ಮೂಡುಬಿದಿರೆ: "ಸ್ತ್ರೀ ಎನ್ನುವುದು ಪರಿಪೂರ್ಣತೆಯ ಸಂಕೇತ. ಆಕೆಯ ಅಂತರಂಗದ ಸೃಜನಶೀಲ ಶಕ್ತಿ ಹಾಗೂ ಸಂವೇದನೆಗಳು ಅಕ್ಷರ ರೂಪ ಪಡೆದಾಗ ಸಮಾಜದ ಸಾಂಸ್ಕೃತಿಕ ಮೌಲ್ಯಗಳು ಇನ್ನಷ್ಟು ಶ್ರೀಮಂತಗೊಳ್ಳುತ್ತವೆ" ಎಂದು ಆಳ್ವಾಸ್ ಶಿಕ್ಷಣ ಪ್ರತಿಷ್ಠಾನದ ಅಧ್ಯಕ್ಷ ಡಾ. ಎಂ. ಮೋಹನ್ ಆಳ್ವ ಅಭಿಪ್ರಾಯಪಟ್ಟಿದ್ದಾರೆ.
ಆಳ್ವಾಸ್ ಸಂಸ್ಥೆಯ ಕುವೆಂಪು ಸಭಾಂಗಣದಲ್ಲಿ ಆಯೋಜಿಸಲಾಗಿದ್ದ ಸಮಾರಂಭದಲ್ಲಿ, ಲೇಖಕಿ ಸೌಮ್ಯ ತಿಲಕ್ ಶೆಟ್ಟಿ ಅವರ ‘ಮಸಿಯ ಮಾತು' ಕವನ ಸಂಕಲನವನ್ನು ಲೋಕಾರ್ಪಣೆಗೊಳಿಸಿ ಅವರು ಮಾತನಾಡುತ್ತಿದ್ದರು.
ಬದುಕಿನ ಸಕಾರಾತ್ಮಕ ದೃಷ್ಟಿಕೋನವನ್ನು ಎತ್ತಿಹಿಡಿಯುವ ಈ ಕೃತಿಯಲ್ಲಿ ರೋಷ, ದ್ವೇಷಗಳಿಗಿಂತ ಪ್ರೀತಿ, ಕರುಣೆ ಹಾಗೂ ಸಹಬಾಳ್ವೆಯ ತತ್ವಗಳೇ ಪ್ರಧಾನವಾಗಿವೆ. ಮಹತ್ವಾಕಾಂಕ್ಷೆಯ ಅಂಧಾವಲೋಕನಕ್ಕಿಂತ ಬದುಕಿನ ಸರಳತೆ ಮತ್ತು ಸಂಬಂಧಗಳ ಮೌಲ್ಯವನ್ನು ಕವಯಿತ್ರಿ ಅತ್ಯಂತ ಪ್ರಬುದ್ಧವಾಗಿ ಇಲ್ಲಿ ಕಟ್ಟಿಕೊಟ್ಟಿದ್ದಾರೆ ಎಂದು ಡಾ. ಆಳ್ವ ಶ್ಲಾಘಿಸಿದರು.
ಭಾಷೆಯ ಹೊಸ ಸಾಧ್ಯತೆಗಳ ಅನ್ವೇಷಣೆ: ವೇಣುಗೋಪಾಲ ಶೆಟ್ಟಿ
ಕೃತಿ ಪರಿಚಯ ಮಾಡಿದ ಮೂಡುಬಿದಿರೆ ತಾಲೂಕು ಕನ್ನಡ ಸಾಹಿತ್ಯ ಪರಿಷತ್ತಿನ ಅಧ್ಯಕ್ಷ ವೇಣುಗೋಪಾಲ ಶೆಟ್ಟಿ ಮಾತನಾಡಿ, "ಇಂಗ್ಲಿಷ್ ಶಿಕ್ಷಕಿಯಾಗಿದ್ದೂ ಸೌಮ್ಯ ಶೆಟ್ಟಿಯವರು ಕನ್ನಡ ಸಾಹಿತ್ಯದ ಮೇಲಿಟ್ಟಿರುವ ಬದ್ಧತೆ ಪ್ರಶಂಸನೀಯ. ಕೃತಿಯಲ್ಲಿ ಮಾನವೀಯತೆಯ ಭಾವ ಎದ್ದು ಕಾಣುತ್ತಿದ್ದು, ಪ್ರಾಸಬದ್ಧತೆ ಚೆನ್ನಾಗಿ ಮೂಡಿಬಂದಿದೆ. ಮುಂದಿನ ದಿನಗಳಲ್ಲಿ ಅವರು ಪ್ರಾಸದ ಮಿತಿಯನ್ನು ಮೀರಿ ಭಾಷೆಯ ಹೊಸ ಸಾಧ್ಯತೆಗಳನ್ನು ಅನ್ವೇಷಿಸಿದರೆ ಸಾಹಿತ್ಯದ ದಿಗಂತ ಇನ್ನಷ್ಟು ವಿಸ್ತಾರಗೊಳ್ಳಲಿದೆ" ಎಂದು ಸಲಹೆ ನೀಡಿದರು.
ಹೃದಯದ ಮಾತುಗಳಿಗೆ ಜೀವ ನೀಡುವ ಮಾಧ್ಯಮ: ಕವಯಿತ್ರಿ ಸೌಮ್ಯ ಶೆಟ್ಟಿ
ತಮ್ಮ ಕಾವ್ಯಯಾನದ ಕುರಿತು ಮಾತನಾಡಿದ ಕವಯಿತ್ರಿ ಸೌಮ್ಯ ತಿಲಕ್ ಶೆಟ್ಟಿ, "ಮಸಿ ಎನ್ನುವುದು ಕೇವಲ ಕಾಗದದ ಮೇಲಿನ ಗುರುತಲ್ಲ, ಅದು ಹೃದಯದ ಭಾವನೆಗಳಿಗೆ ಜೀವ ನೀಡುವ ಮಾಧ್ಯಮ. ನನ್ನ ಬದುಕಿನ ಅನುಭವ ಹಾಗೂ ಸಮಾಜವನ್ನು ನೋಡುವ ದೃಷ್ಟಿಕೋನವೇ ಈ ನೂರು ಕವನಗಳ ಸಂಕಲನ. ಓದುಗರಲ್ಲಿ ಆತ್ಮಾವಲೋಕನ ಬೆಳೆಸುವ ಉದ್ದೇಶದಿಂದಲೇ ಇದನ್ನು ರಚಿಸಿದ್ದೇನೆ" ಎಂದರು.
ವಚನ ಸಾಹಿತ್ಯದ ಸರಳತೆಯ ನೆನಪು: ಡಾ. ಬಿ. ಪಿ. ಸಂಪತ್ ಕುಮಾರ್
ವಿಶ್ರಾಂತ ಕುಲಸಚಿವ ಡಾ. ಬಿ. ಪಿ. ಸಂಪತ್ ಕುಮಾರ್ ಮಾತನಾಡಿ, "ಮೊದಲ ಕವನ ಸಂಕಲನವು ಲೇಖಕರ ಸಾಹಿತ್ಯಿಕ ಮೈಲಿಗಲ್ಲಾಗಿದೆ. ಕೃತಕತೆಯಿಲ್ಲದ ಸರಳ ಭಾಷೆಯ ಮೂಲಕ ಓದುಗರ ಮನ ಮುಟ್ಟುವಲ್ಲಿ ಕವಯಿತ್ರಿ ಯಶಸ್ವಿಯಾಗಿದ್ದಾರೆ. ಇಲ್ಲಿನ ಕೆಲವು ಕವಿತೆಗಳು ಬಸವಣ್ಣ ಹಾಗೂ ಅಕ್ಕಮಹಾದೇವಿಯವರ ವಚನಗಳ ತಾತ್ವಿಕತೆ ಮತ್ತು ಸರಳತೆಯನ್ನು ನೆನಪಿಸುತ್ತವೆ. ಉತ್ತಮ ಕವಯಿತ್ರಿಯಾಗಿ ರೂಪುಗೊಳ್ಳುವ ಎಲ್ಲಾ ಭರವಸೆಗಳು ಈ ಕೃತಿಯಲ್ಲಿವೆ" ಎಂದು ಪ್ರಶಂಸಿದರು.
ವೈವಿಧ್ಯಮಯ ಅನುಭವಗಳ 'ಫ್ರೂಟ್ ಸಲಾಡ್'
ಹವ್ಯಾಸಿ ಬರಹಗಾರ್ತಿ ಆಶಾ ಅಡೂರು ಮಾತನಾಡಿ, ಈ ಕೃತಿಯು ಜ್ಞಾನ, ಚಿಂತನೆ ಹಾಗೂ ಸಮಾಜಮುಖಿ ಸಂದೇಶಗಳನ್ನು ಒಳಗೊಂಡಿದ್ದು, ಓದುಗರಿಗೆ ವೈವಿಧ್ಯಮಯ ಅನುಭವ ನೀಡುವ 'ಫ್ರೂಟ್ ಸಲಾಡ್'ನಂತಿದೆ ಎಂದರು.
ಕಾರ್ಯಕ್ರಮದಲ್ಲಿ ಆಮಂತ್ರಣ ಸೇವಾ ಪ್ರತಿಷ್ಠಾನದ ಟ್ರಸ್ಟಿ ವಿಜಯಕುಮಾರ್ ಜೈನ್ ಉಪಸ್ಥಿತರಿದ್ದು ಮಾತನಾಡಿದರು. ಆಳ್ವಾಸ್ ಪದವಿಪೂರ್ವ ಕಾಲೇಜಿನ ಕನ್ನಡ ವಿಭಾಗದ ಉಪನ್ಯಾಸಕಿ ಡಾ. ಸುಧಾರಾಣಿ ಕಾರ್ಯಕ್ರಮ ನಿರೂಪಿಸಿದರು.
