ಭೋಪಾಲ್: ಸೈಕಲ್ ಕಳವುಗೈದಿರುವ ಶಂಕೆಯಲ್ಲಿ 9 ವರ್ಷದ ಬಾಲಕನೊಬ್ಬನಿಗೆ ಮಪ್ತಿಯಲ್ಲಿದ್ದ ಪೊಲೀಸ್ ಸೇರಿದಂತೆ ಬೈಕ್ನಲ್ಲಿ ಬಂದಿರುವ ಕೆಲವರು ಅಮಾನುಷವಾಗಿ ಥಳಿಸಿ ಚಿತ್ರಹಿಂಸೆ ನೀಡಿರುವ ಘಟನೆ ಮಧ್ಯಪ್ರದೇಶದ ಜಬಲ್ಪುರದಲ್ಲಿ ಶುಕ್ರವಾರ ಮಧ್ಯಾಹ್ನ 1 ಗಂಟೆಯ ಸುಮಾರಿಗೆ ನಡೆದಿದೆ. ಈ ಘಟನೆಯ ಸಂಪೂರ್ಣ ದೃಶ್ಯ ಸಿಸಿಟಿವಿಯಲ್ಲಿ ದಾಖಲಾಗಿದೆ.
ಬಾಲಕನನ್ನು ಹಲ್ಲೆಗೈದ ಗುಂಪಿನಲ್ಲಿ ವಿಶೇಷ ಸಶಸ್ತ್ರ ಪಡೆಯ 6ನೇ ಬೆಟಾಲಿಯನ್ನ ಪೇದೆ ಅಶೋಕ್ ತಾಪಾ ಕೂಡಾ ಸೇರಿರುವುದನ್ನು ಪತ್ತೆ ಮಾಡಲಾಗಿದೆ ಎಂದು ಎಸ್ಪಿ ಸಿದ್ಧಾರ್ಥ ಬಹುಗುಣ ಹೇಳಿದ್ದಾರೆ. ಈ ಪುಟ್ಟ ಬಾಲಕನನ್ನು ಬೈಕ್ನಲ್ಲಿ ಕುಳಿತ ವ್ಯಕ್ತಿಯೊಬ್ಬ ಹಿಡಿದುಕೊಂಡಿದ್ದಾನೆ. ಆಗ ಇತರ ಇಬ್ಬರು ಬೈಕ್ನಲ್ಲಿ ಆಗಮಿಸಿದ್ದಾರೆ. ಓರ್ವ ಬಾಲಕನನ್ನು ತುಳಿಯುತ್ತಿದ್ದರೆ, ಟಿ - ಶರ್ಟ್ ಧರಿಸಿರುವ ಮತ್ತೋರ್ವನು ಬಾಲಕನ ಕೂದಲು ಹಿಡಿದುಕೊಂಡು ಅಮಾನುಷವಾಗಿ ಥಳಿಸುತ್ತಿದ್ದಾನೆ. ಒಬ್ಬ ವ್ಯಕ್ತಿ ಮಧ್ಯಪ್ರವೇಶಿಸಲು ಯತ್ನಿಸಿದಾಗ, ಟಿ - ಶರ್ಟ್ ಧರಿಸಿದ ವ್ಯಕ್ತಿ ಆತನನ್ನು ದೂರಕ್ಕೆ ತಳ್ಳುತ್ತಿರುವುದು ಸಿಸಿಟಿವಿ ದೃಶ್ಯಾವಳಿಯಲ್ಲಿ ಕಾಣಿಸುತ್ತಿದೆ. ಹಲ್ಲೆ ನಡೆಸದಂತೆ ಮಹಿಳೆಯೊಬ್ಬರು ತಡೆಯುವ ಪ್ರಯತ್ನ ಮಾಡುತ್ತಿದ್ದು, ಬಾಲಕನನ್ನು ಬೈಕ್ನಲ್ಲಿ ಕುಳ್ಳಿರಿಸಿಕೊಂಡು ಬೈಕ್ ಹಿಂದಕ್ಕೆ ತೆಗೆದು ಜೋರಾಗಿ ಹೋಗುತ್ತಿರುವುದೂ ಕಂಡುಬಂದಿದೆ.
ಈ ಬಗ್ಗೆ ರಂಜಿ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ. ಪೊಲೀಸ್ ಪೇದೆಗೆ ನೋಟಿಸ್ ನೀಡಲಾಗಿದೆ. ಆತನ ಮೇಲೆ ಭಾರತೀಯ ದಂಡಸಂಹಿತೆಯ ಸೆಕ್ಷನ್ 323, 294, 75ರ ಅನ್ವಯ ಪ್ರಕರಣ ದಾಖಲಾಗಿದೆ.
