ಎನ್ಆರ್ ಐ ಜೊತೆಗಿನ ಅಕ್ರಮ ಸಂಬಂಧಕ್ಕೆ ಅಡ್ಡಿಯಾಗಿದ್ದ ಪತಿಗೆ ಪತ್ನಿ ಮಾಡಿದ್ದೇನು ಗೊತ್ತೇ?

ಇಡುಕ್ಕಿ: ಅನಿವಾಸಿ ಭಾರತೀಯನೊಂದಿಗೆ ಅಕ್ರಮ ಸಂಬಂಧ ಮುಂದುವರಿಸಲು ತೊಡಕಾಗಿದ್ದ ಪತಿಯನ್ನೇ ಡ್ರಗ್ಸ್​ ದಂಧೆ ಪ್ರಕರಣದಲ್ಲಿ ಸಿಲುಕಿಸಲು ಯತ್ನಿಸಿದ್ದ ಪಂಚಾಯತ್ ಸದಸ್ಯೆ ಹಾಗೂ ಆಕೆಯ ಪ್ರಿಯಕರ ಸಿಕ್ಕಿಬಿದ್ದಿರುವ ಘಟನೆ ಕೇರಳದಲ್ಲಿ ನಡೆದಿದೆ. 

ಸ್ಥಳೀಯ ಸಂಸ್ಥೆಯ ಸದಸ್ಯೆ ಸೌಮ್ಯಾ ಅಬ್ರಾಹಂ(34) ಹಾಗೂ ಆಕೆಯ ಪ್ರಿಯಕರ 5ಗ್ರಾಂ ಎಂಡಿಎಂಎ ಗಾಂಜಾವನ್ನು ಪತಿ ಸುನಿಲ್​ ಬೈಕ್​ನಲ್ಲಿ ಫೆ.22ರಂದು ಇರಿಸಿದ್ದರು. ಈ ಬಗ್ಗೆ ಬಂದ ಮಾಹಿತಿಯ ಮೇರೆಗೆ ಸುನೀಲ್​ ಬೈಕ್​ ಅನ್ನು ಜಪ್ತಿ​ ಮಾಡಿದ ಪೊಲೀಸರು ಅದರಲ್ಲಿದ್ದ ಎಂಡಿಎಂಎ ಮಾದಕ ದ್ರವ್ಯವನ್ನು ವಶಕ್ಕೆ ಪಡೆದುಕೊಂಡಿದ್ದರು. 

ತನ್ನ ಬೈಕ್​ನಲ್ಲಿ ಮಾದಕದ್ರವ್ಯವಿದ್ದಿರುದು ಕಂಡು ಸ್ವತಃ ಸುನೀಲ್​ ಗೆ ಶಾಕ್​ ಆಗಿತ್ತು. ಬಳಿಕ ತನಗೇನು ಗೊತ್ತಿಲ್ಲ. ನನ್ನದೇನು ತಪ್ಪಿಲ್ಲವೆಂದು ಸುನಿಲ್ ಹೇಳಿಕೊಂಡಿದ್ದರು. ಇದಾದ ಬಳಿಕ ಪ್ರಕರಣ ದಾಖಲಿಸಿಕೊಂಡ ಪೊಲೀಸರು ತನಿಖೆಗೆ ಇಳಿದಾಗ ಪ್ರಕರಣದ ಅಸಲಿಯತ್ತು ಬಯಲಾಗಿದೆ. 

ಸುನಿಲ್ ಬೈಕ್​ನಲ್ಲಿ ಯಾರೋ ಡ್ರಗ್ಸ್​ ಇಟ್ಟಿರುವ ವಿಚಾರ ತಿಳಿದ ಪೊಲೀಸ್​ ಮಾಹಿತಿದಾರರು ಅದನ್ನು ತನಿಖಾಧಿಕಾರಿಗಳಿಗೆ ತಿಳಿಸುತ್ತಾರೆ. ನಂತರ ಫೋನ್​ ಸಂಭಾಷಣೆಯ ಆಧಾರದಲ್ಲಿ ಡ್ರಗ್ಸ್​ ಇಟ್ಟ ವ್ಯಕ್ತಿಯನ್ನು ಬಂಧಿಸಲಾಗುತ್ತದೆ. ಅಲ್ಲದೆ ಎನ್​ಆರ್​ಐ ವಿನೋದ್​ ರಾಜೇಂದ್ರನ್​(43) ಹಾಗೂ ಡ್ರಗ್ಸ್​ ಇಟ್ಟಿರುವ ವ್ಯಕ್ತಿ ನಿರಂತರ ಸಂಪರ್ಕದಲ್ಲಿರುವುದು ತಿಳಿಯುತ್ತದೆ. 

ಎನ್​ಆರ್​ಐ ಸಂಪರ್ಕದಲ್ಲಿದ್ದುದು ಸುನಿಲ್ ಪತ್ನಿ  ಸೌಮ್ಯಾ ಎಂಬುದು ಆ ಬಳಿಕ ಬೆಳಕಿಗೆ ಬಂದಿದೆ. ವಿಚಾರಣೆ ನಡೆಸಿದಾಗ ಇಬ್ಬರ ನಡುವೆ ಅಕ್ರಮ ಸಂಬಂಧ ಇದ್ದಿದ್ದು ತಿಳಿದು ಬರುತ್ತದೆ. ಈ ಕೃತ್ಯ ಎಸಗಲು ನೆರವು ನೀಡಿದ್ದಾಗಿ ಸೌಮ್ಯಾ ತಪ್ಪೊಪ್ಪಿಕೊಂಡಿದ್ದಾಳೆ. ಎಂಡಿಎಂಎ ಸರಬರಾಜು ಮಾಡಿದ ವ್ಯಕ್ತಿಯು ಸೇರಿದಂತೆ ಕೃತ್ಯ ಎಸಗಿದ ಎಲ್ಲರನ್ನು ಬಂಧಿಸಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.