ನವದೆಹಲಿ:
ಕಾರ್ಪೊರೇಟ್ ಜಗತ್ತಿನ ಒತ್ತಡದ ಬದುಕಿನಿಂದ ಮುಕ್ತಿ ಪಡೆದು, ಮುಕ್ತ ವಾತಾವರಣದಲ್ಲಿ ಹೊಸದನ್ನು ಹುಡುಕುವ ಕನಸು ಹಲವರಿಗಿರುತ್ತದೆ. ಆದರೆ, ನಿಯಮಿತ ಸಂಬಳ ನೀಡುತ್ತಿದ್ದ ಕೆಲಸವನ್ನು ಬಿಟ್ಟು ಹೊಸ ಜೀವನ ಆರಂಭಿಸುವುದು ಅಂದುಕೊಂಡಷ್ಟು ಸುಲಭವಲ್ಲ. ದೆಹಲಿಯಲ್ಲಿ ಮಾನವ ಸಂಪನ್ಮೂಲ (HR) ಅಧಿಕಾರಿಯಾಗಿ ಕೆಲಸ ಮಾಡುತ್ತಿದ್ದ ಅರ್ಪಿತಾ ಸಾಹು ಎಂಬುವವರು ತಮ್ಮ ಉದ್ಯೋಗಕ್ಕೆ ರಾಜೀನಾಮೆ ನೀಡಿ ಗೋವಾಕ್ಕೆ ಸ್ಥಳಾಂತರಗೊಂಡಿದ್ದು, ಈ ಹೊಸ ಪಯಣದಲ್ಲಿ ಎದುರಾಗುತ್ತಿರುವ ನೈಜ ಆತಂಕ, ಆರ್ಥಿಕ ಅನಿಶ್ಚಿತತೆ ಮತ್ತು ಭಾವನಾತ್ಮಕ ಸವಾಲುಗಳನ್ನು ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡಿದ್ದಾರೆ.
ಎಂಬಿಎ ಮುಗಿಸಿ ಇನ್ಫೋ ಎಡ್ಜ್ (Info Edge India Ltd) ಹಾಗೂ ಕಾಗ್ನಿಜೆಂಟ್ (Cognizant) ನಂತಹ ಪ್ರತಿಷ್ಠಿತ ಸಂಸ್ಥೆಗಳಲ್ಲಿ ಸುಮಾರು ನಾಲ್ಕುವರೆ ವರ್ಷಗಳ ಕಾಲ ಕೆಲಸ ಮಾಡಿದ್ದ ಅರ್ಪಿತಾ, ಏಕತಾನತೆಯ ಕಾರ್ಪೊರೇಟ್ ಶೈಲಿಯಿಂದ ಹೊರಬಂದು ಜೀವನದ ಉದ್ದೇಶವನ್ನು ಕಂಡುಕೊಳ್ಳಲು ಗೋವಾಕ್ಕೆ ತೆರಳಿದ್ದರು.
'ಆಫೀಸ್ ಇಲ್ಲದ ಮೊದಲ ಸೋಮವಾರ' ತಂದ ಆತಂಕ:
ಕೆಲಸ ಬಿಟ್ಟ ಆರಂಭದ ದಿನಗಳಲ್ಲಿ ಸಿಗುವ ಸ್ವಾತಂತ್ರ್ಯ ಮತ್ತು ರೋಮಾಂಚನ ಕೆಲವೇ ದಿನಗಳಲ್ಲಿ ಕರಗಿಹೋಗುತ್ತದೆ ಎಂಬುದನ್ನು ಅರ್ಪಿತಾ ತಮ್ಮ ವಿಡಿಯೋಗಳಲ್ಲಿ ವಿವರಿಸಿದ್ದಾರೆ. ಸಾಮಾನ್ಯ ಉದ್ಯೋಗಿಗಳಿಗೆ ಸೋಮವಾರವೆಂದರೆ ಹೊಸ ಕೆಲಸದ ವಾರದ ಆರಂಭ. ಆದರೆ ಕೆಲಸ ತೊರೆದ ಬಳಿಕ ಮೊದಲ ಬಾರಿಗೆ ಎದುರಾದ ಆ ಸೋಮವಾರ ಅವರಲ್ಲಿ ನಿರಾಳತೆಯ ಬದಲು ತೀವ್ರ ಅನಿಶ್ಚಿತತೆಯನ್ನು ತಂದೊಡ್ಡಿತು.
"ಖಾತೆಯಲ್ಲಿರುವ ಉಳಿತಾಯದ ಹಣ ಸೀಮಿತವಾಗಿದೆ, ನಿಯಮಿತ ಸಂಬಳ ಬರುತ್ತಿಲ್ಲ ಎಂಬ ಆಲೋಚನೆ ನಿರಂತರವಾಗಿ ಕಾಡಲಾರಂಭಿಸಿತು. ಮುಂದೇನು ಮಾಡಬೇಕೆಂಬ ಗುರಿ ಸ್ಪಷ್ಟವಿಲ್ಲದಿದ್ದಾಗ ಇನ್‌ಸ್ಟಾಗ್ರಾಮ್‌ನಲ್ಲಿ ಫಾಲೋವರ್ಸ್ ಸಂಖ್ಯೆ ಹಾಗೂ ವ್ಯೂಸ್‌ಗಳನ್ನು ಮತ್ತೆ ಮತ್ತೆ ಪರಿಶೀಲಿಸುವ ವ್ಯಸನಕ್ಕೆ ಬಿದ್ದೆ. ಕೇವಲ ಸಂಬಳ ಮಾತ್ರವಲ್ಲದೆ, ಕಚೇರಿಯ ಕೆಲಸ ನಮಗೆ ನೀಡುತ್ತಿದ್ದ ದಿನಚರಿ ಮತ್ತು ನಿಯಮಿತ ಚೌಕಟ್ಟು ಇಲ್ಲವಾದಾಗ ಏಕಾಗ್ರತೆ ಕಳೆದುಕೊಳ್ಳುವುದು ಸಹಜ" ಎಂದು ಅವರು ಮುಕ್ತವಾಗಿ ಹೇಳಿಕೊಂಡಿದ್ದಾರೆ.
ಬೀಚ್ ಲೈಫ್ ಹಿಂದಿರುವ ಆರ್ಥಿಕ ಒತ್ತಡ:
ಸಾಮಾಜಿಕ ಜಾಲತಾಣಗಳಲ್ಲಿ ಕಾಣುವ ಗೋವಾದ ಸುಂದರ ಸಮುದ್ರ ತೀರ ಮತ್ತು ನಿರಾಳ ಜೀವನದ ಚಿತ್ರಗಳಷ್ಟೇ ಬದುಕು ಸರಳವಾಗಿರುವುದಿಲ್ಲ ಎಂದು ಅರ್ಪಿತಾ ನೆನಪಿಸಿದ್ದಾರೆ. ಕಾರ್ಪೊರೇಟ್ ಕೆಲಸ ಬಿಡುವುದು ಹೊಸ ಹಾದಿ ಹುಡುಕಲು ಅವಕಾಶ ನೀಡಬಹುದಾದರೂ, 'ತೆಗೆದುಕೊಂಡ ನಿರ್ಧಾರ ಸರಿಯಾಗಿದೆ' ಎಂದು ಸಾಬೀತುಪಡಿಸಬೇಕಾದ ಆಂತರಿಕ ಒತ್ತಡ ಹಾಗೂ ಸೀಮಿತ ಆರ್ಥಿಕ ಬಲ ಹೊಸ ಸವಾಲುಗಳನ್ನು ತಂದೊಡ್ಡುತ್ತದೆ.
ನೆಟ್ಟಿಗರ ಮಿಶ್ರ ಪ್ರತಿಕ್ರಿಯೆ:
ಅರ್ಪಿತಾ ಅವರ ಈ ಪ್ರಾಮಾಣಿಕ ವೀಡಿಯೋಗಳು ಸಾಮಾಜಿಕ ಮಾಧ್ಯಮಗಳಲ್ಲಿ ಭಾರಿ ಚರ್ಚೆಗೆ ಕಾರಣವಾಗಿವೆ. "ಕಾರ್ಪೊರೇಟ್ ಬಿಟ್ಟು ಹೊಸ ದಾರಿ ಹುಡುಕುವುದು ಒಳ್ಳೆಯದೇ ಆದರೂ, ಆದಾಯದ ನಿಶ್ಚಿತತೆ ಇಲ್ಲದೆ ಇಂತಹ ನಿರ್ಧಾರಗಳು ಕಷ್ಟಕರ" ಎಂದು ಕೆಲವರು ಅಭಿಪ್ರಾಯಪಟ್ಟರೆ, "ಭವಿಷ್ಯದ ಗುರಿಗಳಿಗಿಂತ ವರ್ತಮಾನದಲ್ಲಿ ಜೀವಿಸುವುದನ್ನು ಕಲಿಯುವುದು ಮುಖ್ಯ" ಎಂದು ಹಲವರು ಪ್ರೋತ್ಸಾಹಿಸಿದ್ದಾರೆ. ಮತ್ತೆ ಕೆಲವರು ಮುಂಬೈನಂತಹ ಮಹಾನಗರಗಳು ಇಂತಹ ಸಂದರ್ಭದಲ್ಲಿ ಉತ್ತಮ ಸ್ಥಿರತೆ ನೀಡಬಲ್ಲವು ಎಂದು ಸಲಹೆ ನೀಡಿದ್ದಾರೆ.
