ಪಾಟ್ನಾ: ಸಂಪೂರ್ಣ ಮದ್ಯಪಾನ ನಿಷೇಧವಿರುವ ಬಿಹಾರಕ್ಕೆ ರೈಲಿನ ಪ್ರಥಮ ದರ್ಜೆ ಎಸಿ (First AC) ಬೋಗಿಯಲ್ಲಿ ತಪಾಸಣೆಯಿಂದ ತಪ್ಪಿಸಿಕೊಳ್ಳಲು ₹1.5 ಲಕ್ಷ ಮೌಲ್ಯದ ಬ್ರ್ಯಾಂಡೆಡ್ ವಿದೇಶಿ ಮದ್ಯವನ್ನು ಸಾಗಿಸುತ್ತಿದ್ದ 25 ವರ್ಷದ ಪದವೀಧರೆ ಯುವತಿಯೊಬ್ಬಳನ್ನು ರೈಲ್ವೆ ರಕ್ಷಣಾ ಪಡೆ (ಆರ್ಪಿಎಫ್) ಬಂಧಿಸಿದೆ.
ಬಂಧಿತ ಆರೋಪಿಯನ್ನು ಸಮಸ್ತಿಪುರ ಜಿಲ್ಲೆಯ ಬಾರಿ ಗ್ರಾಮದ ನಿವಾಸಿ ನೇಹಾ ಝಾ (25) ಎಂದು ಗುರುತಿಸಲಾಗಿದೆ. ಆಕೆಯೊಂದಿಗೆ ಪ್ರಯಾಣಿಸುತ್ತಿದ್ದ ಆಕೆಯ ನಿಕಟ ಸಂಬಂಧಿ, ಬಿ.ಟೆಕ್ ಪದವೀಧರ ಇಶಾನ್ ಕುಮಾರ್ ಎಂಬಾತನನ್ನೂ ಬಂಧಿಸಲಾಗಿದೆ.
ಪೊಲೀಸ್ ತಪಾಸಣೆಗೆ ಹೆದರಿ ಫಸ್ಟ್ ಎಸಿ ಬೋಗಿ ಬಳಕೆ
ದೆಹಲಿ-ಜಯನಗರ ಸ್ವತಂತ್ರತಾ ಸೇನಾನಿ ಎಕ್ಸ್ಪ್ರೆಸ್ ರೈಲಿನ ಪ್ರಥಮ ದರ್ಜೆ ಎಸಿ ಬೋಗಿಯಲ್ಲಿ ಇವರಿಬ್ಬರೂ ಪ್ರಯಾಣಿಸುತ್ತಿದ್ದರು. ಪೊಲೀಸರು ಅಥವಾ ಭದ್ರತಾ ಸಿಬ್ಬಂದಿ ಪ್ರಥಮ ದರ್ಜೆ ಎಸಿ ಪ್ರಯಾಣಿಕರನ್ನು ತಪಾಸಣೆ ಮಾಡುವ ಸಾಧ್ಯತೆ ಕಡಿಮೆ ಎಂಬ ಕಾರಣಕ್ಕೆ ಈ ಮಾರ್ಗವನ್ನು ಆಯ್ದುಕೊಂಡಿದ್ದರು. ಆದರೆ, ಅನುಮಾನಗೊಂಡು ಆರ್ಪಿಎಫ್ ಸಿಬ್ಬಂದಿ ಬ್ಯಾಗ್ಗಳನ್ನು ಪರಿಶೀಲಿಸಿದಾಗ ಭಾರಿ ಪ್ರಮಾಣದ ದುಬಾರಿ ವಿದೇಶಿ ಮದ್ಯದ ಬಾಟಲಿಗಳು ಪತ್ತೆಯಾಗಿವೆ. ಇಬ್ಬರನ್ನೂ ನ್ಯಾಯಾಲಯಕ್ಕೆ ಹಾಜರುಪಡಿಸಲಾಗಿದ್ದು, 14 ದಿನಗಳ ನ್ಯಾಯಾಂಗ ಬಂಧನಕ್ಕೆ ಒಪ್ಪಿಸಲಾಗಿದೆ.
ವೈದ್ಯರು, ಉದ್ಯಮಿಗಳಿಗೆ ಪೂರೈಕೆಯಾಗುತ್ತಿತ್ತು ಮದ್ಯ!
ತನಿಖಾಧಿಕಾರಿಗಳ ಪ್ರಕಾರ, ದರ್ಬಂಗಾದಲ್ಲಿ ಉನ್ನತ ವ್ಯಾಸಂಗ ಮಾಡುತ್ತಿದ್ದ ನೇಹಾ ಝಾ, ಅಲ್ಲಿನ ವೈದ್ಯರು ಹಾಗೂ ಪ್ರಮುಖ ಉದ್ಯಮಿಗಳಿಗೆ ಈ ಮದ್ಯವನ್ನು ಡೋರ್ ಡೆಲಿವರಿ ಮಾಡಲು ಕೊಂಡೊಯ್ಯುತ್ತಿದ್ದಳು. ಈಕೆಯ ಕುಟುಂಬವೇ ಅಕ್ರಮ ಮದ್ಯ ಸಾಗಾಟದ ಜಾಲದಲ್ಲಿ ಸಕ್ರಿಯವಾಗಿದ್ದು, ಈಕೆಯ ತಂದೆ ಹಾಗೂ ಸಹೋದರಿ ಈ ಹಿಂದೆಯೇ ಬಿಹಾರ ಅಬಕಾರಿ ಕಾಯ್ದೆಯಡಿ ಬಂಧನಕ್ಕೊಳಗಾಗಿದ್ದರು. ಅಲ್ಲದೆ, ಈಕೆಯ ಭಾವ ಕೂಡ ಸದ್ಯ ಛಪ್ರಾ ಜೈಲಿನಲ್ಲಿದ್ದು, ಆತನ ಬಂಧನದ ಬಳಿಕ ನೇಹಾ ತನ್ನ ಸಂಬಂಧಿ ಇಶಾನ್ ಕುಮಾರ್ನೊಂದಿಗೆ ಸೇರಿಕೊಂಡು ಈ ಅಕ್ರಮ ಜಾಲವನ್ನು ಮುನ್ನಡೆಸುತ್ತಿದ್ದಳು ಎಂದು ಪೊಲೀಸರು ತಿಳಿಸಿದ್ದಾರೆ.
ಬಿಹಾರದಲ್ಲಿ 2016ರಿಂದಲೇ ಮದ್ಯ ಮಾರಾಟ ಹಾಗೂ ಸೇವನೆಯನ್ನು ಸಂಪೂರ್ಣ ನಿಷೇಧಿಸಲಾಗಿದ್ದರೂ, ನೆರೆ ರಾಜ್ಯಗಳಿಂದ ರೈಲುಗಳ ಮೂಲಕ ಮದ್ಯ ಕಳ್ಳಸಾಗಣೆ ಮಾಡುವ ದಂಧೆ ಎಗ್ಗಿಲ್ಲದೆ ಸಾಗುತ್ತಿದೆ. ಕಳೆದ ಆಗಸ್ಟ್ ತಿಂಗಳೊಂದರಲ್ಲೇ ಬಿಹಾರ ಪೊಲೀಸರು 1.12 ಲಕ್ಷ ಕಡೆ ದಾಳಿ ನಡೆಸಿ, 7.10 ಲಕ್ಷ ಲೀಟರ್ ಮದ್ಯ ವಶಪಡಿಸಿಕೊಂಡು 11,300 ಜನರನ್ನು ಬಂಧಿಸಿದ್ದಾರೆ.
.png)
