ವಿಶ್ವದ ಅತ್ಯಂತ ದುಬಾರಿ ಟೀ ಪೌಡರ್‌ ಮನೋಹರಿ ಗೋಲ್ಡ್​ ಟೀ ಮಾರಾಟವಾಗಿರೋದು ಎಷ್ಟಕ್ಕೆ ಗೊತ್ತೇ?

ಗುಹಾವಟಿ: ಅಸ್ಸಾಂ ಎಂದರೆ ಪಕ್ಕಾ ನೆನಪಾಗುವುದು ಚಹಾದ್ದೇ.‌ ಚಹಾಗಳ ನಾಡು ಅಸ್ಸಾಂ  ಬಗೆಬಗೆಯ ರೂಪದ ಚಹಾಗಳಿಗೆ  ಪ್ರಸಿದ್ಧಿ. ಇವುಗಳಲ್ಲಿ ಬಲು ರುಚಿಕರ ಎನಿಸಿರುವ, ಸಾಮಾನ್ಯ ಜನರಿಗೆ ಕೈಗೆಟುಕುದ ಚಹವೆಂದರೆ ಅದೇ ಮನೋಹರಿ ಗೋಲ್ಡ್​ ಟೀ.

ಇಲ್ಲಿಯವರೆಗೆ ಕೆ.ಜಿ.ಗೆ 75 ಸಾವಿರ ರೂ.ನಂತೆ ಮಾರಾಟವಾಗುತ್ತಿದ್ದ ಈ ಟೀಪುಡಿ ಇಂದು 99,999 ರೂ.ಗೆ ಮಾರಾಟವಾಗಿದೆಯಂತೆ ಎಂದರೆ ಇದು ಎಷ್ಟೊಂದು ದುಬಾರಿ ಚಹಾ ಹುಡಿ ಎಂದು ನೀವೇ ಊಹಿಸಿಕೊಳ್ಳಿ. 

ಈ ಮೂಲಕ ಅತ್ಯಂತ ಸ್ವಾದಿಷ್ಟ ಭರಿತ ಚಹಾಪುಡಿಯೆಂದೇ ಪ್ರಸಿದ್ಧಿ ಪಡೆದಿರುವ ಮನೋಹರಿ ತನ್ನ ದಾಖಲೆಯನ್ನು ತಾನೇ ಮುರಿದಿದೆ. ಚಹಾಪುಡಿಯನ್ನು 75 ಸಾವಿರ ರೂ. ಕೊಟ್ಟು ಈ ಮೊದಲು ಗುಹಾವಟಿ ಮೂಲದ ವಿಷ್ಣು ಟೀ ಕಂಪನಿ ಖರೀದಿಸಿತ್ತು. ಇದೀಗ ಸೌರವ್​ ಟೀ ಟ್ರೇಡರ್ಸ್​ ಎಂಬ ಕಂಪನಿ 99,999ರೂ ಗೆ ಬಿಡ್‌ ಮಾಡಿ ಇದನ್ನು ಖರೀದಿಸಿದೆ.​ ಈ ಮೂಲಕ ವಿಶ್ವದ ಅತ್ಯಂತ ದುಬಾರಿ ಟೀ ಪೌಡರ್‌ ಎಂದು ಪ್ರಸಿದ್ಧಿ ಗಳಿಸಿದೆ. 

ಆನ್‌ಲೈನ್‌ ಮೂಲಕ ವಿದೇಶಗಳಿಗೂ ಮನೋಹರಿ ಗೋಲ್ಡ್​ ಚಹಾಪುಡಿಯು ಮಾರಾಟವಾಗುತ್ತಿದೆ. ವಿದೇಶಿಗರು ಮುಗಿಬಿದ್ದು ಇದನ್ನು ಖರೀದಿ ಮಾಡುತ್ತಿದ್ದಾರೆ. ವಿದೇಶದಲ್ಲಿ ಇದಕ್ಕೆ ಸಿಕ್ಕಾಪಟ್ಟೆ ಬೇಡಿಕೆ ಇದೆ. ಮನೋಹರಿ ಗೋಲ್ಡ್​ ಚಹಾಪುಡಿಯನ್ನು ಎಳೆಯ ಎಲೆಗಳಿಂದ ಉತ್ಕೃಷ್ಟ ರೀತಿಯಲ್ಲಿ ತಯಾರಿಸಲಾಗುತ್ತದೆ. ಈ ಮಾದರಿಯ ಟೀ ಎಲೆಗಳು ಬೆಳಗಿನ ಜಾವ 4 ಗಂಟೆಯಿಂದ 6 ಗಂಟೆಯವರೆಗೆ ಮಾತ್ರ ಕೀಳಬೇಕಾಗುತ್ತದೆ. ಆಗ ಕೀಳುವ ಎಳೆಯ ಎಲೆಯಿಂದ ಟೀಯನ್ನು ತಯಾರು ಮಾಡಲಾಗುತ್ತದೆ.