ಮಂಗಳೂರು: ಪಾದಮುಟ್ಟಿ ನಮಸ್ಕರಿಸಲು ಬಂದ ಕಾಂಗ್ರೆಸ್ ಅಭ್ಯರ್ಥಿ‌ - ತಬ್ಬಿ ಆಲಂಗಿಸಿ ಆಶೀರ್ವದಿಸಿದ ಬಿಜೆಪಿ ಸಂಸದ

ಮಂಗಳೂರು: ದ.ಕ.ಜಿಲ್ಲಾ ಕಾಂಗ್ರೆಸ್ ಅಭ್ಯರ್ಥಿ ಪದ್ಮರಾಜ್ ಆರ್. ಪೂಜಾರಿಯವರು ಬಿಜೆಪಿ‌ ಸಂಸದ ನಳಿನ್ ಕುಮಾರ್ ಕಟೀಲು ಅವರನ್ನು ಕಂಡು ಪಾದಮುಟ್ಟಿ ನಮಸ್ಕರಿಸಲು ಬಂದಾಗ ನಳಿನ್ ಅವರನ್ನು ತಬ್ಬಿ ಆಲಂಗಿಸಿ ಆಶೀರ್ವದಿಸಿದ ಘಟನೆ ಇಂದು ನಗರದ ಲೇಡಿಹಿಲ್ ಬಳಿಯ ಸಂತ ಅಲೋಶಿಯಸ್ ಶಾಲೆಯ ಮತಗಟ್ಟೆ ಹೊರಗಡೆ ನಡೆದಿದೆ.

ಮಂಗಳೂರು ಲೇಡಿಹಿಲ್ ಅಲೋಶಿಯಸ್ ಶಾಲೆಗೆ ಮತ ಚಲಾಯಿಸಲು ನಳಿನ್ ಕುಮಾರ್ ಕಟೀಲು ಬಂದಿದ್ದರು. ಮತದಾನ ಮುಗಿಸಿ ನಳಿನ್ ಅವರು ಹೊರಗಡೆ ಬಂದ ವೇಳೆ, ಅಲ್ಲಿಯೇ ಇದ್ದ ಕಾಂಗ್ರೆಸ್ ಅಭ್ಯರ್ಥಿ ಪದ್ಮರಾಜ್ ಆರ್. ಪೂಜಾರಿಯವರು ನಳಿನ್ ಬಳಿ ಆಗಮಿಸಿ ಅವರ ಕಾಲು ಹಿಡಿದು ಆಶೀರ್ವಾದ ಪಡೆಯಲು ಬಂದಿದ್ದಾರೆ. ಆಗ ನಳಿನ್, ಅವರನ್ನು ಅರ್ಧದಲ್ಲೇ ತಡೆದು ತಬ್ಬಿ ಆಲಂಗಿಸಿ ಆಶೀರ್ವದಿಸಿದ್ದಾರೆ. ಈ ದೃಶ್ಯ ಅಲ್ಲಿಯೇ ಇದ್ದ ಮಾಧ್ಯಮದವರ ಕ್ಯಾಮರಾದಲ್ಲಿ ಸೆರೆಯಾಗಿದೆ.