.jpg)
ಚಂಡೀಗಢ:
ಮಕ್ಕಳಿಗೆ ಬಟ್ಟೆ ಖರೀದಿಸಲು ಮಾರುಕಟ್ಟೆಗೆ ತೆರಳಿದ್ದ ಬಡ ಮಹಿಳೆಯೊಬ್ಬಳು ಕೇವಲ 7 ರೂಪಾಯಿ ನೀಡಿ ಖರೀದಿಸಿದ ಲಾಟರಿ ಟಿಕೆಟ್‌ನಿಂದ ರಾತ್ರೋರಾತ್ರಿ ಕೋಟ್ಯಧಿಪತಿಯಾದ ರೋಚಕ ಹಾಗೂ ಅಚ್ಚರಿಯ ಘಟನೆ ಪಂಜಾಬ್‌ನ ಕೋಟಕಪುರದಲ್ಲಿ ನಡೆದಿದೆ.
ಕೋಟಕಪುರದ ನಿವಾಸಿ ಬಿಮ್ಲಾ ದೇವಿ ಎಂಬುವವರೇ ಈ ಅದೃಷ್ಟಶಾಲಿ ಮಹಿಳೆ. ಇವರ ಪತಿ ದಿನಗೂಲಿ ಕಾರ್ಮಿಕರಾಗಿ ದುಡಿದು ಸಂಸಾರ ನಿಭಾಯಿಸುತ್ತಿದ್ದಾರೆ. ಇತ್ತೀಚೆಗೆ ಮಕ್ಕಳಿಗೆ ಬಟ್ಟೆ ತರಲೆಂದು ಮಾರುಕಟ್ಟೆಗೆ ತೆರಳಿದ್ದ ಬಿಮ್ಲಾ ದೇವಿ, ರೈಲ್ವೆ ರಸ್ತೆಯಲ್ಲಿರುವ ರೈಲ್ವೆ ನಿಲ್ದಾಣದ ಬಳಿಯ 'ಸ್ಟಾರ್ ಲಾಟರಿ ಸ್ಟಾಲ್'ನಲ್ಲಿ ಕೇವಲ ಕುತೂಹಲಕ್ಕೆಂದು ಸಿಕ್ಕಿಂ ರಾಜ್ಯ ಸರ್ಕಾರದ 7 ರೂಪಾಯಿ ಮುಖಬೆಲೆಯ ಲಾಟರಿ ಟಿಕೆಟ್ ಖರೀದಿಸಿದ್ದರು. ಈ ಸಣ್ಣ ಮೊತ್ತದ ಟಿಕೆಟ್ ತಮ್ಮ ಬದುಕನ್ನೇ ಬದಲಿಸಲಿದೆ ಎಂಬ ಕಲ್ಪನೆಯೂ ಅವರಿಗೆ ಇರಲಿಲ್ಲ.
ಸ್ಟಾಲ್ ಮಾಲೀಕನ ಕರೆಯಿಂದ ಬಯಲಾಯ್ತು ಕೋಟಿ ಅದೃಷ್ಟ:
ಮರುದಿನ ಲಾಟರಿ ಫಲಿತಾಂಶ ಪ್ರಕಟವಾಗುತ್ತಿದ್ದಂತೆಯೇ, ಸ್ಟಾರ್ ಲಾಟರಿ ಸ್ಟಾಲ್‌ನ ಮಾಲೀಕ ನರೇಶ್ ಮೊಂಗಾ ಅವರು ಬಿಮ್ಲಾ ದೇವಿ ಅವರ ಕುಟುಂಬಕ್ಕೆ ಕರೆ ಮಾಡಿ ಬರೋಬ್ಬರಿ 1 ಕೋಟಿ ರೂಪಾಯಿ ಮೊದಲ ಬಹುಮಾನ ಬಂದಿರುವ ಸಿಹಿ ಸುದ್ದಿ ತಿಳಿಸಿದ್ದಾರೆ. ವಿಷಯ ತಿಳಿಯುತ್ತಿದ್ದಂತೆಯೇ ಸಂಭ್ರಮದಿಂದ ಅಂಗಡಿಗೆ ಓಡೋಡಿ ಬಂದ ಕುಟುಂಬಸ್ಥರಿಗೆ ಲಾಟರಿ ವ್ಯಾಪಾರಿ ಸಿಹಿ ತಿನಿಸಿ ಅಭಿನಂದಿಸಿದರು. ಕುಟುಂಬದ ಸದಸ್ಯರು ಅಂಗಡಿಯ ಮುಂದೆಯೇ ಭಾಂಗ್ರಾ ನೃತ್ಯ ಮಾಡಿ ಸಂಭ್ರಮಿಸಿದ್ದು, ನೆರೆಹೊರೆಯವರು ಹಾಗೂ ಪರಿಚಿತರು ಶುಭಾಶಯಗಳ ಮಹಾಪೂರವನ್ನೇ ಹರಿಸಿದ್ದಾರೆ.
ದಿನಗೂಲಿ ಬದುಕಿಗೆ ಸಿಕ್ಕ ದೊಡ್ಡ ಆಸರೆ:
ಗೆಲುವಿನ ಬಳಿಕ ಹರ್ಷ ವ್ಯಕ್ತಪಡಿಸಿದ ಬಿಮ್ಲಾ ದೇವಿ, "ಪತಿಯ ದಿನಗೂಲಿ ಸಂಪಾದನೆಯಿಂದ ಸಂಸಾರದ ಖರ್ಚು ಸರಿದೂಗಿಸುವುದು ಅತ್ಯಂತ ಕಷ್ಟಕರವಾಗಿತ್ತು. ಈಗ ಬಂದಿರುವ ಈ ಕೋಟಿ ರೂಪಾಯಿ ನಮ್ಮ ಕುಟುಂಬದ ತೀವ್ರ ಆರ್ಥಿಕ ಸಂಕಷ್ಟಕ್ಕೆ ದೊಡ್ಡ ಪರಿಹಾರ ತಂದುಕೊಟ್ಟಿದೆ. ನಮ್ಮ ಮಕ್ಕಳ ಭವಿಷ್ಯಕ್ಕೆ ಹೊಸ ಭರವಸೆ ಮೂಡಿಸಿದೆ," ಎಂದು ಭಾವುಕರಾಗಿ ನುಡಿದಿದ್ದಾರೆ.
ಹಣವನ್ನು ಹೇಗೆ ವಿನಿಯೋಗಿಸಬೇಕು ಎಂಬುದರ ಬಗ್ಗೆ ಕುಟುಂಬದ ಹಿರಿಯರೊಂದಿಗೆ ಚರ್ಚಿಸಿ ನಿರ್ಧರಿಸಲಿದ್ದು, ಜೀವನೋಪಾಯಕ್ಕಾಗಿ ಒಂದು ಸಣ್ಣ ಸ್ವಂತ ಉದ್ಯಮ ಅಥವಾ ವ್ಯಾಪಾರ ಆರಂಭಿಸುವ ಯೋಚನೆ ಇದೆ ಎಂದು ಅವರು ತಿಳಿಸಿದ್ದಾರೆ.
ಅಂಗಡಿ ಮಾಲೀಕನ ಸಂತಸ:
ಕಳೆದ ಆರು ತಿಂಗಳಿನಿಂದ ಈ ಲಾಟರಿ ವ್ಯಾಪಾರ ನಡೆಸುತ್ತಿರುವ ನರೇಶ್ ಮೊಂಗಾ ಮಾತನಾಡಿ, ತಮ್ಮ ಮಳಿಗೆಯಲ್ಲಿ ಈ ಹಿಂದೆ ಲಕ್ಷಾಂತರ ರೂಪಾಯಿ ಬಹುಮಾನಗಳು ಬಂದಿದ್ದವು. ಆದರೆ ರೈಲ್ವೆ ನಿಲ್ದಾಣದ ಬಳಿ ಅಂಗಡಿ ಸ್ಥಳಾಂತರಿಸಿದ ಬಳಿಕ ಇದೇ ಮೊದಲ ಬಾರಿಗೆ ಗ್ರಾಹಕರೊಬ್ಬರಿಗೆ ಬರೋಬ್ಬರಿ 1 ಕೋಟಿ ರೂಪಾಯಿಯ ಬಂಪರ್ ಬಹುಮಾನ ಲಭಿಸಿದೆ ಎಂದು ಸಂತಸ ಹಂಚಿಕೊಂಡಿದ್ದಾರೆ.
