ಬ್ರೆಸಿಲಿಯಾ(ಬ್ರೆಜಿಲ್): ಬ್ರೇಕಪ್ ಮಾಡಿಕೊಂಡಿರೋದಕ್ಕೆ ಸೇಡು ತೀರಿಸಿಕೊಳ್ಳಲು ಯುವಕನೋರ್ವನು ಮಾಜಿ ಪ್ರಿಯತಮೆಯನ್ನು ಅಪಹರಿಸಿ ಆಕೆಯ ಮುಖದ ಮೇಲೆಯೇ ತನ್ನ ಹೆಸರನ್ನು ದೊಡ್ಡ ಅಕ್ಷರಗಳಲ್ಲಿ ಟ್ಯಾಟೂ ಹಾಕಿ ಮನೋವಿಕೃತಿ ಮೆರೆದಿರುವ ಘಟನೆ ಬ್ರೆಜಿಲ್ನಲ್ಲಿ ನಡೆದಿದೆ. ಈ ಪ್ರಕರಣಕ್ಕೆ ಸಂಬಂಧಿಸಿದಂತೆ ವಿಕೃತಿ ಮೆರೆದ ಯುವಕನನ್ನು ಪೊಲೀಸರು ಬಂಧಿಸಿದ್ದಾರೆ.
ಬ್ರೆಜಿಲ್ನ ಸಾವೊ ಪೌಲೊ ನಿವಾಸಿ ತಯಾನೆ ಕಾಲ್ಡಾಸ್ (18) ಹಾಗೂ ಗೇಬ್ರಿಯಲ್ ಕೊಯೆಲ್ಹೋ (20) 2019 ರಿಂದ ಒಬ್ಬರಿಗೊಬ್ಬರು ಪರಿಚಿತರಾಗಿದ್ದರು. ಅಲ್ಲದೇ, ಡೇಟಿಂಗ್ ಕೂಡ ನಡೆಸುತ್ತಿದ್ದರು. ಆ ಬಳಿಕ ಇಬ್ಬರ ಮಧ್ಯೆಯೂ ಮನಸ್ತಾಪ ಉಂಟಾಗಿ ಇಬ್ಬರೂ ದೂರವಾಗಿದ್ದರು. ಆದರೆ, ಪಾಗಲ್ಪ್ರೇಮಿ ಗೇಬ್ರಿಯಲ್ ಕೊಯೆಲ್ಲೊ ತನ್ನ ಮಾಜಿ ಪ್ರೇಯಸಿ ತಯಾನೆ ಕಾಲ್ಡಾಸ್ ನನ್ನು ಬಿಟ್ಟು ಬಿಡಲು ಒಪ್ಪಲಿಲ್ಲ. ಆದ್ದರಿಂದ ಆಗಾಗ ಕಾಲೇಜಿಗೆ ಬಂದು ಕಿರುಕುಳ ನೀಡುತ್ತಿದ್ದನಂತೆ.
ಕೆಲ ದಿನಗಳ ಹಿಂದೆ ತಯಾನೆಯನ್ನು ಅಪಹರಿಸಿರುವ ಗೇಬ್ರಿಯಲ್ ಆಕೆಯನ್ನು ತನ್ನ ಮನೆಗೆ ಹೊತ್ತೊಯ್ದು ಮುಖದ ಮೇಲೆ ಕಾಣಿಸುವಂತೆ ದೊಡ್ಡದಾಗಿ ತನ್ನ ಹೆಸರನ್ನು ಟ್ಯಾಟೂ(ಹಚ್ಚೆ) ಹಾಕಿದ್ದಾನೆ. ಟ್ಯಾಟೂ ಕಲಾವಿದನಾಗಿದ್ದ ಗೇಬ್ರಿಯಲ್ ತನ್ನೊಂದಿಗೆ ಬ್ರೇಕಪ್ ಮಾಡಿಕೊಂಡಿರುವುದಕ್ಕೆ ಸೇಡು ತೀರಿಸಿಕೊಳ್ಳಲು ಈ ಉಪಾಯವನ್ನು ಹುಡುಕಿದ್ದಾನೆ. ಮರುದಿನ ತಯಾನಾ ತಾಯಿ ಪುತ್ರಿ ನಾಪತ್ತೆಯಾಗಿದ್ದಾಳೆ ಎಂದು ಪೊಲೀಸ್ ಠಾಣೆಯಲ್ಲಿ ದೂರು ನೀಡಿದ್ದರು.
ಪೊಲೀಸರು ಗೇಬ್ರಿಯಲ್ ಮನೆಯಲ್ಲಿ ತಯಾನೆಯನ್ನು ಪತ್ತೆ ಮಾಡಿ ಕರೆದೊಯ್ದಿದ್ದಾರೆ. ಗೇಬ್ರಿಯಲ್ನ ಹುಚ್ಚಾಟದಿಂದ ತಯಾನೆ ಅತಿಯಾಗಿ ಭಯಗೊಂಡಿದ್ದಳಂತೆ. ಅಲ್ಲದೆ ಗಲ್ಲದಲ್ಲಿ ದೊಡ್ಡದಾಗಿ ಟ್ಯಾಟೂ ಹಾಕಿರೋದ್ದಕ್ಕೆ ನೊಂದುಕೊಂಡಿದ್ದಾಳೆ. ತನ್ನನ್ನು ಬಲವಂತವಾಗಿ ಅಪಹರಿಸಿ ಮನೆಗೆ ಕರೆದೊಯ್ದು ಆತ ನನ್ನ ಮುಖವನ್ನು ವಿಕಾರ ಮಾಡಿದ್ದಾನೆ ಎಂದು ಆಕೆ ದೂರಿದ್ದಾಳೆ. ಆದರೆ, ಈಕೆಯ ಅಪವಾದವನ್ನು ಗೇಬ್ರಿಯಲ್ನ ಮನೆಯವರು ತಳ್ಳಿಹಾಕಿದ್ದಾರೆ. ತಯಾನೆಯೇ ಇಷ್ಟಪಟ್ಟು ಈ ಟ್ಯಾಟೂ ಹಾಕಿಸಿಕೊಂಡಿದ್ದಾಳೆ ಎಂದು ಆರೋಪಿಸಿದ್ದಾರೆ.
ಈ ಸುದ್ದಿ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದ್ದು, ಯುವತಿಯ ಬಗ್ಗೆ ನೆಟ್ಟಿಗರಿಂದ ಕನಿಕರ ವ್ಯಕ್ತವಾಗಿದೆ. ಅಲ್ಲದೇ ಹಲವಾರು ಟ್ಯಾಟೂ ಕಲಾವಿದರು ಆಕೆಯ ಮುಖದ ಮೇಲಿನ ಟ್ಯಾಟೂವನ್ನು ಲೇಸರ್ನಿಂದ ಅಳಿಸಿ ಹಾಕುವುದಾಗಿ ಹೇಳಿದ್ದಾರೆ. ಇದೀಗ ಯುವತಿಯ ಮುಖದ ಮೇಲಿನ ಟ್ಯಾಟೂವನ್ನು ಲೇಸರ್ ಚಿಕಿತ್ಸೆಯಿಂದ ಅಳಿಸಿ ಹಾಕಲಾಗಿದೆ. ಇದಲ್ಲದೇ, ಪ್ರಿಯಕರನ ಹೆಸರಲ್ಲಿದ್ದ ಇನ್ನೆರಡು ಟ್ಯಾಟೂವನ್ನು ಕೂಡ ಅಳಿಸಲಾಗಿದೆ. ತನ್ನ ಮುಖವನ್ನು ವಿಕಾರ ಮಾಡಿದ್ದಕ್ಕೆ ಮಾಜಿ ಪ್ರಿಯಕರನಿಗೆ ಕಠಿಣ ಶಿಕ್ಷೆಯಾಗಬೇಕೆಂದು ತಯಾನೆ ಒತ್ತಾಯಿಸಿದ್ದಾಳೆ.
.png)
