ತನ್ನದೇ ಬೆತ್ತಲೆ ವೀಡಿಯೋ, ಫೋಟೋಗಳನ್ನು ಕಳುಹಿಸಿ ಇನ್ನಿಲ್ಲದಂತೆ ಕಾಡುತ್ತಿದ್ದ ವಿಕೃತ ಕಾಮುಕ ಕೊನೆಗೂ ಅಂದರ್

ಬೆಂಗಳೂರು: ಅಪರಿಚಿತ ಮಹಿಳೆಯರಿಗೆ ವಿಕೃತ ಕಾಮಿಯೊಬ್ಬ ಅಶ್ಲೀಲ ಫೋಟೋ, ವೀಡಿಯೊಗಳನ್ನು ಶೇರ್ ಮಾಡಿ ವಿಕೃತ ಸಂತೋಷ ಪಡುತ್ತಿದ್ದ. ಹಗಲು-ರಾತ್ರಿ ಎನ್ನದೆ ತನ್ನ ಬೆತ್ತಲೆ ಫೋಟೋಗಳನ್ನು, ವೀಡಿಯೋಗಳನ್ನು ಕಳುಹಿಸಿ  ಕಿರಿಕಿರಿ ಮಾಡುತ್ತಿದ್ದ. ಇದೀಗ ಈ ವಿಕೃತ ಕಾಮಿಯನ್ನು ಆಗ್ನೇಯ ವಿಭಾಗ ಸಿಇಎನ್​ ಪೊಲೀಸರು ಬಂಧಿಸಿದ್ದಾರೆ. 

ಹಾಸನ ಜಿಲ್ಲೆ ಅರಕಲಗೂಡು ತಾಲೂಕಿನ ನಿವಾಸಿ ಹರೀಶ್​ (27) ಬಂಧಿತ ವಿಕೃತ ಕಾಮುಕ. 

ಜೆಸಿಬಿ ಚಾಲಕನಾಗಿದ್ದ ಹರೀಶ್​, ಫೇಸ್​ಬುಕ್​ ಹಾಗೂ ಟ್ವಿಟರ್​ ಗಳಲ್ಲಿ ಮಹಿಳೆಯರಿಗೆ ಫ್ರೆಂಡ್​ ರಿಕ್ವೆಸ್ಟ್ ಕಳುಹಿಸುತ್ತಿದ್ದ. ಅತ್ತಕಡೆಯಿಂದ ಅಸೆಪ್ಟ್ ಸಂದೇಶ ಬಂದ ತಕ್ಷಣ ಅವರಲ್ಲಿ  ವಾಟ್ಸ್​ಆ್ಯಪ್​ ಸಂಖ್ಯೆ ಕೇಳುತ್ತಿದ್ದ. ಯಾರಾದರೂ ಮಹಿಳೆಯರ ಮೊಬೈಲ್​ ನಂಬರ್ ಸಿಕ್ಕರೆ ಸಾಕು ಅವರಿಗೂ ವಾಟ್ಸ್ಆ್ಯಪ್​ ಕಾಲ್​ ಮಾಡುತ್ತಿದ್ದ. ವಾಟ್ಸ್​ಆ್ಯಪ್​ ಮತ್ತು ಮೇಸೆಂಜರ್​ನಲ್ಲಿ ಅಶ್ಲೀಲ ಫೋಟೋ ಮತ್ತು ವಿಡಿಯೋಗಳನ್ನು ಕಳುಹಿಸುತ್ತಿದ್ದ. ಕೆಲವರಿಗೆ ತನ್ನ ಬೆತ್ತಲೆ ಫೋಟೋಗಳನ್ನು ಕಳುಹಿಸಿ ವಿಕೃತಿ ಮೆರೆಯುತ್ತಿದ್ದ. 

ಕಳೆದ 3 ತಿಂಗಳಿನಿಂದ ಹಗಲು-ರಾತ್ರಿ ಎನ್ನದೆ ಬಿಳೆಕಳ್ಳಿ ನಿವಾಸಿ ಮಹಿಳೆಯೋರ್ವರ ಮೊಬೈಲ್​ಗೆ ಹರೀಶ್​ ವಾಟ್ಸ್​ಆ್ಯಪ್​ ಕಾಲ್​ ಮಾಡುತ್ತಿದ್ದ. ಕರೆ ಸ್ವೀಕರಿಸದಿದ್ದರೆ ಅಶ್ಲೀಲ ಫೋಟೋವನ್ನು ಕಳುಹಿಸಿ ಕಿರುಕುಳ ಕೊಡುತ್ತಿದ್ದ. ನೊಂದ ಮಹಿಳೆ, ತನ್ನ ಪತಿಗೆ ವಿಷಯ ತಿಳಿಸಿದ್ದಳು. ಈ ಕುರಿತು ಸಂತ್ರಸ್ತೆ ಪತಿ ಫೆ.16ರಂದು ಆಗ್ನೇಯ ವಿಭಾಗ ಸಿಇಎನ್​ ಠಾಣೆಗೆ ದೂರು ನೀಡಿದ್ದರು. ಪ್ರಕರಣ ದಾಖಲಿಸಿಕೊಂಡು ತನಿಖೆ ಕೈಗೊಂಡ ಪೊಲೀಸರು ಆರೋಪಿ ಮೊಬೈಲ್​ ನಂಬರ್​ನ ಸಿಡಿಆರ್​ ಮಾಹಿತಿಯನ್ನು ಆಧರಿಸಿ ಬಂಧಿಸಿದ್ದಾರೆ. ಈ ವಿಕೃತ ಕಾಮುಕ ಇದೇ ರೀತಿ 10ಕ್ಕೂ ಅಧಿಕ ಮಹಿಳೆಯರಿಗೆ ಕಿರುಕುಳ ಕೊಟ್ಟಿರುವುದು ಬೆಳಕಿಗೆ ಬಂದಿದೆ.