ಪತಿಯನ್ನು ಕೊಲೆಗೈದು ಹೂತಿಟ್ಟ ಪತ್ನಿ: ಮೊಬೈಲ್ ಸ್ವಿಚ್ ಮಾಡಿ ಪರಾರಿ

ಬೆಂಗಳೂರು: ಪತಿಯನ್ನು ಕೊಲೆಗೈದು ಪತ್ನಿಯೋರ್ವಳು ಗುಂಡಿ ತೋಡಿ ಮೃತದೇಹವನ್ನು ಹೂತಿಟ್ಟು ಪರಾರಿಯಾಗಿರುವ ಘಟನೆ ರಾಜಧಾನಿ ಬೆಂಗಳೂರಿನ ಹೊರವಲಯದಲ್ಲಿ ನಡೆದಿದೆ. ನಗರದ ಕಿತ್ತಗನೂರು ಸಮೀಪದ ಹಳೇಹಳ್ಳಿಯಲ್ಲಿ ಈ ಹತ್ಯೆ ನಡೆದಿದೆ. 

ಪ್ರೇಮ್ ಬದ್ವಾಲ್ ಎಂಬಾತ ಕೊಲೆಗೀಡಾದ ಪತಿ. ಪತ್ನಿ ಶೋಭಾ ಬದ್ವಾಲ್​ ಕೊಲೆ ಆರೋಪಿ. ಪತಿ - ಪತ್ನಿ ಇಬ್ಬರೂ ನೇಪಾಳ ಮೂಲದವರಾಗಿದ್ದು, ಬೆಂಗಳೂರಿನಲ್ಲಿ ಕೂಲಿ ಕೆಲಸ ಮಾಡುತ್ತಿದ್ದರು ಎಂಬುದು ತಿಳಿದು ಬಂದಿದೆ. 

ಪತ್ನಿ ಶೋಭಾ ಬದ್ವಾಲ್ ಪತಿಯನ್ನು ಕೊಲೆಗೈದು ಗುಂಡಿ ತೋಡಿ ಮುಚ್ಚಿದ್ದಾಳೆ. ಬಳಿಕ ತನ್ನ ಮೊಬೈಲ್​ಫೋನ್​ ಅನ್ನು ಸ್ವಿಚ್ ಆಫ್ ಮಾಡಿ ಪರಾರಿಯಾಗಿದ್ದಾಳೆ. ಕಳೆದ ವಾರವೇ ಆಕೆ ಕೊಲೆಗೈದಿದ್ದಾಳೆಂದು ಶಂಕಿಸಲಾಗಿದೆ. ಮೊನ್ನೆ ರಾತ್ರಿ ಕೆಟ್ಟ ವಾಸನೆ ಬರುತ್ತಿದ್ದಂತೆ ಸ್ಥಳೀಯರು ಆವಲಹಳ್ಳಿ ಪೊಲೀಸರಿಗೆ ದೂರು ನೀಡಿದ್ದಾರೆ. ಸ್ಥಳಕ್ಕೆ ಬಂದ ಪೊಲೀಸರು ಪರಿಶೀಲನೆ ನಡೆಸಿದಾ್ ಮೃತದೇಹ ಪತ್ತೆಯಾಗಿದೆ. 

ಪತಿ-ಪತ್ನಿ ಮಧ್ಯೆ ಯಾವುದೋ ವಿಚಾರಕ್ಕೆ ವಿರಸ ಉಂಟಾಗಿ ಬಳಿಕ ಆಕೆ ಪತಿಯನ್ನು ಹತ್ಯೆ ಮಾಡಿ ಹೂತು ಹಾಕಿರಬಹುದು ಎಂದು ಪೊಲೀಸರು ಶಂಕಿಸಿದ್ದಾರೆ. ತಲೆಮರೆಸಿಕೊಂಡಿರುವ ಆರೋಪಿತೆ ಪತ್ನಿಯ ಪತ್ತೆಗೆ ಪೊಲೀಸರು ಕ್ರಮಕೈಗೊಂಡಿದ್ದಾರೆ.