ಸಾಮಾಜಿಕ ಜಾಲತಾಣ 'ಎಕ್ಸ್' (ಟ್ವಿಟರ್) ನಲ್ಲಿ 'ಬೆಲ್ಲಂ ಸ್ವಾತಿ' ಎಂಬ ಖಾತೆಯ ಮೂಲಕ ಹಂಚಿಕೊಳ್ಳಲಾದ ಈ ವಿಡಿಯೋ ಕ್ಲಿಪ್ ಕೆಲವೇ ಗಂಟೆಗಳಲ್ಲಿ 51,000ಕ್ಕೂ ಅಧಿಕ ವೀಕ್ಷಣೆ ಪಡೆದು ಭಾರಿ ವೈರಲ್ ಆಗಿದ್ದು, ಪೋಷಕರ ನಿರ್ಲಕ್ಷ್ಯದ ವಿರುದ್ಧ ಇಂಟರ್ನೆಟ್‌ನಲ್ಲಿ ತೀವ್ರ ಆಕ್ರೋಶ ವ್ಯಕ್ತವಾಗಿದೆ.
ವಿಡಿಯೋದಲ್ಲಿ ಏನಿದೆ?:
ವಿಡಿಯೋದಲ್ಲಿ ದಂಪತಿ ಸಮುದ್ರ ತೀರದ ನೀರಿನ ಅಂಚಿನಲ್ಲಿ ಕೈಹಿಡಿದು ರೊಮ್ಯಾಂಟಿಕ್ ಆಗಿ ನಡೆಯುತ್ತಾ ತಮ್ಮ ಮೊಬೈಲ್‌ನಲ್ಲಿ ಮುಂಭಾಗದಿಂದ ವಿಡಿಯೋ ರೆಕಾರ್ಡ್ ಮಾಡಿಕೊಳ್ಳುತ್ತಿರುತ್ತಾರೆ. ಆದರೆ, ತಮ್ಮ ಜೊತೆಯಲ್ಲೇ ಇದ್ದ ಪುಟ್ಟ ಮಗುವನ್ನು ಹಿಂಬದಿಯ ನೀರಿನಲ್ಲೇ ಬಿಟ್ಟು ಅವರು ಮುಂದೆ ಸಾಗುತ್ತಾರೆ.
ಅಷ್ಟರಲ್ಲೇ ಸಮುದ್ರದ ರಭಸದ ಅಲೆಯೊಂದು ಬಂದು ಆ ಪುಟ್ಟ ಮಗುವನ್ನು ಎಳೆದುಕೊಂಡು ಹೋಗಲು ಮುಂದಾಗುತ್ತದೆ. ಮಗು ನೀರಿನಲ್ಲಿ ಮುಳುಗಿ ಕೊಚ್ಚಿಹೋಗುವ ಕ್ಷಣಾರ್ಧದಲ್ಲಿ, ಸಮೀಪದಲ್ಲೇ ನಿಂತಿದ್ದ ಅಪರಿಚಿತ ವ್ಯಕ್ತಿಯೊಬ್ಬರು ತಕ್ಷಣ ಧಾವಿಸಿ ಮಗುವನ್ನು ಕೈಹಿಡಿದು ಎತ್ತಿಕೊಂಡು ದಡಕ್ಕೆ ತರುತ್ತಾರೆ. ರಕ್ಷಿಸಿದ ವ್ಯಕ್ತಿ ಪೋಷಕರ ನಿರ್ಲಕ್ಷ್ಯ ಕಂಡು ಬೆಚ್ಚಿಬಿದ್ದರೆ, ಇತ್ತ ತಮ್ಮ ಮಗುವಿಗೆ ಏನಾಯಿತು ಎಂಬ ಅರಿವೇ ಇಲ್ಲದ ಪೋಷಕರು ನಗುತ್ತಾ, ವಿಡಿಯೋಗೆ ಪೋಸ್ ಕೊಡುತ್ತಾ ಮುಂದಕ್ಕೆ ಸಾಗುತ್ತಿರುವುದು ದೃಶ್ಯದಲ್ಲಿದೆ.
ನೆಟ್ಟಿಗರ ಆಕ್ರೋಶದ ಮಹಾಪೂರ:
ಪೋಷಕರ ಈ ಅತಿಯಾದ ರೀಲ್ಸ್ ವ್ಯಾಮೋಹ ಮತ್ತು ಮಗುವಿನ ಮೇಲಿನ ಬೇಜವಾಬ್ದಾರಿತನ ಕಂಡು ಸಾಮಾಜಿಕ ಮಾಧ್ಯಮಗಳಲ್ಲಿ ಭಾರಿ ಆಕ್ರೋಶ ವ್ಯಕ್ತವಾಗಿದೆ:
- "ಇಂತಹ ಬೇಜವಾಬ್ದಾರಿ ಪೋಷಕರಿಂದ ಮಗುವನ್ನು ರಕ್ಷಿಸಿ ಸರ್ಕಾರವೇ ವಶಕ್ಕೆ ಪಡೆಯಬೇಕು" ಎಂದು ಬಳಕೆದಾರರೊಬ್ಬರು ಕಾಮೆಂಟ್ ಮಾಡಿದ್ದಾರೆ.
- "ಲೈಕ್ಸ್ ಮತ್ತು ಪ್ರಚಾರದ ಹಪಾಹಪಿಗೆ ಪುಟ್ಟ ಕಂದನ ಪ್ರಾಣವನ್ನೇ ಪಣಕ್ಕಿಟ್ಟ ಇಂತಹ ಪೋಷಕರಿಗೆ ಕಠಿಣ ಶಿಕ್ಷೆಯಾಗಬೇಕು. ಸಕಾಲದಲ್ಲಿ ಮಗುವನ್ನು ರಕ್ಷಿಸಿದ ಆ ಅಪರಿಚಿತ ವ್ಯಕ್ತಿಗೆ ಧನ್ಯವಾದಗಳು" ಎಂದು ಮತ್ತೊಬ್ಬರು ಆಕ್ರೋಶ ಹೊರಹಾಕಿದ್ದಾರೆ.
- "ರೀಲ್ಸ್ ಮಾಡುವ ಭರದಲ್ಲಿ ಪೋಷಕತ್ವದ ಜವಾಬ್ದಾರಿಯನ್ನೇ ಮರೆತುಬಿಡುವ ಇಂತಹವರಿಗೆ ಸಮಾಜದಲ್ಲಿ ಧಿಕ್ಕಾರವಿರಲಿ" ಎಂದು ನೆಟ್ಟಿಗರು ಕಿಡಿಕಾರಿದ್ದಾರೆ.
Reel makers should be banned from having children, they must be ostracised from the society https://t.co/CZCmmIkPe5
— Swathi Bellam (@BellamSwathi) October 20, 2026
