ಇಎಂಐ ಕಟ್ಟಲು ನಿರಾಕರಿಸಿದ ಪ್ರಿಯಕರನ ಫ್ಲ್ಯಾಟ್ ನಲ್ಲಿಯೇ ಆತ್ಮಹತ್ಯೆಗೆ ಶರಣಾದ ಟೆಕ್ಕಿ

ಪುಣೆ: ಇಎಂಐ ಕಟ್ಟಲು ಪ್ರಿಯಕರ ನಿರಾಕರಿಸಿದ್ದಕ್ಕೆ ಮನನೊಂದು ಟೆಕ್ಕಿಯೊಬ್ಬರು ಆತ್ಮಹತ್ಯೆ ಮಾಡಿಕೊಂಡಿರುವ ಆಘಾತಕಾರಿ ಘಟನೆ ಮಹಾರಾಷ್ಟ್ರದ ಪುಣೆಯಲ್ಲಿ ನಡೆದಿದೆ.

ರಸಿಕಾ ರವೀಂದ್ರ ದಿವಟೆ (25) ಮೃತ ಟೆಕ್ಕಿ. ಈಕೆ ಪುಣೆಯ ಐಟಿ ಕಂಪನಿಯೊಂದರಲ್ಲಿ ಕೆಲಸ ಮಾಡುತ್ತಿದ್ದಳು. ಕಳೆದ 8 ತಿಂಗಳಿಂದ ರಸಿಕಾ, ಆದರ್ಶ್​ ಅಜಯ್​ ಕುಮಾರ್​ ಮೆನನ್​ ಪ್ರೀತಿಸುತ್ತಿದ್ದರು. ಇಬ್ಬರು ಒಂದೇ ಕಂಪನಿಯಲ್ಲಿ ಜೊತೆಯಾಗಿ ಕೆಲಸ ಮಾಡುತ್ತಿದ್ದರು.

ರಸಿಕಾ ತನ್ನ ಪ್ರಿಯಕರನಿಗಾಗಿ ಸಾಲ ಮಾಡಿ ಎಪ್ರಿಲ್‌ನಲ್ಲಿ ಕಾರು ಖರೀದಿಸಿದ್ದಳು. ಆಕೆಯೇ ಡೌನ್​ ಪೇಮೆಂಟ್ ಮೊತ್ತವನ್ನು ಭರಿಸಿದ್ದಳು. ಕಾರು ಖರೀದಿಯ ಮೇಲೆ ಇಎಂಐ ಪಾವತಿಸುವುದಾಗಿ ಆದರ್ಶ್ ಭರವಸೆ ನೀಡಿದ್ದನಂತೆ. ಆದ್ದರಿಂದ ರಸಿಕಾ ಕ್ರೆಡಿಟ್ ಕಾರ್ಡ್‌ನಿಂದ ಒಟ್ಟು 3 ಲಕ್ಷ ರೂ. ಸಾಲ ಪಡೆದುಕೊಳ್ಳಲಾಗಿದೆ. ಜೊತೆಗೆ 2.75 ಲಕ್ಷ ರೂ. ವೈಯಕ್ತಿಕ ಸಾಲವನ್ನೂ ತೆಗೆದುಕೊಳ್ಳಲಾಗಿದೆ. ಆಕೆ ಲೋನ್ ಆ್ಯಪ್ ಮೂಲಕ ಸಾಲವನ್ನೂ ಪಡೆದಿದ್ದಳು.

ಆದರೆ, ಆದರ್ಶ್ ಇಎಂಐ ಪಾವತಿಸಲು ವಿಫಲವಾದಾಗ ಒತ್ತಡಕ್ಕೆ ಒಳಗಾಗಿದ್ದಳು ಎಂದು ಆಕೆಯ ತಾಯಿ ಹೇಳಿದ್ದಾರೆ. ಈ ಬಗ್ಗೆ ರಸಿಕಾ ಆದರ್ಶ್ ನೊಂದಿಗೆ ಜಗಳವಾಡಿದ್ದಳು. ಆದರೆ, ಮೆನನ್​ ಮಾತ್ರ ಇಎಂಐ ಕಟ್ಟಲು ಒಪ್ಪಲೇ ಇಲ್ಲ. ಪರಿಣಾಮ ಮನನೊಂದ ರಸಿಕಾ, ಆದರ್ಶ್ ಅಜಯ್ ಮೆನನ್ ಫ್ಲಾಟ್​ನಲ್ಲೇ ಆತ್ಮಹತ್ಯೆ ಮಾಡಿಕೊಂಡಿದ್ದಾಳೆ. ಆಕೆಯ ತಾಯಿ ನೀಡಿರುವ ದೂರಿನನ್ವಯ ಆದರ್ಶ್‌ನನ್ನು ಪುಣೆ ಪೊಲೀಸರು ಬಂಧಿಸಿದ್ದಾರೆ.