.png)
ಅಹಮದಾಬಾದ್: ಯುವಕನೋರ್ವನ ಜೊತೆಗಿದ್ದ ಖಾಸಗಿ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆದ ಕಾರಣಕ್ಕೆ 22 ವರ್ಷದ ಯುವತಿಯನ್ನು ತಂದೆ ಮತ್ತು ಸಹೋದರನೇ ಸೇರಿ ಬರ್ಬರವಾಗಿ ಕೊಲೆ ಮಾಡಿ, ಅದನ್ನು ಹಿಟ್ & ರನ್ ರಸ್ತೆ ಅಪಘಾತವೆಂದು ಬಿಂಬಿಸಲು ಯತ್ನಿಸಿದ್ದ ಭಯಾನಕ 'ಮರ್ಯಾದಾ ಹತ್ಯೆ' (Honour Killing) ಪ್ರಕರಣವೊಂದು ತಡವಾಗಿ ಬೆಳಕಿಗೆ ಬಂದಿದೆ.
ಆಸ್ಪತ್ರೆಯ ರಿಸೆಪ್ಷನಿಸ್ಟ್ ಆಗಿ ಕೆಲಸ ಮಾಡುತ್ತಿದ್ದ ಸೋಫಿಯಾ (22) ಕೊಲೆಯಾದ ಯುವತಿ. ಈ ಸಂಬಂಧ ಆಕೆಯ ತಂದೆ ಮೊಹಮ್ಮದ್ ಫಾರೂಕ್ ಹಾಗೂ 38 ವರ್ಷದ ಸಹೋದರ ಮೊಹಮ್ಮದ್ ಹಬಿಲ್ ಎಂಬವರನ್ನು ಪೊಲೀಸರು ಬಂಧಿಸಿದ್ದಾರೆ.
ಅಪಘಾತದಂತೆ ಸೃಷ್ಟಿಸಲಾದ ಕತೆ:
ಆಗಸ್ಟ್ 12ರ ರಾತ್ರಿ ಘಟನೆ ನಡೆದಿದ್ದು, ಬೈಕ್ನಲ್ಲಿ ತೆರಳುತ್ತಿದ್ದಾಗ ಅಪರಿಚಿತ ವಾಹನವೊಂದು ಹಿಂಬದಿಯಿಂದ ಡಿಕ್ಕಿ ಹೊಡೆದ ಪರಿಣಾಮ ಸೋಫಿಯಾಗೆ ಗಂಭೀರ ಗಾಯಗಳಾಗಿವೆ ಎಂದು ಆಕೆಯ ಸಹೋದರ ಹಬಿಲ್ ಪೊಲೀಸರಿಗೆ ದೂರು ನೀಡಿದ್ದ. ಗಂಭೀರ ಸ್ಥಿತಿಯಲ್ಲಿದ್ದ ಸೋಫಿಯಾಳನ್ನು ಸೋಲಾ ಸಿವಿಲ್ ಆಸ್ಪತ್ರೆಗೆ ದಾಖಲಿಸಲಾಗಿದ್ದು, ಮರುದಿನ ಚಿಕಿತ್ಸೆ ಫಲಕಾರಿಯಾಗದೆ ಆಕೆ ಮೃತಪಟ್ಟಿದ್ದಳು. ಅಪಘಾತದಲ್ಲಿ ತನಗೂ ಸಣ್ಣಪುಟ್ಟ ಗಾಯಗಳಾಗಿವೆ ಎಂದು ಹಬಿಲ್ ಬಿಂಬಿಸಿಕೊಂಡಿದ್ದ.
ತನಿಖೆಯಲ್ಲಿ ಬಯಲಾಯ್ತು ಮರ್ಯಾದಾ ಹತ್ಯೆಯ ರಹಸ್ಯ:
ಹಿಟ್ & ರನ್ ಪ್ರಕರಣದ ಆಳವಾದ ತನಿಖೆ ಕೈಗೆತ್ತಿಕೊಂಡ ಪೊಲೀಸರಿಗೆ ತಂದೆ ಮತ್ತು ಮಗನ ನಡೆವಳಿಕೆಗಳ ಮೇಲೆ ಬಲವಾದ ಸಂಶಯ ವ್ಯಕ್ತವಾಗಿತ್ತು. ಪೊಲೀಸರು ತೀವ್ರ ವಿಚಾರಣೆ ನಡೆಸಿದಾಗ ಇಡೀ ಕೊಲೆಯ ಸಂಚು ಬಯಲಾಗಿದೆ:
- ಸುಮಾರು ಮೂರು ತಿಂಗಳ ಹಿಂದೆ ಸೋಫಿಯಾ ಯುವಕನೊಬ್ಬನ ಜೊತೆಗಿದ್ದ ವಿಡಿಯೋವೊಂದು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿತ್ತು. ಇದರಿಂದ ಕುಟುಂಬಕ್ಕೆ ಸಮಾಜದಲ್ಲಿ ತೀವ್ರ ಮುಖಭಂಗವಾಗಿದೆ ಎಂದು ತಂದೆ ಮತ್ತು ಮಗ ಆಕೆಯ ಮೇಲೆ ತೀವ್ರ ದ್ವೇಷ ಕಾರುತ್ತಿದ್ದರು.
- ಕುಟುಂಬದ "ಮರ್ಯಾದೆ" ಉಳಿಸಿಕೊಳ್ಳಲು ಆಕೆಯನ್ನು ಕೊಲ್ಲಲು ಮೊದಲೇ ಸಂಚು ರೂಪಿಸಿದ್ದರು.
- ಆಗಸ್ಟ್ 12ರ ರಾತ್ರಿ ಬೈಕ್ನಲ್ಲಿ ಆಕೆಯನ್ನು ಹೊರಗೆ ಕರೆದೊಯ್ದ ಸಹೋದರ ಹಬಿಲ್, ತನ್ನ ಪ್ಯಾಂಟ್ನೊಳಗೆ ಮೊದಲೇ ಕಬ್ಬಿಣದ ಸುತ್ತಿಗೆಯನ್ನು ಬಚ್ಚಿಟ್ಟುಕೊಂಡಿದ್ದ. ಘೇಲ್ಜಿಪುರ ಗ್ರಾಮದ ಸಮೀಪದ ನಿರ್ಜನ ಮಣ್ಣಿನ ರಸ್ತೆಗೆ ಬೈಕ್ ತಿರುಗಿಸಿ, ಆಕೆಯ ತಲೆಗೆ ಸುತ್ತಿಗೆಯಿಂದ ಸತತ ಮೂರು ಬಾರಿ ಬಲವಾಗಿ ಹೊಡೆದು ಸಾಯಿಸಲು ಯತ್ನಿಸಿದ್ದಾರೆ.
- ಬಳಿಕ ಮೃತಪ್ರಾಯ ಸ್ಥಿತಿಯಲ್ಲಿದ್ದ ಆಕೆಯನ್ನು ಮುಖ್ಯ ರಸ್ತೆಗೆ ಹೊತ್ತು ತಂದು ಬಿಸಾಡಿದ ತಂದೆ-ಮಗ, ರಸ್ತೆ ಅಪಘಾತದಂತೆ ಕಾಣಿಸಲು ಬೈಕನ್ನು ಜಖಂಗೊಳಿಸಿ ಕೃತಕ ಅಪಘಾತದ ನಾಟಕವಾಡಿದ್ದರು.
ಪ್ರಕರಣ ಭೇದಿಸಿರುವ ಪೊಲೀಸರು ಕೊಲೆ ಆರೋಪದಡಿ ತಂದೆ ಮೊಹಮ್ಮದ್ ಫಾರೂಕ್ ಹಾಗೂ ಸಹೋದರ ಮೊಹಮ್ಮದ್ ಹಬಿಲ್ ಇಬ್ಬರನ್ನೂ ವಶಕ್ಕೆ ಪಡೆದು ತನಿಖೆ ಮುಂದುವರಿಸಿದ್ದಾರೆ.
.png)
.png)
