗೂ ನೀನೇ ನನ್ನ ನೆಚ್ಚಿನ ಯೆಸ್’: ಕ್ಯೂಟ್ ವೀಡಿಯೋ ಮೂಲಕ ದಶಕದ ಪ್ರೀತಿ ನೆನೆದ ಸ್ಯಾಂಡಲ್ವುಡ್ ಕ್ಯೂಟ್ ಕಪಲ್!
ಬೆಂಗಳೂರು:
ಕನ್ನಡ ಚಿತ್ರರಂಗದ ಕ್ಯೂಟ್ ಹಾಗೂ ಆದರ್ಶ ಜೋಡಿ ಎಂದೇ ಪ್ರಸಿದ್ಧಿಯಾಗಿರುವ 'ರಾಕಿಂಗ್ ಸ್ಟಾರ್' ಯಶ್ ಹಾಗೂ ನಟಿ ರಾಧಿಕಾ ಪಂಡಿತ್ ತಮ್ಮ ನಿಶ್ಚಿತಾರ್ಥದ 10ನೇ ವರ್ಷದ ನೆನಪನ್ನು ಅತ್ಯಂತ ಸಂಭ್ರಮದಿಂದ ಆಚರಿಸಿದ್ದಾರೆ.
ಆಗಸ್ಟ್ 12, 2016 ರಂದು ಇಬ್ಬರ ಎಂಗೇಜ್ಮೆಂಟ್ ನಡೆದಿತ್ತು. ಇದೀಗ ದಶಕದ ನೆನಪಿಗಾಗಿ ರಾಧಿಕಾ ಪಂಡಿತ್ ಅವರು ತಮ್ಮ ನಿಶ್ಚಿತಾರ್ಥದ ಅಪರೂಪದ ಹಾಗೂ ಭಾವನಾತ್ಮಕ ವೀಡಿಯೋ ಒಂದನ್ನು ಇನ್ಸ್ಟಾಗ್ರಾಮ್ನಲ್ಲಿ ಹಂಚಿಕೊಂಡಿದ್ದಾರೆ.
"ನಮ್ಮ ನೆಚ್ಚಿನ ಕಥೆ ಇನ್ನು ಬರೆಯಲ್ಪಡುತ್ತಿದೆ!":
ರಾಧಿಕಾ ಪಂಡಿತ್ ಹಂಚಿಕೊಂಡಿರುವ ವೀಡಿಯೋದಲ್ಲಿ ಯಶ್ ಹಾಗೂ ರಾಧಿಕಾ ನಿಶ್ಚಿತಾರ್ಥಕ್ಕೆ ಸಿದ್ಧರಾಗುವುದು, ಕುಟುಂಬಸ್ಥರೊಂದಿಗೆ ಸಂತಸದ ಕ್ಷಣಗಳನ್ನು ಕಳೆಯುವುದು ಹಾಗೂ ಪರಸ್ಪರ ಉಂಗುರ ಬದಲಾಯಿಸಿಕೊಳ್ಳುವ ಸುಂದರ ದೃಶ್ಯಗಳಿವೆ.
ಈ ವೀಡಿಯೋಗೆ ಸುಂದರ ಶೀರ್ಷಿಕೆ ನೀಡಿರುವ ರಾಧಿಕಾ, "ನಿಶ್ಚಿತಾರ್ಥವಾಗಿ 10 ವರ್ಷಗಳು, ಪ್ರೀತಿಯಲ್ಲಿ ಕಳೆಯುತ್ತಿದೆ ಇಡೀ ಜೀವನ.. ನಮ್ಮ ನೆಚ್ಚಿನ ಕಥೆಯನ್ನು ನಾವಿನ್ನೂ ಬರೆಯುತ್ತಿದ್ದೇವೆ. 12/8/2016. ನೀನು ಎಂದೆಂದಿಗೂ ನನ್ನ ಅತ್ಯಂತ ನೆಚ್ಚಿನ 'YES'" ಎಂದು ಪ್ರೀತಿಯಿಂದ ಬರೆದುಕೊಂಡಿದ್ದಾರೆ. ಈ ವೀಡಿಯೋ ಸೋಷಿಯಲ್ ಮೀಡಿಯಾದಲ್ಲಿ ಪೋಸ್ಟ್ ಆಗುತ್ತಿದ್ದಂತೆ ಅಭಿಮಾನಿಗಳಿಂದ ಶುಭಾಶಯಗಳ ಮಹಾಪೂರವೇ ಹರಿದುಬರುತ್ತಿದೆ.
‘ಟಾಕ್ಸಿಕ್’ ಸಿನಿಮಾಗೆ ಯಶ್ಗೆ ರಾಧಿಕಾ ಸಾಥ್:
ಮತ್ತೊಂದೆಡೆ, ನಟ ಯಶ್ ತಮ್ಮ ಬಹುನಿರೀಕ್ಷಿತ 'ಟಾಕ್ಸಿಕ್' (Toxic) ಸಿನಿಮಾದ ಬಿಡುಗಡೆಗೆ ಭರಪೂರ ಸಿದ್ಧತೆ ನಡೆಸುತ್ತಿದ್ದಾರೆ. ಗೀತು ಮೋಹನ್ದಾಸ್ ನಿರ್ದೇಶನದ ಈ ಆಕ್ಷನ್ ಥ್ರಿಲ್ಲರ್ ಸಿನಿಮಾ ಆಗಸ್ಟ್ 26 ರಂದು ಚಿತ್ರಮಂದಿರಗಳಲ್ಲಿ ಅದ್ಧೂರಿಯಾಗಿ ತೆರೆಕಾಣಲಿದೆ. ಇತ್ತೀಚೆಗೆ ನಡೆದ ಸಿನಿಮಾದ ಮುಹೂರ್ತ/ಇವೆಂಟ್ನಲ್ಲಿ ನಯನತಾರಾ, ತಾರಾ ಸುತಾರಿಯಾ ಹಾಗೂ ಕಿಯಾರಾ ಅಡ್ವಾಣಿ ಭಾಗವಹಿಸಿದ್ದು, ಯಶ್ ತಮ್ಮ ಧರ್ಮಪತ್ನಿ ರಾಧಿಕಾ ಪಂಡಿತ್ ಅವರೊಂದಿಗೆ ಆಗಮಿಸಿದ್ದರು.
"ನನ್ನಂತಹ ಕಷ್ಟದ ವ್ಯಕ್ತಿಯೊಂದಿಗೆ ಇರುವುದು ಸುಲಭವಲ್ಲ": ರಾಧಿಕಾಗೆ ಧನ್ಯವಾದ ಹೇಳಿದ ಯಶ್!
ಕಾರ್ಯಕ್ರಮದಲ್ಲಿ ಮಾತನಾಡಿದ್ದ ಯಶ್, ತಮ್ಮ ಲುಕ್ ಹಾಗೂ ಶ್ರಮದ ಹಿಂದೆ ಹೆಂಡತಿಯ ಬೆಂಬಲವನ್ನು ಮುಕ್ತವಾಗಿ ಹೊಗಳಿದ್ದರು.
"ನನ್ನ ಹೆಂಡತಿಗೆ ನಾನು ವಿಶೇಷ ಧನ್ಯವಾದ ತಿಳಿಸಲು ಬಯಸುತ್ತೇನೆ. ನನ್ನೊಂದಿಗೆ ಇರುವುದು ಅಥವಾ ಯಾವುದೇ ರೀತಿಯಲ್ಲಿ ನಂಟಿಟ್ಟುಕೊಳ್ಳುವುದು ಅಷ್ಟು ಸುಲಭವಲ್ಲ, ನಾನು ಸ್ವಲ್ಪ ಕಷ್ಟದ ವ್ಯಕ್ತಿ. ಈ 'ಟಾಕ್ಸಿಕ್' ಸಿನಿಮಾ ನನ್ನಿಂದ ತೀವ್ರ ಶ್ರಮವನ್ನು ಬಯಸಿತ್ತು. ಕಂಫರ್ಟ್ ಝೋನ್ನಿಂದ ಹೊರಬಂದು ಕೆಲಸ ಮಾಡಿದ್ದೇನೆ. 2-3 ವಿಭಿನ್ನ ಲುಕ್ಗಳಿಗಾಗಿ ಸಾಕಷ್ಟು ಸಮಯ ಬೇಕಾಯಿತು. ಈ ಇಡೀ ಪಯಣದಲ್ಲಿ ರಾಧಿಕಾ ನನಗೆ ದೊಡ್ಡ ಬೆಂಬಲವಾಗಿ ನಿಂತಿದ್ದಾರೆ" ಎಂದು ಯಶ್ ಭಾವುಕರಾಗಿ ನುಡಿದಿದ್ದರು.
ಅಂದಹಾಗೆ 'ಟಾಕ್ಸಿಕ್' ಚಿತ್ರವು ಕನ್ನಡ ಮತ್ತು ಇಂಗ್ಲಿಷ್ನಲ್ಲಿ ಚಿತ್ರೀಕರಣಗೊಂಡಿದ್ದು, ಹಿಂದಿ, ತೆಲುಗು, ತಮಿಳು ಹಾಗೂ ಮಲಯಾಳಂ ಭಾಷೆಗಳಲ್ಲೂ ತೆರೆಕಾಣಲಿದೆ. ರುಕ್ಮಿಣಿ ವಸಂತ್ ಹಾಗೂ ಹುಮಾ ಖುರೇಷಿ ಕೂಡ ಈ ಚಿತ್ರದ ಮುಖ್ಯ ತಾರಾಗಣದಲ್ಲಿದ್ದಾರೆ.
