ಮುಂಬೈ ಪಾನಿಪುರಿ ಬೆಲೆಗೆ ಶಾಕ್ ಆಗಿದ್ದ ರಷ್ಯನ್ ನಟಿ; ದುಬೈ ಏರ್‌ಪೋರ್ಟ್‌ನಲ್ಲಿ 1,096 ರೂಪಾಯಿ ನೋಡಿ ‘ನನ್ನದೇ ತಪ್ಪು’ ಎಂದ ಯುವತಿ!

ಲೋಖಂಡ್‌ವಾಲಾದಲ್ಲಿ ₹60ಕ್ಕೆ ಗೊಣಗಾಡಿದ್ದ ಇರಿನಾ ರುಡಾಕೋವಾ; ದುಬೈ ದರ ನೋಡಿ ಮುಂಬೈಗೆ ಓಡಿಬರ್ತೀನಿ ಎಂದ ಬಿಗ್‌ಬಾಸ್ ಖ್ಯಾತಿಯ ಮಾಡೆಲ್!

ಮುಂಬೈ: ಮುಂಬೈನ ಬೀದಿಬದಿಯಲ್ಲಿ ಒಂದು ಪ್ಲೇಟ್ ಪಾನಿಪುರಿಗೆ 60 ರೂಪಾಯಿ ಕೇಳಿ ಬೆಚ್ಚಿಬಿದ್ದು, ಸೋಷಿಯಲ್ ಮೀಡಿಯಾದಲ್ಲಿ ವಿಡಿಯೋ ಮಾಡಿ ಟ್ರೋಲ್ ಮಾಡಿದ್ದ ರಷ್ಯಾದ ಖ್ಯಾತ ಮಾಡೆಲ್ ಹಾಗೂ ನಟಿ ಇರಿನಾ ರುಡಾಕೋವಾ (Irina Rudakova), ಇದೀಗ ದುಬೈ ವಿಮಾನ ನಿಲ್ದಾಣದಲ್ಲಿ ಪಾನಿಪುರಿಯ ದರ ನೋಡಿ ತನ್ನ ತಪ್ಪನ್ನು ಒಪ್ಪಿಕೊಂಡು ನೆಟ್ಟಿಗರಲ್ಲಿ ಕ್ಷಮೆ ಕೋರಿದ್ದಾರೆ.

ಭಾರತದಲ್ಲೇ ನೆಲೆಸಿರುವ ರಷ್ಯನ್ ಮೂಲದ ನಟಿ ಇರಿನಾ, ಇತ್ತೀಚೆಗೆ ದುಬೈ ಏರ್‌ಪೋರ್ಟ್‌ನ ಟರ್ಮಿನಲ್-1 ರಲ್ಲಿದ್ದಾಗ ಅಲ್ಲಿನ ಪಾನಿಪುರಿ ಬೆಲೆಯನ್ನು ಕಂಡು ದಂಗಾಗಿದ್ದಾರೆ. ಅಲ್ಲಿ ಒಂದು ಪ್ಲೇಟ್ ಪಾನಿಪುರಿಗೆ ಬರೋಬ್ಬರಿ 42 ಯುಎಇ ದಿರ್ಹಾಮ್, ಅಂದರೆ ಭಾರತೀಯ ರೂಪಾಯಿ ಮೌಲ್ಯದಲ್ಲಿ ಸುಮಾರು ₹1,096 ಇತ್ತು. ಇದನ್ನು ನೋಡಿ ಶಾಕ್ ಆದ ಅವರು ತಮ್ಮ ಇನ್‌ಸ್ಟಾಗ್ರಾಮ್‌ನಲ್ಲಿ ತಮಾಷೆಯ ವೀಡಿಯೊ ಒಂದನ್ನು ಹಂಚಿಕೊಂಡಿದ್ದಾರೆ.

"ನನ್ನದೇ ತಪ್ಪು, ಮುಂಬೈಗೇ ವಾಪಸ್ ಬರ್ತೀನಿ!"

ವೀಡಿಯೊದಲ್ಲಿ ಮಾತನಾಡಿರುವ ಇರಿನಾ, "ಸ್ನೇಹಿತರೇ, ಮುಂಬೈನ ಲೋಖಂಡ್‌ವಾಲಾ ಮಾರ್ಕೆಟ್‌ನಲ್ಲಿ 60 ರೂಪಾಯಿಗೆ ಸಿಗುವ ಪಾನಿಪುರಿ ಬಗ್ಗೆ ನಾನು ಅಂದು ತುಂಬಾ ದೂಷಿಸಿದ್ದೆ, ಅದು ನನ್ನದೇ ತಪ್ಪು. ಈಗ ನಾನು ದುಬೈನ ಟರ್ಮಿನಲ್-1 ನಲ್ಲಿದ್ದೇನೆ. ಇಲ್ಲಿ ಪಾನಿಪುರಿ ಬೆಲೆ 42 ದಿರ್ಹಾಮ್, ಅಂದರೆ ಬರೋಬ್ಬರಿ ₹1,096 ರೂಪಾಯಿ! ಇದನ್ನು ನೋಡಿದ ಮೇಲೆ ನಾನೀಗ ವಾಪಸ್ ಮುಂಬೈಗೆ ಓಡಿಬರುತ್ತಿದ್ದೇನೆ" ಎಂದು ತಮಾಷೆಯಾಗಿ ಹೇಳಿಕೊಂಡಿದ್ದಾರೆ.

ಘಟನೆಯ ಹಿನ್ನೆಲೆ:

ಜುಲೈ 24ರಂದು ಮುಂಬೈನ ಲೋಖಂಡ್‌ವಾಲಾ ಮಾರುಕಟ್ಟೆಗೆ ತೆರಳಿದ್ದ ಇರಿನಾ, ಅಲ್ಲಿನ ಬೀದಿಬದಿ ವ್ಯಾಪಾರಿಯೊಬ್ಬರ ಬಳಿ ಪಾನಿಪುರಿ ಬೆಲೆ ಕೇಳಿದ್ದರು. ಆತ "ಒಂದು ಪ್ಲೇಟ್‌ಗೆ 60 ರೂಪಾಯಿ" ಎಂದಾಗ ಆಶ್ಚರ್ಯ ವ್ಯಕ್ತಪಡಿಸಿ, "60 ರೂಪಾಯಿನಾ?" ಎಂದು ಪದೇಪದೇ ಕೇಳುತ್ತಾ ತಮಾಷೆ ಮಾಡಿದ್ದ ವಿಡಿಯೋ ಹಂಚಿಕೊಂಡಿದ್ದರು. ಆದರೆ ನಂತರ ಆಗಸ್ಟ್ 1ರಂದು ಅದೇ ಮುಂಬೈ ಪಾನಿಪುರಿಯ ರುಚಿ ನೋಡಿ ತನಗೆ ತುಂಬಾ ಇಷ್ಟವಾಯಿತೆಂದು ತಿಳಿಸಿದ್ದರು. ಈಗ ದುಬೈ ದರಕ್ಕೆ ಹೋಲಿಸಿ ಅವರು ಮಾಡಿರುವ ಈ ಹೊಸ ವಿಡಿಯೋ ಸೋಷಿಯಲ್ ಮೀಡಿಯಾದಲ್ಲಿ ಭಾರೀ ವೈರಲ್ ಆಗಿದ್ದು, ಭಾರತೀಯ ಸ್ಟ್ರೀಟ್ ಫುಡ್ ಮೌಲ್ಯದ ಬಗ್ಗೆ ನೆಟ್ಟಿಗರು ತಮಾಷೆಯ ಕಾಮೆಂಟ್ ಮಾಡುತ್ತಿದ್ದಾರೆ.

ಯಾರು ಈ ಇರಿನಾ ರುಡಾಕೋವಾ?

• ಇರಿನಾ ರುಡಾಕೋವಾ ರಷ್ಯಾದ ಮೂಲದ ಮಾಡೆಲ್, ನಟಿ ಮತ್ತು ನೃತ್ಯಗಾರ್ತಿಯಾಗಿದ್ದು, ಮನರಂಜನಾ ಕ್ಷೇತ್ರದಲ್ಲಿ ವೃತ್ತಿಜೀವನ ಕಟ್ಟಿಕೊಳ್ಳಲು ತಮ್ಮ 20ನೇ ವಯಸ್ಸಿನಲ್ಲಿ ಭಾರತಕ್ಕೆ ಬಂದರು.
  
  
• ಡಿಸ್ಕವರಿ ಚಾನೆಲ್‌ನ ಸಾಹಸ ರಿಯಾಲಿಟಿ ಶೋ "ರಿಯಾಲಿಟಿ ಕ್ವೀನ್ಸ್ ಆಫ್ ದಿ ಜಂಗಲ್" (ಸೀಸನ್ 2) ವಿನ್ನರ್ ಆಗಿ ₹15 ಲಕ್ಷ ನಗದು ಬಹುಮಾನ ಗೆದ್ದು ಖ್ಯಾತಿ ಗಳಿಸಿದ್ದರು.
  
  
• 2024ರಲ್ಲಿ 'ಬಿಗ್ ಬಾಸ್ ಮರಾಠಿ' (ಸೀಸನ್ 5) ರಿಯಾಲಿಟಿ ಶೋ ಪ್ರವೇಶಿಸಿದ ಮೊದಲ ವಿದೇಶಿ ಸ್ಪರ್ಧಿ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದರು. ಅಲ್ಲಿ ಮರಾಠಿ ಮಾತನಾಡಲು ಪ್ರಯತ್ನಿಸುತ್ತಾ ವೀಕ್ಷಕರ ಅಪಾರ ಪ್ರೀತಿ ಗಳಿಸಿದ್ದರು.