ಇನ್ನು ಮುಂದೆ ವಾಟ್ಸ್ಆ್ಯಪ್ ಅಡ್ಮಿನ್ ಗಳು ನಿರಾಳ: ಗ್ರೂಪ್ ಸದಸ್ಯರ ಪೋಸ್ಟ್ ಗಳಿಗೆ ಸಂಬಂಧಿಸಿದಂತೆ ಮತ್ತದೇ ಆದೇಶ ನೀಡಿದ ಮದ್ರಾಸ್ ಹೈಕೋರ್ಟ್
Thursday, December 30, 2021
ನವದೆಹಲಿ: ವಾಟ್ಸ್ಆ್ಯಪ್ ಗ್ರೂಪ್ ಅಡ್ಮಿನ್ಗಳು ಗ್ರೂಪ್ ಸದಸ್ಯರ ಅಸಂಬದ್ಧ ಮಾತುಗಳು, ಕಮೆಂಟ್ಸ್ ಗಳಿಂದ ತಪ್ಪಿಸಿಕೊಳ್ಳಲು ‘ಅಡ್ಮಿನ್ ಓನ್ಲಿ’ ಎಂಬ ಆಪ್ಷನ್ ಆ್ಯಕ್ಟಿವೇಟ್ ಮಾಡಿಟ್ಟುಕೊಂಡಿರುತ್ತಾರೆ. ಯಾಕೆಂದರೆ ಗ್ರೂಪ್ ಸದಸ್ಯರಲ್ಲಿ ಯಾರಾದರೂ ಆಕ್ಷೇಪಾರ್ಹ ಪೋಸ್ಟ್ ಮಾಡಿ ಪ್ರಕರಣ ದಾಖಲಾದಲ್ಲಿ ಅಡ್ಮಿನ್ ಮೇಲೂ ಕ್ರಮಕೈಗೊಳ್ಳಲಾಗುತ್ತದೆ ಎಂಬ ಭಯವೇ ಇದಕ್ಕೆ ಕಾರಣ.
ಆದರೆ ಇದೀಗ ವಾಟ್ಸ್ಆ್ಯಪ್ ಅಡ್ಮಿನ್ಗಳು ಆ ರೀತಿ ಮಾಡಿಕೊಳ್ಳುವ ಅನಿವಾರ್ಯತೆಯೇ ಇಲ್ಲ. ಈ ಬಗ್ಗೆ ಈಗಾಗಲೇ ಇರುವ 'ಗ್ರೂಪ್ ಸದಸ್ಯರ ಪೋಸ್ಟ್ಗಳಿಗೆ ವಾಟ್ಸ್ಆ್ಯಪ್ ಅಡ್ಮಿನ್ ಹೊಣೆಗಾರರಲ್ಲ' ಎಂಬ ಮಹತ್ವದ ತೀರ್ಪನ್ನು ಮದ್ರಾಸ್ ಹೈಕೋರ್ಟ್ ಪುನರುಚ್ಚರಿಸಿದೆ. ಈ ನಿಟ್ಟಿನಲ್ಲಿ ವಾಟ್ಸ್ಆ್ಯಪ್ ಅಡ್ಮಿನ್ಗಳು ಇದರಿಂದ ನಿರಾಳರಾಗುವುದಂತೂ ಖಚಿತ. ಬಾಂಬೆ ಹೈಕೋರ್ಟ್ ಈ ಹಿಂದೆ ನೀಡಿರುವ ಆದೇಶವೊಂದನ್ನು ಉಲ್ಲೇಖಿಸುವ ಮೂಲಕ ನ್ಯಾಯಮೂರ್ತಿ ಜಿ.ಆರ್. ಸ್ವಾಮಿನಾಥನ್ ಆ ಆದೇಶವನ್ನು ಪುನರುಚ್ಚರಿಸಿದ್ದಾರೆ.
ಬಾಂಬೆ ಹೈಕೋರ್ಟ್ ವಿ.ಕಿಶೋರ್ ಹಾಗೂ ಮಹಾರಾಷ್ಟ್ರ ರಾಜ್ಯದ ನಡುವೆಯಿದ್ದ ಪ್ರಕರಣವೊಂದರಲ್ಲಿ ಆಕ್ಷೇಪಾರ್ಹ ಪೋಸ್ಟ್ಗೆ ಸಂಬಂಧಿಸಿದ ಆರೋಪಿಗಳ ಪಟ್ಟಿಯಿಂದ ವಾಟ್ಸ್ಆ್ಯಪ್ ಅಡ್ಮಿನ್ ಹೆಸರನ್ನು ತೆಗೆದುಹಾಕಬೇಕು ಎಂದು ಆದೇಶಿಸಿತ್ತು. ಅಡ್ಮಿನ್ ಆದ ಮಾತ್ರಕ್ಕೆ ಆ ವ್ಯಕ್ತಿಯನ್ನೂ ಹೊಣೆಗಾರನನ್ನಾಗಿ ಮಾಡಿ ಆರೋಪಿಯ ಸ್ಥಾನದಲ್ಲಿ ಇರಿಸಲಾಗದು. ಆದರೆ ಅಡ್ಮಿನ್ ಜವಾಬ್ದಾರಿಯ ಹೊರತಾಗಿಯೂ ಆತ ಅಥವಾ ಆಕೆ ಆಕ್ಷೇಪಾರ್ಹ ಪೋಸ್ಟ್ ವಿಚಾರದಲ್ಲಿ ಪಾಲ್ಗೊಂಡಿದ್ದರೆ ಮಾತ್ರ ಆಗ ಆರೋಪಿಯನ್ನಾಗಿಸಬಹುದು ಎಂದಿದೆ.
ಅಡ್ಮಿನ್ ಪಾತ್ರ ಅಡ್ಮಿನ್ ಅಷ್ಟೇ ಆಗಿದ್ದಲ್ಲಿ, ವಿವಾದಿತ ಅಥವಾ ಆಕ್ಷೇಪಾರ್ಹ ಬರಹದಲ್ಲಿ ಅಡ್ಮಿನ್ ಬೇರೆ ಯಾವುದೇ ರೀತಿಯಲ್ಲಿ ತೊಡಗಿಕೊಂಡಿರದಿದ್ದರೆ ಅಡ್ಮಿನ್ ಹೆಸರನ್ನು ದೋಷಾರೋಪ ಪಟ್ಟಿಯಿಂದ ತೆಗೆದುಹಾಕಬಹುದು ಎಂದು ನ್ಯಾಯಮೂರ್ತಿ ಜಿ.ಆರ್. ಸ್ವಾಮಿನಾಥನ್ ಆದೇಶ ನೀಡಿದ್ದಾರೆ.
