ಜೈಲಿನಲ್ಲಿದ್ದ ಗ್ಯಾಂಗ್ ಸ್ಟರ್ ಸಕಿಲ್ ಗೆ ಕ್ರಿಮಿನಲ್ ಸಹಕಾರ ನೀಡುತ್ತಿದ್ದ 'ಪ್ರೇಯಸಿ'ಯ ಬಂಧನ

ಕಟಕ್​: ಒಡಿಶಾದ ಬಿಲ್ಡರೊಬ್ಬರಿಂದ  ಹಣ ಸುಲಿಗೆ ಮಾಡಿರುವ ಆರೋಪದಡಿ ಗ್ಯಾಂಗ್​​ಸ್ಟರ್​ ಸಕಿಲ್​ ಪ್ರೇಯಸಿ​ ಮಾನಸಿ ನಾಯಕ್​ ಅಲಿಯಾಸ್​ ಬೇಬಿ ಎಂಬಾಕೆಯನ್ನು ಪೊಲೀಸರು ಬಂಧಿಸಿದ್ದಾರೆ. 

ಕಟಕ್​ ನಗರದ ವಿವಿಧ ಪೊಲೀಸ್​ ಠಾಣೆಗಳಲ್ಲಿ ಮಾನಸಿ ನಾಯಕ್ ವಿರುದ್ಧ ಅನೇಕ ಪ್ರಕರಣಗಳು ದಾಖಲಾಗಿವೆ ಎಂದು ತಿಳಿದು ಬಂದಿದೆ. 2015ರಲ್ಲಿ ಕೊಲೆ ಪ್ರಕರಣದಲ್ಲಿ ಈಕೆ ಜೈಲು ಪಾಲಾಗಿದ್ದಳು. ಜೈಲಿನಿಂದ ಹೊರಬಂದ ಈಕೆಗೆ ಗ್ಯಾಂಗ್​​ಸ್ಟರ್​ ಸಕಿಲ್ ಪರಿಚಯವಾಗಿದೆ. ಆ ಬಳಿಕ ಅವನ ಪರವಾಗಿ ಕೆಲಸ ಮಾಡುತ್ತಿದ್ದಳು.​ 

ಸಕಿಲ್​ ಜೈಲು ಪಾಲಾಗಿದ್ದರೂ ಅಲ್ಲಿಯೇ ಇದ್ದುಕೊಂಡು ಇದೇ ಮಾನಸಿ ನಾಯಕ್ ಮೂಲಕ ತನ್ನ ಕ್ರಮಿನಲ್​ ಕಾರ್ಯಗಳನ್ನು ನಡೆಸುತ್ತಿದ್ದ. ವಿವಿಧ ಪ್ರಕರಣಗಳ ಆರೋಪಿಯಾಗಿ ಪೊಲೀಸರ ಕೈಗೆ ಸಿಗದೆ ತಪ್ಪಿಸಿಕೊಳ್ಳುತ್ತಿದ್ದ ಬೇಬಿ ಮೇಲೆ ಕಳೆದ ಕೆಲವು ತಿಂಗಳಿಂದ ಕಣ್ಣಿಡಲಾಗಿತ್ತು. ಇದೀಗ ಬಿಲ್ಡರ್​ ಒಬ್ಬರು ಆಕೆಯ ವಿರುದ್ಧ ಹಣ ಸುಲಿಗೆ ಮಾಡಿದ್ದಾಳೆಂದು ಆರೋಪಿಸಿ ದೂರು ನೀಡಿದ್ದಾರೆ. ಇದೇ ಆಧಾರದ ಮೇಲೆ ಮಾನಸಿ ನಾಯಕ್ ಸೇರಿದಂತೆ ಆಕೆಯ ಮೂವರು ಸಹಚರರನ್ನು ಪೊಲೀಸರು ಬಂಧಿಸಿದ್ದಾರೆ.